Makaabon 5 - NABUWWA KEE MALIKWA

YALLAH ABEN SAARE

¹ Too saaku Deboora kee Abinqám-Barak a saare abte:

² «Israayil mari qeebit baguuk ugte; ummatta ruffu axcuk qeebit isinni fayxik ugten. Tonna-leemiik YALLA fayla taafay!

³ Isin, malikwak, ankacisa! Baaxoh abbobtik, cubbusa. YALLAY Israayil doore Dagelta kinnihiyyah faylah argideyyo; kaa saariseyyo.

⁴ YALLAW, Seeqir qaleela cabteh gexxe saaku, Edom deqsita rasuk tewqe saaku, baaxo tengeyyeeh qaraanak rob radeh; qamburreh addak lee caxitte.

⁵ Qaleeli YALLAY Siinâ-qale yamlikeh foocal axaxiteh YALLAY Israayil doore Dagelta kinnih foocal axaxiteh.

⁶ Qanát-Samgar deqsita numih saaku, Yaqel deqsitta say-numih saaku, arho woo baaxoh adda gexak masuginna. Gexenti uqurat xaqu akak gacak sugen.

⁷ Debooray, atu tamaatem fan Israayil baaxol gaandoodiy sinam akak teerrel, atu amma 'tam fan mandar-taameenit ween. Sarrak atu temeeteeh ina keenih tekke.

⁸ Israayil mari Yalla akke sinnim yuqbudeh; too saaku woo baaxol qeebi gace. Morootom alfi yakke Israayil marat gob kee macaxu gabat le num mananna.

⁹ Yi afqado Israayil qaskarih abbobti lih tan; isi fayxiik qeebi abe mara lih yok tan. YALLA fayla taafay!

¹⁰ Isin qado danoonah amot kooril yan maraw, isin kaadu faxxen ikke ibah gexa maraw, ankacisaay; ahamat yaaba.

¹¹ Qeelaali deraafil yan butta yakke mari YALLIH iisat afracuk yaabanaah Israayil mari yeyseemit yaaban. Tohuk lakal YALLI ummatta elle sugte magaaloolik butta akkuk gexxe.

¹² Ugut Debooray, ugut! Tirtirisak nee bey! Abinqam baxa Barakow, bisoh gexay, seewah orbissa mara gabat bey.

¹³ Sarrak imaan le mari isinni abbobtil yemeeten; YALLIH mari qeebi aba'gidih, bical gacca 'yeenih yol yemeeten.

¹⁴ Qamaalekih yooboke marak iisa gee maray Efrayimih yoobokehiyya isi baaxok yemeeten; Benyam kedoh yooboke marih lakat yemeeten. Qaskar amrissa abbobti Makirik temeete. Qeebi foocat tan qaskar Dablon baaxok temeete.

¹⁵ Issakar-kedoh tooboke kedoh abbobti Deboora lih temeete. Issakarah yooboke mari Barak-gubat gace. Oson woo dorrih adda kaa katayak ooben. Takkay immay Ruuben-kedo baxsinteh; gexaanam kee raaqaanam yeegemeenih.

¹⁶ Oson illi lih akah raaqeenim macak tan kaa? Illi-loyni illih aba seeco yaabbeeni'gidi innaa? Ruuben-kedo baxsinteh; gexaanam kee raaqaanam yeegemeenih.

¹⁷ Gilqad-rasul daffeyta kedooda Ordonuk ayrô-mawqa le kabul elle teede. Daan-kedo doonikit edde raqte. Aaser-kedo baddi afal elle teede; baddi afih dariifal elle raaqen.

¹⁸ Dablon kee Naftaalih yooboke mari carbi-booxa yemeeteeniih ‹Faxem net takke way carbi abenno› iyyen.

¹⁹ Taqnak deqsita aracal Magiddo deqsita illaltih garil malikwa temeeteh qeebi abte. Kanqaan baaxoh malikwa qeebi abte. Takkay immay oson lakqo mabennon.

²⁰ Cutuuka qaraanaak qeebi abte; cutuuka qaraanal yan isi gita gexak Sisrat qeebi abte.

²¹ Kisyon daqaarak yemeete weeqi duufut ken bee; Kisyon weeqaytuy weeqahiyya ken bayse. Gaaduh gexeyyo! Digga xica!

²² Tohuk lakal faariisa xoxobak temeete. Woo faariisah ibitteek radda xongolo kakkaqô xaw telle.

²³ YALLIH malaykatti, ‹Meerod abaara› 'yaanam iyye. ‹Wokkel enna 'ya mari mamattinnaay YALLIH xaqut gacaana'gidih mamattinnon. Kay qaskaray kay qeebi abta makkinnon; tonna leemik uma'nna ken abaara› 'yaanam iyye.

²⁴ Agabuk inkih fuli barkat edde heem Yaqeli; barkat lem, Keenah yooboke Ceebar yabbixe barra. Dabaaqah siraq addal yan agabuk is inkih yayse barkat le barra.

²⁵ Sisra lee essere waqdi is can kaah tecee. Meqe marah maaqo elle baahan mingilil qitti can kaah bahte.

²⁶ Siraq edde daabisan birta guri-gabat hayte; taamâ-marih maatakat migdi-gabat hayte. Sisrâ-moyya edde muddeeh, tiggiggile; moyyak tattabat kaak muddeh.

²⁷ Namma gulubuh radeeh yinnikisseh teetik foocal qangalaylut raaqe; baaxok bagul radeeh edde rabe.

²⁸ Sisrah ina taagataak wagitte; taagat boohaahik addak wagitte. Too waqdi itteemihii: ‹Faras-gaari kaak macah udurrute? Kay faroosa xayih akah amaate waytam macaay?› 'yaanam axcuk waagisse.

²⁹ Tu-taaxagoh yan agbi yab teetil gacseeh; is kaadu qagamqagitak isi bagut tucsubeemih,

³⁰ ‹Boylah orbisoonu waanamih goranat yanin keeni; baxuwwa takkuu, hinnay kaadu nammayay, qaskarah yacoonu waanah goranat yanin keeni. Nabam meqe saray Sisra yacoonu waanah goranat yanin keeni. Fillah qaxa yeymeeqen bila baahaana'gidih goranat yanin keeni. Fillah bilen saro goranat yanin keeni› 'yaanam isi bagul tucsube.

³¹ YALLAW, ku naqboytit ta marih rabah rabtay. Ku kacnoytit tawqe ayroh innah ifay» 'yaanam axcuk saare aben. Tohuk lakal morootom sanatih gide woo baaxol amaan gace.