Makaabon 7 - NABUWWA KEE MALIKWA

GIDQOON MIIDIYAN MARAK QEEBIL YEYSE

¹ Gidqoonuy Yarubbaqal yaaxigeenihiyya kee, kay mara inkih, yakkeenimiik maaca ugutta 'yeeniih Carod-buyyih garil yinfiddigen. Miidiyan mari keenik kilbat le kabut raaqa daqaaray Moore deqsitta koomak garil yanihiyyal gacen.

² Tohuk lakal YALLI Gidqoonuk iyyeemih, «Atu lito mari mangoh; a axxul le mari inkih carbit engellaay woo carbil eessa iyyeh ken tekkek, isinni mangah geen iisa keenit ceelele ikkal, anu keenih ecee iisa keenit maceltaay; galto yoh elle magacsan.

³ Tonna-leemiik keenik intaamah, ‹Nanu a Gilqad qalel elle aadenno'mmay, meysita num siinit yenek, wadirih isi buxa fan yaduuray› keenik inxic» iyye. Usuk toh keenik iyye waqdi, labaatanna kee namma alfih num yuduureeh; tabna alfih num elle raaqe.

⁴ Tohuk lakal YALLI Gidqoonuk iyyeemih, «Uxih sinam kok mangohuk, lee elle tani'kke fan ken beyaay; anu wokkel ken koh tittak baxseyyo. Anu ‹Ama num ko'lih gexay xic› akak axce num ko'lih gexay inxicaay, ‹Ama num ko'lih gexe waay› akak axce num isi'lih gexe kal» kaak iyye.

⁵ Tohuk lakal Gidqoon woo mara lee fanah beeh; YALLI too waqdi kaak iyyeemih, «Lee gabal yaaqube mara kee, gulubuh gacca 'yeh afah elle radeh yaaqube mara tittak baxis» kaak iyye.

⁶ Tokkel lee gabah kumusak yooqobe mari sidiica boolih gid yekkeeh; raqqa 'ye marah tu gactek, yakkeemiik gulubuh gacca 'yeh afah elle radak yooqobe.

⁷ Too waqdi YALLI Gidqoonuk iyyeemih, «A sidiica boolih numuy lee gabah kumusak aaqabuk sugeenihiyyah gabat, Miidiyan marak sin aysiiseyyok, raqqa 'ye marak inkih buxah uduura inxic» iyye.

⁸ Too waqdi Gidqoon woo sidiica boolih numuk kalih mara buxah ruube. A sidiica boolih num, woo mari gabat luk suge sakayi kee *baantooti keenik raaqisen. Miidiyan mari, oson elle yanin aracak gubat raaqa daqaaral yinfiddigen.

⁹ Too bar YALLI Gidqoonuk, «Ugutaay gexay qeebi keenit abay; elle yanin arac keenik ibbix. Anu keenik koo aysiiseyyok» kaak iyye.

¹⁰ «Takkay immay ken tabbixeemik meysittek, oson elle yinfiddigen ikke fan, koh taamita numuy Fuura deqsitahiyya luk gex.

¹¹ Tokke guftu wayta waqdi oson iyyaanam aabbettooh; too waqdi mameysittay niya kot gaceleeh, ken abbixetto» kaak iyye. Tonna-leemiik Gidqoon kee kaah taamitak yen Fuura, naqboytit elle tan arac fan gexeeniih; garih akak amma 'yen.

¹² Miidiyan kee Qamaalek kee ayrô-mawqa le kabu ten baaxol eneyya 'ya mari, woo daqaarih addal, mangah qanayti gide akkuk yeneeh; kulli'kkel cakakka 'yen. Baddi-afal qiddeyti mangah yakkeh gide yakke gaala luk yenen.

¹³ Gidqoon wokke gufe waqdi, kataysa, isi kataysah soono warisah yoobbe. Woo kataysa kataysak iyyemii, «Gabru deqsitta darok bicsen gaqamboyta kombobbolitak amma 'teh elle nanfiddige aracal yan siraaqal radde. Too waqdi woo siraq qanxixeeh baaxok bagul deerih rade» kaak iyye.

¹⁴ Kay kataysay woo soono akah warse kaak iyyemii, «Wohuu, Israayilih yooboke Gidqoon deqsita numih seefi. Tohu'kkal, gersim makkalin. Yoqás-Gidqoon seef kinni. Yalli Miidiyan mara kee inkih tan ni qaskarak kaa yiysiiseh yan» axcuk, soonok maqna kaah yifdige.

¹⁵ Gidqoon a numih soono kee woo soonoh maqna yoobbe waqdi, gulubuh gacca 'yeh isi Dageltah candu gacse. Tohuk lakal Gidqoon woo Israayil mari yinfiddige ikke fan yuduureeh iyyeemih, «Uguta! Uguta! YALLI Miidiyan-marak sin yiysiiseh yanik uguta» axcuk anay fayya haak yaabe.

¹⁶ Too waqdi isi maray sidiica bool yakkehiyya sidiica ikkel kurra heeh, sarrak kulli numuh *baanta kee, addat ifoyti akak yan buuti yecee.

¹⁷ Tohuk lakal keenik iyyemii, «Anu, woo oson elle yinfiddigen aracak gari maada waqdi, anu abam wagitaay, toh aba.

¹⁸ Yoo kee yo'lih yan marak kulli numuy isi baanta nek yaagure waqdi, isin kaadu, woo oson elle yinfiddigen ikkek dariifaak, kulli num siinik isi baanta yaaguray. Too waqdi, anay fayya haak, ‹Ah YALLA kee Gidqoon cormatah abna carbi› inxica» keenik iyye.

¹⁹ Gidqoon kee kay mara barak gudet xayi waqla, woo dacayrih sugte qaskar dacayri aracak kattek sarra dagoom sugeenih, woo mari elle yinfiddige aracat xayyoowen. Tohuk lakal baanta yoogoreeniih woo buutittey gabat luk sugeenihiyya yiggiggileenih.

²⁰ Aki namma butta kaadu too oson abeenim abte. Sarrak yakkeenimiik guri gabat ifoyta heeniih migdi gabat baanta luk, anay fayya haak, «Ah YALLA kee Gidqoon seefi!» iyyen.

²¹ Kulli num keenik woo mari elle yinfiddige aracih deraafil soolol gace. Too waqdi taaxige-mari yakkeemiik deero abak kuden.

²² Gidqoon mari yakkeemiik sidiica boolih baanta yoogoren waqdi, YALLI, Miidiyan mara qeebi tittat ken yuyfukuneeh, seefit titta qiden. Too mari tokkeek aben kudmah, Dareeda deqsita rasuk Beet-Sitta deqsitta magaala kee, Aabil-Macoola deqsitta magaala dariifal tan baaxoy Tabaaqot deqsitta magaalat xayuk raqtahiyya fan yoowwen.

²³ Tohuk lakal Naftaali kee Aaserih yooboke mara kee Manassê-kedok namma exxa elle tan baaxoh inkih seeco abeeniih; oson too waqdi Miidiyan mara lakal ayradduk xiiriyya heen.

²⁴ Too waqdi Gidqoon, Efrayim baaxok qaleela mango rakaakayal tan Efrayimih yooboke marah farmo ruube. Keenik iyyeemih, «Miidiyan marat qeebi abtaana'gidih ama. Ordon weeqaytuk Beet-Baara fan, lee le arooca inkih tabe ken kaltaana'gidih, amaay qeebi keenit aba» 'yaanam keenih ruube. Inkih yan Efrayimih yooboke marih seeco abeeniih; too seecol Efrayim mari Ordon weeqaytuk Beet-Baara fan enna 'ya lee le arooca yibbixen.

²⁵ Too gaadul Miidiyan abbobtih nammay yibbixen. Too namma abbay yibbixeenihiyya migaaqah Qoreb kee Deeb deqsitak yenen. Qoreb deqsita num Qoreb-xixxaqih garil qiden. Deeb kaadu qinab kamri elle bicsan Deeb deqsita aracal qiden. Miidiyan mara lakak ayradduk baaxo cabsiiseeniih; Qoreb kee Deeb moyya irgiqqa heenih Gidqoon fan baahen. Usuk too waqdi Ordon weeqaytuk ayrô-mawqa le kabul keenih suge.