Naacum 3 - NABUWWA KEE MALIKWA

¹ Sahda elle qidan magaalay, woyyow kot takku waytaamow! Deedalat elle yaaban magaalay, woyyow kot takku waytaamow! Mango duyyey buubtehiyya kot tanih; kok buubelon.

² Faaris edde yaaguren keetalih faxiqtu aabbeh an. Gaariira gexxa way xawta xaw aabbeh an. Faaris aba xoxob aabbeh an.

³ Faariisah amot yan mari faaris xoxbisa. Seef bixiq iyya; macaxi liliq iyya. Raysitte tittak bagul tan. Raysittek loowo num mayaaxiga. Kuda mari raysittê bagul yandafoofele.

⁴ Qamal akak yoome Nanawe diggalsinteh. Qax maqaanet sinam baysakaay, sicrit sinam aylahisak sugteeh; too taamat mango mara naqoosa abte.

⁵ YALLAY Nabaamak Nabahiyya iyyeemih, «Nanawê-magaalay, kok naqboyta ekkeh an. Doolatwa qawrat kok akah table innah qasunuk koo cabeyyo.

⁶ Gacta intit koo ableyyooh, guddaafa kot qideyyo. Kot tekkem yable mari anqaasah kol rabele.

⁷ Hagga axcuk, ‹Nanawê-magaala abuuruh raqteh matanaa!› axceloonuh, ‹Teetih xuwaawa mari mayana› axcelon. Teetih qaada mara magenniyo» iyye.

⁸ Nanawey, atu Teebes deqsitta magaalay Masrik inaytah tenek maay tayse? Too magaalak gasoh innah reebu teetih yakke weeqaytu luk ten. Toh, Niil kaxxa weeqaytu.

⁹ Teebes magaalah mari Kuus kee Masril ackumuk yeneeh; caddo sinni qanxaffe luk yenen. Liibiya kee Fuut doolat qeebil tet qaxat ten.

¹⁰ Toh teetih xiqtem maliiy; ellecabol too magaalah mara seewah marin baaxo been. Tet xaylo xaal tafaqqa heenih, baaxot qiden. Teetil abbobtih suge mara silsilatat axuyya heenih beeniih, ken seewah bee mari saami caxxa keenil qide.

¹¹ Nanawê-maraw, isin kaadu yiskire marih innah lagaggaq edde intaanaah, naqboytiitik sasseenih edde tambooqoren aracih goranah, tardoonu waytan saaki amaatele.

¹² Assuuriyah mari megdebitte yabbaxu waa marah, *sublay xaylo akak alayteh innah gacele. Subla xaylo caxa ligligga haan way xayuk elle radda innal, ken gabat radelon.

¹³ Assuuriyah qaskar meysih agabu akkele. Cuduud dacrissa qaskar matanaay; naqboytit akak elle waasinta innal matan. Koositih bicsiten aroocat gira gexele.

¹⁴ Nanawê-maraw, magaalat siinik hoonu waan marok leek keewo haysita. Koosit meqe innah bicsita. Burta bahha haay, leet arqussa haay kalla abba haay gaso akak xisa. Kallak bicissen xeet bical haa.

¹⁵ Magaala naqboytit siinik culaamak gaso edde haa'mmay, faxe bica abtaanamah girat cararetton. Carbit kaadu ambaxetton. Qanayti sele cooxih innah foyyah raqqa axcetton. Mangah qanayti gide tekken.

¹⁶ Badaaqat aba mari siinik mangah qaraanal tan cutuukak mangooh; takkay immay qanayti haadeh elle kuda innal, elle yanin magaala foyyah cabba heenih kudelon.

¹⁷ Siinik qaskar kee doolatat taamita kaxxa mari, wac yan saaku gidaar bagul sasa qanaytih inna le. Too qanayti ayro laqta waqdi, haadeh qaxak teenal gexa'mmay gexe ikke num mayaaxiga. Qaskar kee doolatat taamita kaxxa mari kaadu toh abele.

¹⁸ Assuuriyah malikow, ku doolatih maray ku ummatih duwat yanihiyya rabeh gaba kaleh. Ku kaxxa maray muddaqiyih sugehiyya akak ugute waan xiinih xiinen. Tohih sabbatah ku mari qaleelah amol fixixih gace. Tohuk wadir ken baaxo fanah ken gacissam matan.

¹⁹ Kot yekke mudum, dayla le mudum hinna. Akak urta mudum hinna. Atu abak sugte umaane kee racmatta sinnak yisillime mari maay yan? Mayana. Tonna leemik, ku baati yaabbu waa mari farcatah gaba aagurele.