Miika 7 - NABUWWA KEE MALIKWA

ISRAAYIL MARAK TAAMA TOOMEH

¹ Nabi Miika iyyeemih, «Woyyow yi nabsow! Satqiteh yemeete numuy caxat caxâ-miru weeh, qinab-xaylo wee ekke. Qinab kee salfa luk yen caxâ-miruk tu matan.

² Baaxô-bagul yaaminen num maraaqinna. Yallal imaan haa num mayana. Num numtin qidimih raarisa. Kulli num isi baaxoh numuh alluwwah innah admoh gexa.

³ Umam abittol ken celtam matan. Doolat saqolti kee cokmaaba guqul faxxaah, milki le mari faxxa heem aban. Yakkeenimiik sahdak aboonu waanamal malsitan. Isinnih faxaanamah sinam dirkisan.

⁴ Ken kaxxa mari foyyaay, baaxok bagul yooboke waaqeexik mayaysa. Yalli ummatah dumal elle ken nabuwway ken dacrisak sugteh kabuk keenih elle warse innal, ken edde digaalu waa ayro temeeteh. Too waqdi baditit sugelon.

⁵ Cuggaaneh kok yan num maamanin. Kataysal bagu maacan. Isi barra luk edde yabta yab kinni way cubbusak yab.

⁶ A dabaanal lab xaylo isi xaleena duquura takkaleeh, say xaylo isi inantih amot gacta. Qunxa barra isi ballo lih mabicta. Buxâ-mari tittak naqboytit yakke.

⁷ Yoh tu gactek, anu YALLI abam YALLAK qambaaleyyo. Yi Dagelti yoo catelem aaxigeeh, kaa qambaaleyyo. Yi Dagelti yi yab aabbele» iyye.

CATO YALLAK GEYTINTA

⁸ Yarusalaam mari iyyeemih, «Naqboytit nel akah tirtirissam mali. Boolatneh sugne'mmay, YALLI boola nee cabsiisele. Away diteh addat nani'mmay, YALLI noori nel oobisele.

⁹ Dambi lem bahneeh, tohuk gexxaamah YALLI nee yinqibeh. Tonna leemiik ta saaku usuk net aba digaala raabitnam nel tan. Macaay innek, YALLI ellecabol umaanek kalalu neh akkele. Sinam duma nel bahte umaaneh aftok neh amqele. Ditek iful nee ayyaaqele. Nee cateleeh, kay cato geenno.

¹⁰ Ni naqboytit aham isi intih ablele. Duma ‹YALLAY sin Dagelta kinnihiyya ankel yan?› axcuk suge maray Israayil marak naqboytiitih yaniih, nee qansarisak sugehiyyah nek gaca mara ken ablenno. Naqboytiitit kallah innah aaqitenno» iyyen.

¹¹ Yarusalaam maraw, Yarusalaam gasoosa nammeyhaak edde xisoonu waan wakti xayih. Too saaku sin baaxo kaxxa baaxo akkele.

¹² Sin mari elle suggu 'ye ikkek isi baaxo aduurele. Assuuriyah rasul yan mari isi baaxo fan aduurele. Masril tan ummat sin fan aduurele. Furaat weeqaytih qaxal yan mari sin fan aduurele. Xer ikkel yan badih qaxal yan mara kee, xer ikkel tan qaleelal yan mari inkih siinil aduurele.

¹³ Takkay immay too baaxooxa, teetil suge marih uma-taamak gexxaamah, bacari akkele.

YALLI ISRAAYIL MARAH XUWAAWEH

¹⁴ Ummat inteemih, «YALLAW, saqi-loynah innal, isi mara dacris. Isi maray isih doorittehiyya dacris. Nanu elle nanim garboh tan baaxo'mmay niqmatak tan baaxo dariifal nek tan. Dumî-dabaanal akah abak sugne innah, Basan kee Gilqad rasuy niqmatak yanihiyya fan genxeh caynay nee inxic.

¹⁵ «Masrik nee teyyeeqe saaku akah abte innah, uxih qagabah tanim neh abetto.

¹⁶ Doolatwa tah tabalu wayta saaku, faxe cayla luk sugtaamah niya keenik butukka 'teh, af kee aytil gaba heelon.

¹⁷ Abeesah innah cerriy axcuk ballaaqek bagul gexelon. Yallak aben meysih axaxitak, koositih bicsen-aroocak yewqeenih amaatelon. Aben meysih YALLAY ni Dageltah yanil aduurelon.

¹⁸ «Kok sa Yalli mayana. A saaku ku digaalak cattiime marah qafu abte. Akak aduure wayta naqabuh matanqiba. Amurruqe sinni kacanu nee taybulluyem koo ruffa hayta.

¹⁹ Ahak sarra isi racmattah neh racmatetto. Nanu abne dambit taqiteh badak iqiyal qidetto.

²⁰ Nanu akak radne ni kaxxa abbobtik axcihiiy Abraahim kee Yaqkuubuh duma culte xagana elle culte inna, nel mamakta, neh duudusetto. Isi kacanuy aggiriqe sinnihiyya nee aybulleetto» iyyen.