Naacum 1 - NABUWWA KEE MALIKWA

¹ Yalli Nanawê magaalah giddinaamak ruube farmo ah teeti. Elkos deqsita aracal yooboke Naacum deqsita nabil, Yallih wacyi oobeeh; Naacum yublem a kitaabal yuktube.

YALLIH BAGCARRA NANAWEL OBTE

² YALLI isit massoowan faxa mara maqansiisa. Kaa niqbaah, kay yab cina maral cane gacsah. Kay naqabuk tamaate bala keenil obta.

³ YALLI giffa 'ta qande le'mmay, tohuh dagoomut mabagcarrita. Takkay immay umaane aba mara digaale'kal macaba. Isih elle gexa kabul caacay kee caaco ugusa. Siisa sahdah ibat elle ugutta'nnal, qamburre kay ibih gubat ugutta.

⁴ Bad kee weeqaytu YALLI «Kafa» iyya saaku kafta. Basan rasul tan qayso kee Karmel qalel yan coox YALLI «Kafa» iyya saaku kafa. Lubnaan qaleelal yan qobor YALLI isih faxa saaku kafsa.

⁵ YALLIH foocal qaleeli kadiidimitah. Kooma kay foocal diyaytah. YALLIH garil baaxo axaxxah. Addunya kee addunyâ-bagul enna 'tam inkih axaxittah.

⁶ YALLIH naqabuk iyyi soolak raaqaah? Kay bagcarray girah innah urtahiyya iyyi yasseede? Kay naqbi kulli marat girah innah ura. Xeet kay foocal bokokah ballaaqe yakke.

⁷ Maqaane YALLI imi. Isi mara gadaamal cata. Kaa wadbita mara dacrisah.

⁸ Isi naqboytit kaxxa weeqih duufut ruuba. Kaa niqba mara inkitanuuk bayisah.

⁹ YALLAL macah malissan? YALLI sin baysele. Inki adda kaal saduh gacaanamah, nammayhaak maqagtan.

¹⁰ Isin yiskire maraw, kafte qayso kee ittat culah yan keenaanit gexxa girah innah cararetton.

¹¹ Nanawê magaalay, YALLAL malse numuy sahdah uma fayu yeceehiyya kok yemeeteh yan.

¹² YALLI isi ummatak iyyaamah: «Assuuriyah mari celeema kinnoonuuh, manga loonuh immay bayeloonuuh; suge weenih innah ken bayseyyo. Yi ummatey, sin biyaakeh immay ahaysa sin mabiyaaka.

¹³ Ahaysa Assuuriyah mari siinil yabbixe xukkok sin ayyaaqeyyooh; edde tanin axawak sin kaleyyo» iyye.

¹⁴ YALLI Assuuriyah-marih giddinaamak edde yaabeemih: «Migaaqat keenik elle yaaban xaylo keenik maraqta. Ken qibaadah bicsen qarwal tan Yalla akak iyyan duyye keenik bayseyyo. Assuuriyah marah kabrih bicsat an. A addunyah mano keenih mataguuda» iyye.

¹⁵ Naacum iyyeemih, «Wagitaay woo qaleelah kabuk, meqe xaagu gabat le farmoyti yamaateh yan! Wagari geytimem yaysaabbem faxa. Yuudâ-maraw, ifricay qiidih asaay, Yallah culten nadri ucuya. Sin naqboytiitiy umeynitih sugehiyya yembexeeh; ahaysa sin baaxo siinik beytam matana; ken inkitanuuk bayseh ikkal» iyye.