Malaaki 1 - NABUWWA KEE MALIKWA

¹ YALLI Israayil marah Malaaki deqsita nabil ruube farmo ah teeti.

YALLI ISRAAYILIH LUK YEN KACANU

² YALLI iyyeemih, «Yi maraw, anu kulli way sin kiciyyoh» keenik iyye. Oson kaal gacseenimih, «Nee tikcinem mannal kok naaxige?» iyyen. YALLI too waqdi keenik iyyeemih, «Qiiso kee Yaqkuub toobokok ten. Takkay immay Yaqkuub kee kaak rade mara ikcineeh,

³ Qiiso kee Qiisok rade mara inqibe. Qaleela luk ten Qiisô-baaxo bayseeh, wakarwa dabaq abe» iyye.

⁴ Qiisok rade maray migaaqah Edom deqsitahiyya, «Ni magaalooli baateh immay ahak sarra tet xisenno» iyyaanam takkeh immay, YALLAY Nabaamak Nabahiyya keenik iyyaamah, «Xisaanamah wadir bututtukku keenik heeyyo. Ummat keenik intu waytaamah, ‹Edom-mari makari leela; YALLIH naqbi ken amok makata› axcelon».

⁵ «Israayil mari tah isinni intih ablelon. Too waqdii, ‹Nabna lem YALLAAY; isi qande Israayil rasu dibuk hinnaay, Israayil baaxok kalih baaxol kaadu yaybulleeh yan› 'yaanam axcelon» iyye.

YALLI SEEKA YESSECEKKEH

⁶ YALLAY Nabaamak Nabahiyya seekak iyyeemih, «Siinik axcem oobbeya. Baxi abba yassakaxxeeh; saq-duwayti akah taamita num yassakaxxeh. Hay, anu abba siinik kinniyok, macah yoo assakaxxe waytan? Sin Dagelti yoo kinni way macah yoo assakaxxe waytan? Seekay, yoo bursuttam siini. «Takkay immay isin, ‹Nanu koo elle bursunnam mannaay?› intan.

⁷ «Hay, tonnal yoo elle bursuttan inna siinih warisu waa: yoh sadgat elle abtan aracal caraamak yan sadgat abtan. «Tohuk wadir, ‹YALLAW, toh abnek, koo manni'nnal bursutna?› 'yaanam intan. Yoh sadgat elle aban aracat abtan bura, yoo assakaxxe waytaanamah orobta.

⁸ Inti sinni saqaay, ibak kos iyya saq kee dalka edde radde saq yi sadgatah bahtan. Hay, toh qellat hinnaa? Toh yot abten bura hinnaa? Baaxok abbah yan numuh wonnah yan lac ucuyay ruffu edde yan keh ablettoonuk! Tonnah yan lac kaah bahteenik, siinik mayakcina; faxxeenim siinih maaba» iyye.

⁹ Hay, taway seekay, tannah yan sadgat kaah ucuyak, «Yallaw, neh emeq» 'yaanamih dooqa abtan way, Yalli siinih mayamqa! YALLAY Nabaamak Nabahiyya isih, «Siinih mamqa» siinik iyya.

¹⁰ YALLAY Nabaamak Nabahiyya iyyeemih, «Yoh sadgat elle abtan aracal tu xiqe sinni gira urussaanamak, gira akah uruse waytan innah, qibaadah qarih afoofi siinik alfa num geenniyoy faxe raare. Isin abtaanam ruffu yoo mahaytaay; sin sadgat moggola.

¹¹ Addunyak ayrô-mawqaay ayrô-culma takke baaxol yoo yaynabe mari kibuk yan. Kulli ikkel dooqa aban waqdi, qaydarus qeerisakaay, ceelah yan sadgat abak yoo yaqbuden. Baadal tan ummat yoo taynabe.

¹² Siinih tu gactekiiy, isinni nabsih faxe waytan maaqo bahha haytaanaah, yi sadgat elle aban aracay sin intit bura lehiyyal sadgatah taceen. Qaybik qiddaanam yoo.

¹³ Afak too waqdi, ‹Nanu ahak taqabneh› axcuk, anu siinih ecee taama maaqiltaanah. Tohuk gexxaamah yi sadgatah garaqten lac akkiiy, ibak kos iyya lac akkiiy, hinnay kaadu dalka edde radde lac akki qiddan. Hay, yoo YALLAY Nabaamak Nabahiyya woo saq siinik oggolam maay siinit celtaa?

¹⁴ Yi sadgatah yaguude nagay yan lac allih, ‹Too lac sadgatah aceeyyo› axcuk, xagana yoh culek sarra, ayma le saq baahaah yoo duquurusam yakkale numul yi abaaro oobele. Addunyâ-malik yooy; baadal tan ummat inkih yok meysitta. Tah intam yoo YALLAY Nabaamak Nabahiyya» iyye.