Miika 2 - NABUWWA KEE MALIKWA

TU-MALEELAT XUKKUTAK SUGE MARIH ELLECABO FINQA

¹ Miika kaadu iyyeemih, «Deerih gacca 'yeh umam acsubuk xiina maraw, woyyow siinit takku waytaamow! Toh abtoonu duddaanamih sabbatah, maaci maacisa waqdi, xayih bar acsubuk xinten umaanet assan.

² Marin buqreh baaxo isinnih faxxan waqdi, le marak bukkoh beytan. Marin qarwa faxxan waqdi bukkoh beytan. Sinaamat xukkutak, midir kee ikoyta caylah keenik beytan» iyye.

³ Tohuk gexxaamah YALLI iyyeemih: «Anu too maral bala ruubam faxa. Anu ruubu waa balak num siinik macattiima. Kaxxa gadaamah gadaamitetton. Tahaysa kaxxiinah amo qaraanal haak magexxan.

⁴ Woo ayro siinit takkem yabalu waa mari qadar siinil abele. Iyyoonu waanamah, ‹Gaba kalleh, foyya nekkeh nan! YALLI baaxo nee waysiiseh yan; qaduwwi nek yan marah yecee› iyyaanam anqaasah siinik axcelon» 'yaanam iyye.

⁵ YALLI toh akak iyye mara kinnitoonuuh; tohuk gexxaamah, YALLIH mari baaxo kulli buxah marah kuru waa saaku, isin too baaxot afto manton.

⁶ «Isin ahaysa, a geysiisih mataqbina› yok iyya mari yan. «Yalli qaybik nee maqidak, ahamat mayaabin» yok iyyan.

⁷ «YALLIH sabri gaba kalem maay takkalee? Annah tanim abelem mannal kot celta?» 'yaanam yok iyyan. Yaqkuubuk rade mara kinnino iyya maraw, annah tanim intaanam mafaxxinta. Yalli tohuk siinik iyyeemih, «Cakkik tanim aba marak meqem axce.

⁸ Takkay immay isin yi marak naqboytit tekken. Ummat carbik isi buxa taduure waqdi, amaanah sugelem akkaluk yamaateeni'mmay, oson lon sartan bukkoh keenik beytan.

⁹ Yi marih agabuy isi buxa kicinuk sugehiyya le buxaaxik tayyaaqen. Ken xaylo daayiman yi maqaane akah gee wayta'nnah abtan.

¹⁰ «Tonna'mmay ahaysa a baaxol amaan mageytaanak, ugutay gexa. Isin abtan dambi a baaxo bayseh.

¹¹ A mari faxam dirab keenil yecee nabiy ken duquurusa. ‹Qinabak bicsen kamri kee kamri darah innah siinih caxitele› keenik iyya nabi faxan» 'yaanam siinil gacse.

BAATIK SAABOH RAAQU WAA MARA

¹² YALLI iyyeemih, «Israayil maraw, baatik raaqu waa mara inki ikkel gaaboyseyyo. Bar gasoh orbisan saqih innah tittal sin gacseyyo. Mangah, baaxol rob yan saaku mango qayso elle tooboke ikkel yaloole illih innah, gacetton» iyye.

¹³ YALLI gita keenih fakele. Magaala akak culan afa butukka heenih, num xagar keenik xage'kal gexelon. YALLAY keenik malikih yanihiyya isih foocat gacca 'yeh ken beele.