Miika 3 - NABUWWA KEE MALIKWA

MIIKA ISRAAYIL ABBOBTI ILAAQEH

¹ «Israayilik abbobtih yan maraw, yoo ankacisa. Qadaalatat taamittaanam sin taamak tene'mmay,

² meqem niqbaah, umam kicna mara tekken. Yi marak arab nuwwih tayyaaqeeniih, lafâ bagul tan cado keenik kaltan.

³ Yi mara selteenih. Xagarak arab siibba keenik hayteeniih, lafa keenik butukka hayten. Buutil alaysan cadoh innah ken kitiften.

⁴ «YALLAL elle weqtoonu waytan wakti xayih, yemeeteh immay, too saaku YALLI too weeqa siinik moggola. Umâ-yabulih tanim abak sugteeniih, tohuk gexxaamah YALLI abtan dooqa siinik moggolaay darre siinit cabele» siinik axce.

⁵ YALLI sinam duquurussa nabuwwah farmo ruube. Oson guquluh lakqo keenih yecee marak, ‹Tu sin maxagtaay, amaanah xiinettoonu› iyyaanaah; lakqo keenil kalita marak, ‹Carbi siinit akkele› iyyan.

⁶ YALLI, hay, too nabuwwak iyyeemih, «Isin toh abta nabuwwak, sin wakti ahaysa xayyooweh. Laqô-bar siinil radele. Ummat yok gitak hoxisseeniih, tohuk gexxaamah tahaysa wacyi siinil mooba. Takku waytam wacyih matablan.

⁷ ‹Sarra woh akkeleeh, ah akkele› iyya mari iyyeemit wacarriyele. Anu ken yab moggolaay, tohuk gexxaamah qawratak radelon» iyye.

⁸ Nabi Miika iyyeemih, «Yoh tu gactek, YALLI isi Roocaaniyya dudda luk yol oobiseeh, isi qande yot hee. Qadaalatah tanim yoo yuybulleeh, Israayil mari aba dambit inti qasuk keenih edde warisa dudda yoh yecee.

⁹ Tonna'mmay, Israayil abbobtik, isin yoo ankacca haay, siinih warsam yok oobbeya. Isin qadaalat qansiisa mara hinniton. Gitah tanim makot abtan.

¹⁰ Yarusalaam Yallih magaalaay; away tet elle xissaanam, qabal-cayxi kee qadaalat sinna.

¹¹ Magaalah abbobti, siinik guqul keenih acinnaan marah, iyyan. Seeka Yallak temeete xinto, maalu keenih acinnaan mari elle faxa innal, barsan. Nabuwwa lakqo keenih yecee marah, takku waytam warsan. Too mari inkih arraabak too waqdi, «YALLI ne'lih yan» iyyan. «YALLI ne'lih yaniih, umaaneh net takkem mali» iyyan.

¹² Sin sabbatah Siyon-qale buqre elle takke booxah raaqele. Yarusalaam magaala abuuruh raaqele. Yallih Qibaadah-Qari elle yan qale garbo akkele» iyye.