Miika 4 - NABUWWA KEE MALIKWA

YALLIH AMAANA INKIH TAN ADDUNYA GUFELE

¹ Tamaatu wayta ayroorah addat YALLIH Qibaadah Qari elle yan qale kulli'kkek fayyah giffa axcele. Kulli qalek fayyah giffa luk raaqele. Kulli koomak fayyah giffa luk raaqele. Mango baaxol yan mari tet fanah amaatele.

² Baadal tan ummat too saaku intu waytaamah: «Qibaadâ-Qari elle yan YALLIH Qale fan nee beya» tittak axcelon. «Israayil ummat doore Dageltih Qari elle yan arac nawaqu wayna. YALLI tokkel isih faxem nee barsele. Usuk faxe gitat gexenno» 'yaanam axcelon. YALLIH baritto elle tanim, Yarusalaam magaalaay; Siyon qalek isi ummat lih yaaba.

³ YALLI baaxooxal yan tittin way bicsele. Kaxxa doolatway qande leh fanat bica abele. Qeebi edde abak sugen seefwa buqre edde aban biriitah gacselon. Qeebi edde abak sugen macaxu caxak luud edde yargiqen gileelah gacselon. Ahak wadir doolatwa gaaduh tittah magexxa; ahaysa qeebi tittat aboonuh masilaacsitan.

⁴ Kulli num isi buqre kee isi bustaanih garil amaanah xiineleeh; akak meysitaanam matan. Tah abtu waytaamih xagana cultem, YALLAY Nabaamak Nabahiyya.

⁵ Gersi baaxoh mari Yallih aftok gersim yaqbudeeh ken gita kataya. Neh tu gactek, kulli way YALLAY ni Dageltah yani aqbudennooh; kay yab aabbenno.

ISRAAYIL MARI MARIN BAAXOK ADUURELE

⁶ YALLI iyyeemih «Anu digaale maray fixiixit yaniih ceyah addat yanihiyya, edde gaaboysu waa ayro amaatele.

⁷ A mari aymiteeh, buxak yexxeere marah yaniini'mmay, meqe bica keenit abeyyo. Too mari kaxxa doolat akkele. Siyon Qaleh amol too ayrok wadir anu innih ummaan waqdi keenil ackumeyyo.

⁸ Siyon-qaley, duma akah sugte'nnal, yi marah reebu akkettooh; Yarusalaam dumaak akah sugte baaxok inaytâ-magaala akkele» iyye.

⁹ Yarusalaam maraw, kaxxa weeqah macah weqtan? Lacawat tan barrah innah macah iihissan? Malik aalle waytaanamah maay weqtan? Sin fayisak suge mari siinik rabeemih annah gactaanah?

¹⁰ Yarusalaam maraw, iihisa. Xalay edde xayyoowe barrah innah emreqeeqeda. Ahaysa magaalak awqettoonuuh, booxak bagul dabaaqah gacetton. Baabelon rasu sin beeloonuuh; tokkel cattiimetton. YALLI too rasul naqboytiitik sin wadele.

¹¹ Mango baaxoh mari siinit qeebi aba'gidih gaabooweh yan. «Yarusalaam qaybit raddam meqe; a magaala abuuruh raqtam nablem fanna!» iyyan.

¹² Toh iyya mari YALLI abam faxam mayaaxiga. Daro caffak elle meexaana'gidih inki aracal akah gaaboysan gurral, YALLI ken digaala'gidih ken gaaboysem mayaaxigan.

¹³ YALLI iyyeemih, «Yarusalaam maraw, gexay isinni naqboytit ibah iqita. Gayse birtak akak bicseenih, xukcuno nacaasak akak bicsen awurih innah qandeh sin heeyyo. Mango baaxoh marak qeebil aysetton. Oson umam abittot geen gaddaliino yoo fan baahelon. Anu YALLAAY; inkih yan baadal yan Goyta kinniyo» 'yaanam iyye.