Miika 6 - NABUWWA KEE MALIKWA

YALLI ISRAAYIL MARIH YABTI-CINAT YAABE

¹ YALLI iyyam ankacisa. «Ugutaay, yi mari baahe umaanet marô-foocal yab! Qaleela kee koomam atu edde yabtam taabbay» yok iyya.

² Qaleelaw, baaxo daffeynah elle tan rakiiboy waartahiyyay, YALLI a mari baaheemik edde yaabam oobbeya. YALLI isi marak wayto le. Israayil marak malkitele.

³ YALLI iyyaamah, «Yi maraw, anu siinil baahem macaay? Anu siinil quuka elle ekkem manna? Siinil quuka elle ekke inna yoh warisay!

⁴ Masrik sin eyyeeqe. Edde sugten naqoosinnak sin kale. Muusa kee Haaruun kee Miriyam foocat siinik gacteh sin miraacissa'gidih, siinih ruube.

⁵ Baalak deqsita numuy Mooyab rasul amoytah yenehiyya siinih loowem, yi ummatey, kassa haay. Too malay siinih malseenihiyyal Baqor-Balqam kaal gacsem kaadu kassa haa. Tikible-Golo deqsita aracak Gilgal deqsita aracay elle yanfidigeenihiyya fan gexxan waqdi, gital siinit tekkem kassa haa. Toh kassa haytan waqdi, anu sin rooci wadu siinih abem kinniimit radetton» iyya.

YALLI NEK FAXAM MACAAY?

⁶ «YALLAY kulliimik daga raaqahiyya naqbude'gidih namaate waqdi, sadgatah gabat maca bahna? Sanatat yan mangassa cado akak carrisan sadgatah maay bahna?

⁷ Sadgatah illik mango alfi baaheey, qadad sinni zeytiy (saliidiy) caxâ-xaylok bicseeni kaah bahnaamah, YALLI ruffa edde maay iyya? Hinnay kaadu abne dambih kaqalsoh, naharsi-baxa, cado inkitanuuk akak cararisan sadgatah naceemih, YALLI ruffa edde maay iyya?» intan sin tekkek,

⁸ YALLI meqeemiy abtaanahiyya siinih warseh. Toh macaay inteenik, qadaalat le taamah taamittaanam siinik faxa. Aggiriqe sinni kacanu taalleenim siinik faxa. Rammitta inteenih Yalla kinni sin Dageltih gita kataata mara takkeenim siinik faxa.

⁹ Yallak meysita mari, kas gee mara. YALLI iyyeemih: «A magaalah mara kee a meelah maraw, axcem ankacisa.

¹⁰ Umeenitow, gita maliinot geyten duyye buxaaxih addal kibuk liton. Duyye makot yan miizaanal keexxan. Toh anu niqibiyo taama.

¹¹ Makot yan miizaan kee keexol duyye keexa marah qafu maaba.

¹² Siinik gadda leelah yan mari tu maleela yadlume. Takkeenimiik dirab leela kinniton. Sinam duquurussan.

¹³ Tohuk gexxaamah abuuruh sin cabbaay, bayissa sin haamih addat an. Toh akah abam, sin dambih sabbata.

¹⁴ Adoobittaanamah cayya m'intaanaay, satqa sin macabta. Abtaanam takkaleenim gabal siinik mabicta. Cattaanam takkalen duyye macattaanaay, carbit siinik bayseyyo.

¹⁵ Buqreh qidden darok murti morbissan. Caxâ-xaylok zeyti (saliid) bicsettoonu'mmay tu akak maxagtan. Qinab xaylok kamri bicsettoonu'mmay akak mataaquban.

¹⁶ Tah akah takku waytam, Malik Qomri kee kay baxa Malik Acab abak sugte uma-taamah amo tibbixeenimih sabbata. Tohuk gexxaamah sin bayseyyo. Sahda inkih sin ilaaqele. Kulli baaxoh mari qunxa intit sin ablele» iyye.