Makaabon 21 - NABUWWA KEE MALIKWA

BENYAM MARAK RAQTE LABHA ELLE CATEN INNA

¹ Israayil-mari qeebi abak naharat, Mixfal gaabowwa 'yeeh Yallah kaxxa qahdi culeenih yenen. Iyyeenimii, «Yallaw, Benyam marah rihimih ninni say-xaylo acee waynaamah xiibinna» iyyeenih yenen.

² Tohuk gexxaamah sarrî-saaku Beetal fan gexxa 'yeenih inkih tan ayro Yallal weeqakaay kaxxa boogeh boogisak asen.

³ «YALLAW, Israayil doore Dageltaw, a saaku Benyam maray Israayilih yoobokehiyya akah bayam macaay?» iyyen.

⁴ Ciggilta ayro maaca dibrot sadgat elle aban arac bicissa heeniih, cado akak carrisan saq sadgatah woo aracih amol carriseeniih, tonnah kaadu amaanah xiinaanamih astah aban sadgat tokkel aben.

⁵ Sarrak iyyeenimih, «Israayil marak Mixfa fanah YALLIH foocal gaabownah amaate wee mari maay yan?» iyyen. Toh akah iyyeenim, Mixfa amaate wee num qideloonumul xiiba culeenih yenen.

⁶ Tonna'mmay Israayil-mari Benyam-maray keenih yoobokehiyyah away kaxxam qaaden. Iyyeenimih, «Israayil isi qammih xaylo wayteeh,

⁷ away nanu say-xaylo keenih abe waynaamal YALLIH garil xiibinneh nanik, a raaqe marah rihimih agabu ankek geynah nan?» tittak iyyen.

⁸ Sarrakaa, «Gaabownah arac amaate wayteeh, daffeynat angale waytem maa maraay?» axcuk titta esseren. Gilqad rasuk Yaabes magaalal yen mari amaate weenimil titta geen.

⁹ Too mari amaate weem elle yeexegeenimii, yemeete mara kee raaqe mara tittak yaaxagoonuh sinaamah migaaqal seecen waqdi, Yaabes mari kaaye'kal raaqe. Too waqdi yeexegen. Amaate weenim keenik yeexegen.

¹⁰ Gaabowwa 'ye marii, titta geyya heeh, taban kee namma alfih qaskariitay agiirah yanihiyya qeebih keenih ruuben. Iyyeenimih, «Gexay Yaabes magaalal sugu waa marak agabu kee urri agantah num macabinay inkih qida.

¹¹ Lab-mara inkih qida. Bikirit tan baxuwwak kalih agabuk tu macabinay sela» keenik iyyen.

¹² Too mari Yaabes magaalal bikirit yan baxuuwuk affara boolih baxuwwa geen. Too baxuw Siilo fan baahen. Siilo Kanqaan magaalak ten.

¹³ Sarraa, too maray gaaboowehiyya Rimmon-Xaa deqsita aracal yen Benyam marah farmo ruubeeniih, «Ahaysa qeebi siinit abtam matanak, aytikuma» keenik iyyen.

¹⁴ Tohuk lakal Benyam mari isi baaxo fan yuduure. Elle yemeete'kkel, Yaabes magaalak baahen baxuuwuy bikirit yanihiyya rihimih keenih yeceen. Takkay immay too baxuw mangah ken dudda mahannaay; tonna-leemiik tu keenik rihim maleh raqte.

¹⁵ Tonna'mmay Israayil marii, YALLI Benyam maray ken abbah saqlih xayloh taniih duma agleh keenit sugtehiyya keenik baxsem yublen waqdii, kaxxam akah qaaden.

¹⁶ Tohuk gexxaamah Israayil-maray gaaboowehiyya iyyemii, «Benyam kedot ahak wadir agbi maraaqinnak, away rihimih agabu gee'kal, raaqe marah agabu ankek bahnah nan?

¹⁷ Israayil mari baxambaxisimam mameqek maca tayse? Ahaysa carbik raaqeh yan marah tuk teena abnam nek faxxinta.

¹⁸ Nanu ninni say-xaylo keenih acee waynaah; rihimih xaylo keenih acayinnaan numul Yallih abaaro obtay 'yaanam inneh nanik, maca abnam tayse?» axcuk mala tittal baahen.

¹⁹ Sarrak cubbussa heen waqdi, Siilô magaalal kulli sanatal YALLIH qiidih edde asan ayro xayyowteh tanim kassa heen. Siilô-magaala Beetal deqsitta magaalak kilbat le kabut raaqak teneeh, Leboonâ-magaalak kaadu gabbi-qaxat raaqak ten. Beetal kee Seekem magaalak fan gexa gitak ayrô-mawqa le kabut raaqak ten.

²⁰ A qiidih ayro xayyowtem kassitta heen waqdi, Benyam marak, «Naharak gexxa 'xicay qiid yakku waa ayro qinab xala cooxih addat ombooqoray suga.

²¹ Siilô magaalah baxuw qiddi farcatah digiraana'gidih awqeloonuk, wagitak ken sugga 'xicay. Too waqdi coox addak eweqa; ken fan gexxa xicay, kulli numuuy isih faxe baxuwwa dirkih beetaama; isinni baaxo fan luk kuda.

²² Sarraa, toobokoyta akkiiy abba akki sikyatah nel yemeete kaa tekkeeh, ‹Baxuuwuy dirkih nek beenihiyya neh gacisa keenik inxica› nek iyyeenikii, keenik innaamah, ‹Seewah siinik morbisinninooy; geerak kaadu isin makkok rihimih keenih maabinnitoonuy; isinni malal geenim loonu. Tonna-leemiik Yallih garil duma abten xiibah aham dambik siinil maloowintak, sinam tanay inxica› 'yaanam nanu keenik axcenno» keenik iyyen. Tonna leemiik elle aboonu waan inna keenih warissa heenih ken ruuben.

²³ Too mari gexeeh keenik elle inxicca 'yen innal aben. Kulli numuuy digirak suge baxuuwuk baxuwwa-baxuwwal qawwa heenih luk kuden. Too baxuw isinni baaxo beeniih; finqitteh sugte magaala wadir nammeyhaak xisen. Tohuk wadir dabaaqah tokkel gacen.

²⁴ Sarrak gaaboowe marak numuuy isi baaxo kee isi ahli kee kedo fanah yuduure.

²⁵ Too dabaanal Israayil addal malik manannaay; tonna-leemiik kulli num isih faxem abbaasitak yen.