Miika 5 - NABUWWA KEE MALIKWA

¹ Yarusalaamey, qaskarak litom qeebih bical haa. Edde nee yabbixeenim marooy; Israayil malik caxxat yaaguren.

BAAXOH ABBA BEETLACAMAL AABUKELE

² YALLI iyyeemih, «Beetlacam Efratey, Yuudâ-rasul tan magaaloolik inkih qunxa magaala kinnito. Takkay immay Israayil ummat xiinisu waa abba ku addak ayyaaqeyyo. Kay samad dumaak ugteeh, dumî-dabaanaak migaq-gexxo le marak ten» iyye.

³ Barra lab-baxa xaltam fanah, YALLI isi marat darre cabele. Tohuk lakal marin baaxol keenik yan mari isi baaxo fanah aduureleeh, isi marat angalele.

⁴ Illit dacayrih yan loyni isi illi elle dacrisa'nnal, too abba YALLAK geya qandet baaxo xiinisele. YALLAY kay Dagelta kinnihiyya le hayba kaat gacele. Addunyâ-bagul yan mari kay nabna isinnih ablelon. Tonna leemiik kay mari amaanah xiinele.

⁵ Baaxoh amaan bahtem kaa. «Assuuriyah mari ni rasu yabbaxuh, qaskar edde tan megdebittek koroonu waan waqdi, ni miracway celeemah tanihiyya keenit ruubenno.

⁶ Too macaxi nee cateleeh keenik aysele. Nimrud elle suge Assuuriyah marih baaxo abbixeloonuh qande luk ken xiiniselon» [axcuk tirtirisa mari yan.] Takkay immay Assuuriyah mari baaxo nek yabbixe'gidih yemeetek, ken gabak nee waddam, YALLI ruubu waa abba.

SAABOH RAAQE MARI ABU WAAMA

⁷ Marin baaxooxal, mango marih addat yan Israayil maray saaboh raaqehiyya, YALLI ruuba naafi qayso akah doogisa innah, too marah tonnah doogiselon. Yalli ruuba rob coox akah doogisa innah doogiselon. Keenik dariifal yan mari barkat keenik geele. YALLA akke waytek sahdal kibaal mahannon.

⁸ Israayil maray saaboh raaqehiyya marin baaxooxal marin marih addat, lubookay garboh addat raarissa akkelon. Illi addat radde lubookah innah, maasayya maasayyah ken kuramkurelon. Too illi lubak afak cattam akah ane wayta innah, Israayil marak ta mara cattu waytam matana.

⁹ Naqboytiitit qeebi abay sella ken haa!

YALLIH CABSU KEE DIGAALA

¹⁰ YALLI iyyeemih, «Too ayro faaris siinik beeyyooh, faaris-gaariira kaadu siinik bayseyyo.

¹¹ Magaalooli siinik bayseyyo. Isin naqboyti culaamak hayten koosit inkih foyya abeyyo.

¹² Ama sicrih xagarat liton duyye siinik kaleyyo. Sarra takku waytam warissa kalluwalle kee ginnili siinik bayseyyo» iyye.

¹³ «Xeet kee cooxuk bicsen duyyey taqbudeenihiyya siinik bayseyyo. Xeetik bicsen qamidway yaqbudeenihiyya siinik bayseyyo. Ahak wadir isinni gabak bicissen duyye mataqbudan.

¹⁴ Aseera deqsittaamay yaqbudeenihiyyah astah heenih sugen gurumuuda ragidiik siibeyyo. Magaalooli siinik bayseyyo.

¹⁵ Tohuk lakal yi kaxxa bagcarrat, yi amri cinna hayte doolatway faxe baaxol yanoonay digaaleyyo» 'yaanam iyye.