Malaaki 3 - NABUWWA KEE MALIKWA

¹ YALLAY Nabaamak Nabahiyya siinik iyyaamah, «Gita yoh bicsa'gidih, inni farmoyta ruubeyyo. Tohuk lakal isin faxak sugten YALLI garciik isi Qibaadah-Qari amaatele. Isin assexeeruk sugten farmoytay yi qahdit yaabu waahiyya amaatelem digga le.

² Takkay immay usuk meqe saabun wasak elle kala'nnaay, giray birta tasiffiye innah amaatele. Tonna leemiik usuk yamaatu waa waqdi, iyyi sugam duudaa? Usuk yamballayu waa waqdi, kay foocal iyyi soolam duudaa?

³ Lakqo kee dahab edde yasiffiyen girah innah, umam kee meqem tittak asiffiyuk amaatele. Dahab kee lakqo bicsa num girat asiffiyuk akah bicsa'nnah, Yallih farmoyti yamaatu waa saaku, Leewih yooboke mara tonnal asiffiyele. Too saaku too mari, YALLAH gitah yan sadgat abele.

⁴ Yuuda kee Yarusalaam mari dumaak elle abak suge innal, Yallah sadgat abeloonuuh; YALLI kaadu dumaak keenik elle oggolak suge innal, keenik oggolele» iyye.

⁵ YALLAY Nabaamak Nabahiyya iyyeemih, «Anu sin mekla'gidih sin adda amaateyyo. Amaate saaku baab abaah, dalwa abaah, diraabah sumaaqitaah, taamâ-marah cawal kalitaah, gubun kee qayxiixaa kee allî-baaxoh maray ken addal yanit xukkuta maral inkih ackumeyyo. Too mari inkih, yok meysite waa mara.

⁶ Anu YALLA kinniyooh; inni cal makorisa. Isin kaadu Yaqkuubuk rade mara kinnitoonuuh; isinni cal makorisinniton» iyye.

DAKAATA

⁷ YALLAY Nabaamak Nabahiyya iyyaamah, «Siinik duma sugte sin kaxxa abbobtik kaxxih, anu siinih oobise xinto cinteeniih, isinnih faxxen gita kattatten. Maabina yol uduura, siinil aduureyyok. «Isin, ‹Yallal naduuruh maca abnooh?» intan.

⁸ «Anu, hay, kaadu siinik axcem liyo. Yok tu garqaanam bictaa? Mabicta'mmay, isin tu yok garaqtaanah. «Isiniiy, ‹Maca kok garaqna?› intan. «Dakaat duyye kee sadgatah yaceen duyye yok garaqtan.

⁹ Inkih tan baaxoh maraw, akak garaqtaanam yoo kinniimih sabbatah, abaaro siinil oobise.

¹⁰ Away yi Qibaadah-Qaril niqmat akah yamagge innah, dakaatak tu cabe'kal baahaay, Qibaadâ-Qaril hayisa. Too duyye Qibaadâ-Qari bahteenik, qaran afoofi fakka heeh, amqinnaan niqmatay qadad sinni siinih ruubeyyom able liton. Toh siinik intam yoo YALLAY Nabaamak Nabahiyya.

¹¹ Tubquren daro qanayti-gadda akki siinik maha. Qinab xala cooxih ludwat qinab tiqu luk aabukele.

¹² Toh yabalu waa maray kulli baaxol yanihiyya, ‹A mari ruffa ye mara, oson elle yanin baaxo meqe baaxoy dabaaqah elle gaceh meqe› 'yaanam axcelon. Tah intam yoo YALLAY Nabaamak Nabahiyya» 'yaanam iyye.

YALLI KIBAAL KAAL HAA MARAH GALTO ACEELE

¹³ YALLI iyyeemih, «Ummatey, ceele waytam yok intan. Ceele waytam inxicca teenih wadir, ‹Kot ceele waytaamay sittak innehiyya macaay?› intan. Yok inteenim siinih warisu waa.

¹⁴ ‹YALLAY Nabaamak Nabahiyya yaqbudeenim xiqtam mali. Usuk aba iyyem abaanam kee, Yallaw umam bahne 'yeenih weeqaanam xiqtam mali. Tu kaak magennino› intan.

¹⁵ ‹Tahaysa farcaanak tanim, kaxxiina le mara axcenno› intan. ‹Uma taamat asa mari gaddalitte yakkeeh; Yallal saduh gaca marat takkem matan› intan» iyye.

¹⁶ YALLIH meysi le maray kaa yaynabehiyya ahamat titta lih yaabeeh; YALLI ken yab ankaciseh, ken yab yoobbeh. Tohuk gexxaamah Yallih garil too marih migaq Yalli kassitih maktuubuk yabbixe.

¹⁷ YALLAY Nabaamak Nabahiyya iyyeemih, «Too mari yi mara. Anu gaba qidu waa saaku, too mari yi intit fayya le mara akkeleeh; abba isi baxay kay yab yoobbehiyya akah racmata innah, anu too marah racmateyyo.

¹⁸ Tonnal anu uma maray yi yab cinahiyya kee meqe maray anu aba axcem abahiyya tittak ken elle baxsa'nna abletton» iyye.