Miika 1 - NABUWWA KEE MALIKWA

¹ Yootam deqsita malikiiy Acad deqsita malik kee Ciskiyyaahu deqsita malik Yuudâ-rasul itta kataatak dardaaren saaku, YALLI Miika deqsita nabiy dabqih Moreset deqsitta magaalal yenehiyyal farmo ruube. YALLI too farmol Samaariya kee Yarusalaamat takku waytam kaa yuybullee.

YARUSALAAM KEE SAMAARIYA YASCASSE QADARA

² Ayyuntaw, ta yab oobbeya. Inkih yan baadal geytintam, ta yab taabbay, ankacissay. YALLAY Mulki le qaraanak sumaaqah siinil radele. Taahirik yan isi qarik YALLI sin lih yaabah yanik, usuk iyyam ankacisa.

³ Kudduusuk yan isi-aracak, YALLI yamaateh yanim kaa. Qaleelak amol oobele; qaleelal ibah gexele.

⁴ Yallih itqat too qaleeli, samqiiti-innah diyaayele. Too qaleelak ooba diyay, leeh innah daqar oobele.

⁵ Tah inkih akah takku waytam, Israayil mari edde ase dambih sabbata. Israayil mari Yallih yab cineh. A mara dambit asissem iyyaay? Keenik inaytah tan Samaariyah magaala. Yuudâ-rasul xeet kee cooxut aban qibaada ankeey? Yarusalaam magaala.

⁶ Tahih giddinaamak YALLI iyyeemih: «Samaariya hunah tan baaxoy qinab elle yaabukehiyya abeyyo. Taddigille qarwak radu waa xeet kee coox golot qideyyo. Qarwak rakiibo abuuruh raaqele.

⁷ Xeet kee coox kee biriitak bicsen duyyey aqbuduk sugeenihiyya riira akkele. Woo duyyeh qibaada elle aban qaril tan xiiqareh-xiinah yan agabuh acayuk sugen duyyet inkih gira gexele. Too yaqbuden duyyeeyah ceelo bayele. Woo duyye naqboytiitih keenik yan mari keenik beeleeh; too duyyey beenihiyya isinni yallitteh ceelo elle yaqbuden qarwal tan xiiqareh-xiinah aceelon» iyye.

⁸ Miika iyyeemih, «Tahamay siinit takku waytahiyyah sabbatah, anu rookat an, siinih qaadah. Siinih qaadaah, rookitam yok elle taaxagoonuh, ibqasih gexeyyooh, qasunuk baaxo meekiteyyo. Goroyyah innah kak axceyyo. Wakrih innah wiq axceyyo.

⁹ Samaariyah mara yabbaxu waa biyak, caba biyak hinna. Yuudâ mara kaadu too bis le biyak abbixele. Baati yi mari elle yan Yarusalaamak culma gufele» iyye.

NAQBOYTIT YARUSALAAMAT XAYYOWTE

¹⁰ Miika kaadu qagseh iyyeemih: «Filistiin mari elle yan Gat deqsitta magaalal xaagu mawarsina. Abtan weeqa isinnik able kala. Beetal-qafra deqsitta magaalah maraw, siinit takku waytaamah rookitay gomboduk bagul omborooroka.

¹¹ Saafir deqsitta magaalah maraw, qasunuk gacca inxicaay qaybik isinni qidak, baaxok inkiliqa. Daanan magaalal yan mari elle yan magaalak mayawqa. Beet-Eedal magaalal yan mari booget yaniih, cato siinih mayakka.

¹² YALLI Yarusalaamal bala oobisu waa saaki yoofeh yan. Tohuk gexxaamah Maarot magaalal yan mari maqaaneh raksitaana'mmay waaga kee cisaabat yanin.

¹³ Laakis magaalal yan maraw, faarisit gaari xakabaay, edde kuday isillima. Israayil mara abah tublen dambi ken kataatak abteeniih, Yarusalaam mara dambit asissen.

¹⁴ Tahaysa Moreset-Gat deqsita mandarak salaamata inxica. Israayil amoytitte Akdib deqsitta magaalak cato mageyan.

¹⁵ Maresa deqsitta magaalah maraw, YALLI naqboytiitih siinik yan marih gabal sin heeleeh; too mari magaala siinik abbixele. Israayil makaabonuy kaxxa migaq gexxo luk tenehiyya Qadullam deqsita aracal tan gablah addat ambooqorelon.

¹⁶ Yuudâ maraw, kicinuk tenen xayloh rookah amo isinnik moola. Xaylo siinik seewah beeloonu'mmay, ken rookah gaali-gumah amoh innah moyya isinnik muxcah aba.