Makaabon 8 - NABUWWA KEE MALIKWA

DEBAC KEE XALMUNNA

¹ Tohuk lakal Efrayim mari Gidqoonuk iyyeemih, «Atu Miidiyan mara lih qeebi abta'gidih gexxe way, neh macah seece wayte? Annah tanim nel akah bahtem macaay?» axcuk kaxxam kaa yessecekken.

² Usuk too waqdi keenik iyyemii, «Anu abem isin abteenimih gide takkem hinna. Isin inkih yan Efrayim marak abteenim, ni mari yakkeemiik abeemik fula le.

³ Yallih caylah woo namma Miidiyan abbobtiy migaaqah Qoreb kee Deeb deqsitak tenehiyya qiddem siini. Anu woo gid takkeemih maca abe?» keenik iyye. Usuk ah keenik iyye waqdi, abeenih sugen bagcarrak afqado keenik xamacca 'te.

⁴ Too waqdi Gidqoon kee woo sidiica boolih num Ordon weeqaytuk woo qaxa fan tabeenih yenen. Too waqdi cawaleenih yeneeni'mmay, uxih naqboytit lakak ayradduk yenen.

⁵ Sukkot deqsita arac gufen waqdi, Gidqoon woo magaalah marak iyyeemih, «Sinam yok cawalteh qululteh tanik, sin maganak a marah gaqambo telleenik ken yoh waday; akah genxam, Debac kee Xalmunna deqsita namma malikiy Miidiyanah yoobokehiyyah gaaduuy; nibbixeh ken bahna'gidih genxa'mmay gaqamboh tu telleenik, a mara yoh wada» iyye.

⁶ Too waqdi Sukkot-abbobti kaal gacisseemih, «Ahaydumah abbixe'kal tan Debac kee Xalmunnah, away ku qaskarah gaqambo nee essertaa?» kaak iyyen.

⁷ Too qangaral keenil gacsemii, « ‹Meqeh hay maca le! YALLI Debac kee Xalmunna yi gabal hayu waa saaku, keenan kee tiqir le coox tu elle ane sinni ardik bahha heeh, sin aagureyyo» keenik iyye.

⁸ Sarrak Fanyel fan bisoh gexeeh, wokkel suge marak kaadu woo marak iyyem iyye. Takkay immay too mari kaadu, too Sukkot-mari kaak iyyem kaal gacse.

⁹ Too way keenik iyyemii, «Iisa luk adaaru waa saaku, amo xer qari siinik bututtukka heeyyo» keenik iyye.

¹⁰ Debac kee Xalmunna, Karkor deqsita aracal isinni qaskar lih yenen. Woo ayrô-mawqa le kabuk temeete qaskarak taban kee koona alfih num elle raqte. Bool kee labaatanni alfih qaskariiti rabeh.

¹¹ Gidqoon, Nobac kee Yogbaha deqsitta aroocak ayrô-mawqa le kabul yan gitay arho edde gacak gexehiyya katayak, ken qaskaray cube waak sugtehiyya garciik yibbixe.

¹² Too waqdi Miidiyan marih namma malikiy Debac kee Xalmunna deqsitak tenehiyya kuddeh. Takkay immay Gidqoon lakak ken yeyreddeeh sarrak ken yibbixe. Toh tuble waqdi ken qaskar abtam waagisseeh, inkih qaxxaagiteenih.

¹³ Gidqoon qeebi-booxak Ceres deqsita daabaak amaatuk suge waqdi,

¹⁴ Sukkotuk yemeete numuy furraynuh yene yibbixeh, essero kaat abe. A num Sukkot-makaabonuk malcina-taban kee malcina numih migaq yuktubeh kaah yecee.

¹⁵ Sarrak Gidqoon woo Sukkot mara fan gexeeh keenik iyyeemih, «Duma maaqo qaskarah yoh cinteenim maay kassittan? Debac kee Xalmunna abbixe'kal, qaskaral maaqo yok kalitteenih. Yi qaskar tecleh tene'mmay, Debac kee Xalmunna away baaheh an» keenik iyye.

¹⁶ Tohuk lakal keenaani kee tiqir le coox tu elle ane sinni ardik bahha heeh, woo Sukkot-makaabon edde yoogore.

¹⁷ Sarrak Fanyel deqsitta magaalal yen amo xer qari keenik yiggileeh woo magaalal ten labha qide.

¹⁸ Tohuk lakal Debac kee Xalmunnak iyyeemih, «Taabor deqsita aracal qidden marih xaagu baahay» keenik iyye. Osonuuy kaak iyyeenimih, «Too mari koo ceelak yeneeh; kulli num keenik malik baxih ceelo luk yen» kaak iyyen.

¹⁹ Gidqoon too waqdi keenik iyyeemih, «Too mari yi toobokooy, yi-ina yo'lih xalte xaylo. Waara-YALLIH migaaqal xiibitah ani'mmay; ken qide'kal sugtaanamal, a saaku sin wade raare» keenik iyye.

²⁰ Sarrak Yeter deqsita kay baxay barah xaylok nabuk yenehiyyak, «Gexay ken qid» iyye. Awkiiy bar qunxuk yeneeh, namma kalbiteeh seef masiibinna.

²¹ Too waqdi Debac kee Xalmunna Gidqoonuk annah inte. «Labhâ-taama abtam labhaytuk, amay isih nee qid» kaak iyyen. Too waqdi Gidqoon ken qideeh; ken gaalih fillat bilqah heenih sugen bilâ-duyye beeh.

²² Sarrak Israayil mari Gidqoonuk, «Miidiyan marak nee catteeh; tonna-leemiik atu ni amoyta tikaay; ku lakal kaadu ku baxa kee ku baxih baxa ni amoytit akkele» kaak iyyen.

²³ Usukuuy keenik iyyeemih, «Yoo kee yi baxak sin amoyta num mayakka. Sin amoyti YALLA» keenik iyye.

²⁴ Qagseh kaadu keenik iyyeemih, «Anu inki tiya sin esseru waak: ama beyten aytî-dahooba baahay» keenik iyye. Miidiyan-mari Ismaaqilik rade maraay; aytî-dahooba luk yenen.

²⁵ Osonuuy, «Meqeh, kol gacsenno; koo manakeelefa» kaak iyyen. Sarrak saro fidissa heenih kulli numuuy keenik beeh suge aytî-dahab woo saroh bagul qide.

²⁶ Oson too waqdi, qax-meqe duyye kee fillat haan bilaay woo Miidiyan malikwa luk ten qasdiimin sara kee gaali fillat luk yen bilâ-duyye sinnim, Gidqoonul yeceen aytî-dahab dibuk labaatanni kiilo yekke.

²⁷ Sarrak Gidqoon woo dahabak rikek tan ceelo bicissi heeh isih elle yooboke Qofra deqsitta magaalal hee. Sarrak Israayil mari Yalla cabeeniih woo ceelo yuqbuden. Taham Gidqoon kee kay buxah maral edde radoonu waan ofloh innah tanim tekke.

²⁸ Miidiyan mari qeebil Israayil marak gaceeh; tohuk wadir gandi keenil akkuk maraaqinnon. Gidqoon rabba 'yam fan woo baaxol morootom karmah gide wagri gace.

GIDQOON BUXAH MARA KEE RABA

²⁹ Gidqoon isi baaxo yuduureeh wokkel elle yeede.

³⁰ Mango agabu luk yeneemih sabbatah, xaylok malcina-tabanih gide luk yen.

³¹ Seekem deqsita aracal kaadu sirriyya elle yabbixe barra luk yen. A barra lab-baxa kaah xalte. Woo awkak migaaqah Abimalik iyye.

³² Yoqas baxi Gidqoon idoolite saaku rabeeh; kay abbay Yoqas deqsita elle yoogoqeenih sugen aracal kaa yoogoqen. Woo magaq elle yekkem, Qofra magaalaay; Qofra, Abiqeder kedoh mari elle yen magaalak ten.

³³ Gidqoon rabek lakal, Israayil mari Yallal luk yenen imaan dumak kaxxih kaadu agaaguluseenih, Baqal deqsittam yuqbuden. Bica-edde-aben-Baqal yallah haysiten.

³⁴ YALLAY ken Dageltah yaniih kulli naqboytiitiy marot ken abbaxuk sugehiyyak ken catehiyya cabeenih.

³⁵ Gidqoonuy woo gid takke maqaane inkih keenih abehiyyah buxâ-marah galto magacsinnon.