Makaabon 20 - NABUWWA KEE MALIKWA

BENYAM MARAT QEEBI ABEN

¹ Tah yoobbe mari, Israayil mari elle eneyya 'ya ikkek, Gilqad rasul elle suge marih agantah, num maraaqinnay, inkih yakkeenimik Mixfa deqsita aracal YALLIH foocal gaaboowen.

² Too aracal too saaku, Yallih marih gaabownay tekkehiyyal Israayil marak kedoh abbobtik num maraaqinnaay, affara boolih alfih numuy seefwa tittikiyehiyya inkih temeete.

³ Benyaamah yooboke marah tu gactek, Israayilih ubukka 'teemik keenik kalih mari Mixfal kobxem yoobbeenih immay, oson magexinnon. Yemeete mari, «Taway tekkem macaay? A umaane elle tekke'nna naabbem fanxa» iyyen.

⁴ Leewih yooboke numuy barra uma-taamat akak qideenihiyya iyyemii, «Yoo kee yi barray caggoytâ-gubih barrah liyohiyya barak elle xinna'gidih, Gibqâ-magaalay Benyam rasul geytintahiyya fanah gexak nemeete.

⁵ Gibqâ-mari qeebi yot aba'gidih bar yemeeteeh, addal akak an qarit maro heen. Naharak yoo qidaanam faxeeniih, sarra yoo cabba heenih yi barra cayliseeniih woo caylisut edde rabte.

⁶ Sarra tet ginaada beeh irgiggiqqa heeh Israayil mari elle eneyya 'ya ikke exxa-exxa keenih ruube. A umaane abe mari, uma-taamay caraamak tanihiyya ni addal abe mara kinnon.

⁷ Ta saaku ta'kkel gaaboowe marak inkih, Israayilih yooboke mara kinnitoonuuh aham ubulaay; akak intaanam siinil cabah an» iyye.

^8-9 Sugga 'ye mari inkih inki afat, «Ahak tuk teena abe'kal, buxah num nek mayaduurak, abnaamat yabnay» iyyen. «Gibqâ-magaalat qeebi abu waa maral saami caxxa qidnaamaay, saami caxxi elle yewqe mara rubnaama.

¹⁰ Israayil xaylok tabanhaytoh af, gaaduh gexa marah leek maaqo baahaanamaay; wohuk raqqa 'ye mara Gibqâ-magaalal yan maray a umâ-yabulit asehiyya digaala'gidih genxaama» 'yaanam iyyen.

¹¹ Tohul yakkeenimiik titta geeniih; Gibqâ-magaalah-mara digaalaanamat caben.

¹² Sarrakaa, inkih yan Benyam rasu fan farmo ruubeeniih, iyyeenimii, «A sin addal tekke umaanek maca inteenih?

¹³ Away ama umeynit rabi digaalah digaalla'gidiiy Israayil rasuk Yalli niqba taama bayisna'gidih, xabba ken haay nel ken ruuba» 'yaanam keenih ruuben. Takkay immay Benyam a farmoy ken toobokoh tan Israayil ummat keenih rubtet maqal mahaysitinnon.

¹⁴ Sarrak inkih tan Benyam magaaloolik gaabowwa 'yeenih Israayil marat qeebi abaana'gidih, Gibqâ-magaalal gaaboowen.

¹⁵ Too ayrot labaatanna kee lica alfih qaskariita isinni magaaloolih addak gaaboysak tokkel kobxisen. Too marak kalah kaadu, dibuk Gibqâ-magaalal yooboke marak malcina boolih numuy nagay qaskariino lehiyya doorru heenih baahen.

¹⁶ Too maray gaaboowehiyyak inkih malcina boolih num qeebi guri-gabah abak yen. Keenik kulli num qalaamah wanxefit ruube xaa hoxisak mananna.

¹⁷ Raqqa 'ye Israayil mari is le kabuk, affara boolih alfi qaskariitay nagay tan qaskariinô-baritto lehiyya qeebih keenih bical heen.

BENYAM KEDOL RADE QEEBI

¹⁸ Sarraa, Israayil mari Beetal deqsitta magaalal gaabooweeniih, «Yallaw, Benyam marat naharak qeebi abtu wayta kedo neh escessey?» iyyen. Too waqdi YALLIH garik, «Naharak gaaduh Yuudah yooboke mari gexay» inta qangara temeete.

¹⁹ Yalli toh keenik iyyek lakal, nammayhaytô saaku baaxo maacissa 'te waqdi, qeebih keenih gexeeniih; gaaduh gexxe qaskar Gibqâ-magaalah garil tinfiddige.

²⁰ Sarrakaa, Benyam marat fooca kee foocah gacca 'yeenih qeebih bicsiten.

²¹ Benyam mari magaalah addak yewqeeh, too ayrot edde Israayil-qaskarak labaatanna kee namma alfih num qiden.

^22-23 Toh keenit tekke waqdi, Israayil mari qibaada elle aban arac gexxa 'yeeniih, bari tikka 'yam fanah YALLAL weeqak sugen. Sarrakaa, YALLA fan essero xayyoosen. Iyyeenimihii, «Benyam maray ni toobokoh yanih qeebih genxuu magenxu, YALLAW?» iyyen. YALLAKAA, «Yeey, qeebi keenit aba» inta qangara temeete. Too waqdi niya keenit gacteeh, edde ugteeniih, duma akah aben innah, qeebi keenit abaana'gidih, dumih aracal bical gacen.

²⁴ Nammeyhaytoh ayro qeebil gaba qideeniih,

²⁵ too waqdi Benyam-mari kaadu nammayhaak magaalak bukka 'yeeniih, taban kee bacra alfih qaskariitay nagay tan qaskariino lehiyya qeebit keenik qiden.

²⁶ Israayil mari tah yuble waqdi, kaxxa qaadiyyah qaadeeniih Beetal fan gexxa 'yeenih, tokkel daffa 'yeenih YALLAL weeqak asen. Too ayro bari tikka 'yam fanah maaqo afah maxaginnon. Tokkel too ayro YALLAH cado akak cararisan sadgat kee amaanah xiinaanamih astah aban sadgat aben.

^27-28 Too saaku Yallih-Qahdih-Sandug Beetalal teneeh; seekih tenem, Haaruun baxih baxa Fincasak ten. Fincas abba Alqedara. Sarrak Israayil ummat kaadu qagitteh, «YALLAW, Benyam marih qeebit qagitnoh innaa? Maqagitnuu?» iyyen. YALLIH kabuk, «Gexay beera qeebit qagita, keenik sin aysiiseyyok» inta qangara temeete.

²⁹ Tohuk wadir Israayil mari qeebih gexeeh, Gibqâ-magaalat amô-reebu le aracat sasot sugu waa mara heen.

³⁰ Sidochaytoh ayro dumak kaxxih Gibqâ-magaalah garil fooca kee foocah gacca 'yeenih qeebih bical gacen.

³¹ Too waqdi Benyam mari qeebih magaalak yewqeeh; Beetal-magaala fan gexa gita kee Gibqâ-magaala fan gexa gita Israayil qaskar lakak ayraradduk gexen. Dumak kaxxih Israayilik tu yakke mara booxal qiden. Too qeebit Israayilik soddom num qiden.

³² Too waqdi, «Dumak kaxxih a saaku kaadu ken selleh» iyyen. Takkay immay Israayil mari, Benyam mari magaalak ken lakak awaquk gital akah ooban innah wadir hirgimeenih kudaanam ceelaanamal malsen.

³³ Sarrak Israayil-kaxxa-qande Baqal-Tamaari deqsita aracal koboxxa 'yeenih hortal gacen waqdi, Gibqâ-magaalal sasot-sugte-qande edde sugte ikkek tewqe.

³⁴ Tonnal Israayil marih addak doorru heenih baahen tabna alfih num, Gibqâ-magaala tabbixe'gidih foocah teetik yemeeten waqdi, uma-qeebi yekke. Benyam-mari baatih gexam isik maballinna'mmay,

³⁵ too ayro YALLI Israayil mara Benyam marak yiysiiseh. Israayil mari labaatanna kee koona alfi kee bool qaskariita keenik qide.

³⁶ Benyam mari, gacu waam isinnik yublen. Kaxxa qaskar Benyam marak wadir akah hirgimeenimii, Gibqâ-garil sasot caben qaskar Benyam mari ken lakat arduk yamaatem tuble waqdi, ciggilla heenih qeebi abeloonum aaxaguk yeneeniih, tohuh aben.

³⁷ Sasot suge mari magaala fan yerdeeniih sinaamak sugga 'tem inkih qiden.

³⁸ Israayil-qandek-sasot-tan-qande kee kalah tan kaxxa-qande fanal asta tittah heenih yenen. Sasot tan qaskar inteemih, «Magaalak kaxxa qer awaqih tablen waqdi

³⁹ wadir enkeleelebba 'xicay qeebit cula» iyyen. Benyam marah tu gactek, Israayil marak soddom num qiden waqdi, «Dumak kaxxih ken selleh» 'yaanamal kaxxam tirtirisen.

⁴⁰ Sarrak qer qamburreh innah qaran dagaak yewqe waqdi, Benyam mari wadir wagga heeh inkih tan magaalat gira habug axcih yublen.

⁴¹ Too waqdi Israayil mari wadir uduurra 'yeh qeebi keenit abe. Benyam marat warigga raddeeh, yambaxoonu waanam isinnik yublen.

⁴² Qeebik addak kudeeniih booxah tan baaxo fan kuden. Takkay immay asillimi ken mahannoonuuy, kaxxa qaskar kee magaalah addak awaquk sugte qaskarih namma fanal yembexen.

⁴³ Raqtem nammâ fanal hayya heenih Gibqak ayrô-mawqa le kabu raaqa arac fanah ayradduk baahen. Mangom gital elle keenik selen.

⁴⁴ Benyam qaskarak dooren labhak taban kee bacra alfih num qiden.

⁴⁵ Wohuk raqtem wadir tendebbeeh; Rimmon-Xaa akak iyyan arac fan yemeeten. Koona alfih num gital keenik qiden. Akim keenik Israayil mari Gidqom-magaala fan ayradduk baaheeh, namma alfih num keenik qiden.

⁴⁶ Too ayrot Benyaamak agiirah ten qaskarak tittat labaatanna kee koona alfih num rabe.

⁴⁷ Lica boolih num faxe innalaay yisillimeeh; too mari Rimmon Xaa akak iyyan aracay sinam elle ane sinnihiyya fanah kuden. Tokkel affara alsa sugen.

⁴⁸ Israayil-mari uduurra 'yeh, Benyam marak raqteemik awka macabinnon; lab num maxcinnon barra maxcinnoonuy selli heen. Magaalal sugteemik lac kee buxah addah alluwwa agantah selli heen. Tohiital sugga 'te magaaloolik tu macabinnoonuy kaadu inkih cararisen.