Malaaki 2 - NABUWWA KEE MALIKWA

^1-2 YALLAY Nabaamak Nabahiyya kaadu seekak iyyeemih, «Hay taway seekay, siinik axcem oobbeya. Abba haytaanam inkih yoo edde aynabuk aba. Yi amri oggole wayteenik, bala siinil ruubeyyo. Barkat sin waysiiseyyo. Nummah, barkat sinna siinil ruubeh an. Sin akah abaarem, yi amri nagay oggole wayteenimih sabbata.

³ Siinik radu waa mara digaaleyyo. Ama sadgatah qiddan saqih gudaaqe foocat siinik duugeyyo. Guddaafa elle qidan aracat sin qideyyo.

⁴ Toh siinik akah axcem, Leewik rade maray seekah yanihiyya lih heeh suge xagani tohuk wadir digga iyya'gidi. Too saaku toh aaxigetton. Tah intam yoo YALLAY Nabaamak Nabahiyya.

⁵ «Leewik rade mari yoo yassakaxxeeni'gidih, ken kee yi fanal yan qahdil meqe mano kee amaan keenih aceeyyoomuh qahdi keenih cule. Tohumuu, qahdi keenih akah culem keenih eceeh. Oson kaadu woo saaku yoo aynabukuuy yok meysitak yenen.

⁶ Woo dabaanal sahda dirab hinna'mmay, numma ken barisak yenen. Yo'lih meqe innal gexsitak yenen. Mango maray makot gexa yubleenik, meqe fayuh ken fayisakaay, meqe taama fanah akah yaduuren innah keenik abak yenen.

⁷ Nummâ-gita ummat barsaanam, seekal tan taama. Seeka yoo YALLAY Nabaamak Nabah yanihiyyah fayxi ummat barsaana'gidih, ummat keenil gexxam faxxinta. Seeka yi farmoytiitiy yi farmo ummatah warissa kinnon.

⁸ «Tonna'mmay seekay, isin ta saaku cakki gitak tewqeeniih, isin sinam barissan qilmi ummat makot beyam baahe. Anu sin lih haysite qahdi makteenih.

⁹ Yi amri cine mara tekkeeniih, yi mara barissan waqdi, inki intit ken maballitoonuuy; tohuk gexxaamah Israayil marih intit, bura le mara sin abeyyo. Tah intam yoo YALLAY Nabaamak Nabahiyya» keenik iyye.

UMMAT YALLAL LUK TEN IMAAN CABTEH

¹⁰ Malaaki iyyeemih, «Ni Abbay nee doorehiyya inki Dagelta akke maay waa? Nanu inkih inki abba linom neexegek, hay, innem tittal akah maknam macaay? Toh abna waqdi, Yalli ni kaxxa abbobti lih abe xagana makna.

¹¹ Yuudâ mari Yalla lih luk sugen xagana makeeniih; Yarusalaam kee inkih yan rasul ibak-gibdi umaane aben. Ken labha allî-baaxoh agabuy xeet kee cooxuk bicsen duyye yaqbudehiyyat rihimak, YALLI kicna isi Qibaadah-Qari nadaasa aben.

¹² Tannah taniimit asah yan num kee kay buxah mara inkih, YALLI ni addak kalay. Ta mari, ni mari YALLAY Nabaamak Nabahiyyah abah yan sadgatat gaba assagalle woonay.

¹³ «Tohuk kalah abtaanam liton. Toh macaay inteenik, abtan sadgat YALLI siinik oggole weem tablen waqdi, kay sadgat elle aban aracal weqtaanah ximo caxxan. ‹YALLI ni sadgat cineh› axcuk kaxxa weeqah weqtan.

¹⁴ ‹Macah nek cinah?› intan. Hay anu siinih warisu waa. Isin furrayniinol elle digibten agabuy sin kacnoytiitih yanihiyya cabba hayteenih, ken lih luk sugten Yalla-kee-xagana makteeniih; YALLI abtan sadgat siinik akah cinam tohu.

¹⁵ Yallal baguuk yaamine num tonnah tanim maaba. Yallih fayxi macaay inteenik, Yallal yaamine num xale xaylo, Yallal baguuk yaamine mara takke'gidi. Tahaysa furrayniinol elle digibten agabu lih liton Yalla-kee xagana make waytaanama. Tahal digga 'xica» iyye.

¹⁶ YALLAY Israayil doore Dagelta kinnihiyya iyyeemih, «Anu ginnaaqot lon agbih cabti maxiqa» iyye. «Siinik numuk teeni isi barra cabam kee, num racmatta sinnak gersi numut qeebi abam inki intit able. Tah intam yoo YALLAY Nabaamak Nabahiyya» 'yaanam iyye. Tahaysa aamanti sinni mara hinna'mmay digga le mara tika.

COKMI EDDE YAKKU WAA AYRO XAYIH

¹⁷ Qagseh kaadu keenik iyyeemih, «Yabtan yaabat YALLA taqbisseenih. «Too waqdi ‹Afak nanu YALLA mannal taqbisneeh?› intan. « ‹YALLI umeynit meqe mara yakkaleeh; keenit ruffu iyya› intan. Waqdik teena kaadu, ‹Yallay qadaalat leh akak iyyaanahiyya ankel yani?› intan» iyye.