Makaabon 6 - NABUWWA KEE MALIKWA

MIIDIYAN-MARI ISRAAYIL MARAT XUKKUTE

¹ Israayil mari fiirik geerah dambi lem YALLAL baahen. Tohuk gexxaamah YALLI malcina sanatah Miidiyan-mara abbootanah amol keenik hee.

² Miidiyan mari caylah Israayil marak lafitak yen. Tonna-leemiik Israayil mari qaleeli-amol gabla kee kalah tan aroocay amô-reebu let yombooqoren.

³ Israayil mari buqreh dariyyu qidinnaan waqdi, Miidiyan-mari, Qamaalek-mara kee ayrô-mawqa le kabul yan mara lih gacca 'yeenih qeebih keenit abak ken abbaxuk yenen.

⁴ Oson elle yanin arac guubuh haysitta heenih, Gaada deqsitta magaalâ fan guffa hayta baaxol yuysubukeenim keenik bayisak yenen. Illi kee laay danoonak elli haanam inkih dannabah keenik been. Edde adoobitaanamak tu keenih macabinnon.

⁵ Tonnal laa kee sirooqa gabat luk mangah qanayti gide akkuk yemeeten. Ken kee ken gaali ixximâ-mangah loowimak mananna. Israayil baaxo amma 'yeenih baaxol sugga 'tem inkih keenik bayisak sugeeniih;

⁶ tonna-leemiik Israayil mari baacak gexxaamah, YALLAH deero abe.

⁷ Israayil mari YALLI Miidiyan marak ken cata'gidih kaal weeqen waqdi,

⁸ YALLI nabi keenih ruubeeh, woo nabi YALLAY Israayil doore Dagelta kinnihiyyak farmo keenih baahe. Woo farmo intaamah, «Anu isin naqoosah elle sugten Masrik sin eyyeeqeh,

⁹ Masri mara kee a baaxol yan maray qeebi siinit abehiyyak sin cateh. Isin ken gutuqak temeeten waqdi wadirih ken kudseeh ken baaxo siinih ecee.

¹⁰ ‹Sin Dagelta yoo YALLAAY; ama away isin baaxol akak tanin Amoorâ-mari yalla 'yeenih yaqbudeenim maqbudina› 'yaanam siinik exceh suge. Isiniiy woo yaabat maqal yok mahanniton 'yaanam iyye» keenik iyye.

GIDQOON DEQSITA MAKAABANTU

¹¹ Tohuk lakal YALLIH malaykatti Qofra deqsitta magaala fan yemeeteeh; wokkel garsâ-gubal daffee. Woo caxa luk tenem, Yoqas deqsita numuy Abiqeder marak radek ten. Kay baxi Gidqoon, Miidiyan-mari kaa akah able waa'nnah, qinab caxah maqab elle bicsan aracal kamadii kee caffa tittat anfiyak suge.

¹² Too waqdi YALLIH malaykatti tokkel kaah yumbulleeh, kaak iyyemii, «Qande le agirow, YALLI ko'lih yan» kaak iyye.

¹³ Too waqdi Gidqoon YALLIH malaykattuk iyyeemih, «YALLI ne'lih yenek, annah tanim net akah takkem maca kot celta, yi amoytaw?» kaak iyye. «Ni kaxxa abbobti neh warisseh sugte qagabah taniimiy YALLI abeh iyyeenihiyya kee, Masrik ken elle yeyyeeqe'nnay neh warseenihiyya maca tekke? YALLI maqal net aalle cineeh; Miidiyan marih xukkot yan mara nee abe» iyye.

¹⁴ Tohuk lakal YALLI kaa fan wagteh kaak iyyeemih, «Koo rubtam yook, caylak litoh gide koo xiqtah tanik, gex. Israayil mara Miidiyan marih xukkok cat» iyye.

¹⁵ Too waqdi Gidqoon iyyemii, «Yi amoytaw, anu Israayil mannal catah an? Manassek, anu akak an exxa, kedok inkih boolah gacca 'ya maraay; anu kaadu inni buxah marak inkih gaca num kinniyo way, mannal ken catah an?» iyye.

¹⁶ YALLI kaadu kaak iyyeemih, «Anu koo cateyyooh; tonnal abtu duudetto. Miidiyan mari qandek inki numih gide kol mayallaay; bututtukka ken heetto» kaak iyye.

¹⁷ Gidqoon too waqdi iyyeemih, «Atu yoo faxxe koo tekkek, Yalla kinnitoomih astah tuk teena yoo uybulluyaay,

¹⁸ ku maganah sadgatah maaqo baaham fan magexin» iyye. YALLI kaak iyyeemih, «Atu tamaatem fan elle sugeyyo» kaak iyye.

¹⁹ Too waqdi Gidqoon isi buxa gexxa 'yeeh girgirru usgudda heeh alayse. Sarrak bululuk tabna kiilo takkem bahha heeh kamiir edde asgalle'kal gaqambo akak bicse. Alayse cado kafaqat hayya heeh, saalooy distit hayya heeh, garsâ-caxah gubah sadgatah kaah baahe.

²⁰ Too waqdi malaykatti kaak iyyeemih, «Ama cado kee gaqambo a xixxaqak amol haay; saalooy amol kaak cax» kaak iyye. Gidqoon tonnah abe.

²¹ Tohuk lakal YALLIH malaykatti amma 'yeh, woo cado kee gaqambo, gabat abbaxuk suge caxxah xage. Woo xixxaqak gira tewqeeh cado kee gaqambo cararte. Tohuk lakal malaykatti qelliteh.

²² Gidqoon too waqdi, yublem YALLIH malaykattu kinnim yeexege. Sarrak wariggat iyyeemih, «YALLAW, Mulki le Dageltaw, ku malaykattu fooca kee foocah ubleh an!» iyye.

²³ YALLI kaak iyyeemih, «Wagri ko'lih yanay. Marabtak, mameysitin» kaak iyye.

²⁴ Tokkel Gidqoon YALLIH migaaqal sadgat elle aban arac bicse. Too aracak migaaqah ‹Wagri YALLAT yan› 'yaanam iyye. Woo aracay sadgat elle abehiyya a saaku fan Qofra deqsita aracal yan. Qofra, Abiqeder gulub guubuh le aracak ten.

²⁵ Too bar YALLI Gidqoonuk iyyeemih, «Ku abbah awurwak nammeyhaytoh awuruy malcina karmat yanihiyya bahha haay; ku abba Baqal deqsittaamah sadgat elle aba mansaf butukka hay; tohuk lakal Aseera deqsittaamay yaqbudeenihiyyah astah soolisen gurmudday Baqal-mansafak garit yanihiyya kaadu butukka hay.

²⁶ Tohuk lakal a koomah amol, meqe'nnal heen xeetik, YALLAY ku Dagelta kinnihiyyah sadgat elle aban arac bicis. Malcina karmat yan awur bahha haay, cado akak carrisan sadgatah, woo Aseera deqsitta gurmuddak tiddigille bocol cararis» kaak iyye.

²⁷ Gidqoon taamâ-marak taban yakke mara gabat hayya heeh YALLI kaak aba inxicca 'yem abe. Isi ahli kee magaalâ-marih meysih aham laqo abu meysiteeh barat abe.

²⁸ Kataya maaca magaalâ-mari maaca dibroh uguttu iyyeenih yemeeten waqdi, woo Baqal deqsittaamay yalla 'yeenih yaqbudeenihiyyah bicsen mansaf kee, Aseera deqsittaamay yaqbudeenihiyyah astah soolisen gurmudda bututtukka heenih sugen. Malcina sanatat yan awur qusbih bicsen sadgat-aracih bagul usgudda heenih cado akak carariseenih keenih sugen.

²⁹ Oson tah yublen waqdi, «Ah abtem iyyaay?» tittak iyyen. Sarrak ah abe marih goranat gaceeniih; too waqdi Yoqas baxi Gidqoon aham abeemit raden.

³⁰ Too waqdi oson Yoqasak iyyeenimih, «Ku baxi Baqalah bicissa hayne mansaf nek yiggileh yaniih; woo mansafak garit bicisneh sugne Aseerah hayne gurmudda kaadu bututtukka nek heeh yanikiiy, ah kaat macabnaay kaa qidenno'mmay, ni fanah kaa bah» iyyen.

³¹ Too waqdi Yoqas, naqabu afqadot hayya hee maray kaa fan yemeetek, «Away isin akah yabtaanam Baqal maay kinni? Kay aftok yabtaana innaa? Kay aftok yaabinnaan num, maaci maacisaamak naharal, rabeh maacisele. Baqal yalla yekkek, isi aftok isih yaabitay, tiddigillem kay mansafak» iyye.

³² Too saakuk wadir, Gidqoonuk Yarubbaqal 'yaanam axcuk raaqen. Woh kaak akah iyyeenimii, «Tiddigillem kay mansafak, Baqal isi afak isih yaabitay» 'yaanam iyyeh yeneeh; tohuh kaak iyyeenimi.

³³ Tohuk lakal Miidiyan kee Qamaalek kee ayrô-mawqa le kabu ten baaxol eneyya 'ya mari inkih tittal gaabowwa 'yeh, Ordon weeqaytuk gacca 'yeenih Yidraqel-Daqaral yinfiddigen.

³⁴ YALLIH *Roocaaniyya Gidqoonul obteeh; usukuuy Abiqederik rade mari kaa elle kataata'gidih, *baanta keenih yoogore.

³⁵ Manasseh yooboke maray Ordon weeqaytuk namma gambil yanihiyyah mari inkih kaa kataata'gidih, farmo keenih ruube. «Anu fooreh immay yoo kataya» 'yaanam keenih ruube. Aaser kee Dablon kee Naftaalih yooboke marah inkih farmo ruube, «Amay yoo kataya» 'yaanam keenih ruube. Oson too way kaal yemeeten.

³⁶ Tohuk lakal Gidqoon Yallak iyyeemih, «Atu, ‹Israayil ku gabat cateyyo› yok inte.

³⁷ Hay meqek, anu woo burri-cabuub elle afiile'kkel, idak yirgiqen xagor heeyyo. Maaca too xagoorih xagaral naafu macsissaay baaxo kafinuk macsisse tet tekkek, tonnal atu Israayil mara yi gabat cattam faxxam aaxigeyyo» iyye.

³⁸ Hununuh too usuk inxicca 'yem tekke. Gidqoon nammeyhaytô-saaku maaca ugte waqdi, woo xagor uxmumma heeh; too waqdi wokkek caxte naafi sacni leek kibba hee.

³⁹ Tohuk lakal Gidqoon Yallak iyyeemih, «Dagooh gide yaabat qagitu waak, Yallaw, yoo isi naqabuk yoo cat. Inki adda dagoorul kaadu gabbatu waak, away kaadu xagor kafisaay baaxo uynannos» iyye.

⁴⁰ Too bar Yalli toh abeh. Too barih maaca xagor kafinuk maaciseeh; baaxooy naafu luk uynuk maacisse.