Makaabon 19 - NABUWWA KEE MALIKWA

BENYAM-MARI ABE UMAANE

¹ Israayil mari malik luk suge wee dabaanal, uli Leewih yooboke num yen. Too num Efrayim-rasuk qaleela le baaxok darre le kabut raqta baaxol buxah yen. Too num Yuudâ-rasul geytinta Beetlacam-magaalak, caggoytâ-gubih caggoyta kaah takke'gidih, baxuwwa bee.

² Sarrak a barra kaa'lih gexsite cinteeh; naqabut abbâ-buxa fan tuduure. Tokkel abbâ-buxal affara alsa sugte.

³ Affara alsak lakal, tet baqli tet fan gexxa 'yeh tet lih yabba 'yeh, buxah tet gacsaamal malse. Too waqdi isi taamah num haysitta heeh, danoonâ nammayal koori hayya heeh, tet fan gexe. Awká elle tan buxa yemeeten waqdi awká, «Buxa cula» keenik inteeh; sarrak awkáh abba ken yuble waqdi, kaxxa salaamatta keenih abe.

⁴ «Buxal qibnaytiinoh sidooca ayro suge wayteenik, sin maruuba» 'yaanam iyyeeh; sidooca ayro qibnaytiinoh isi buxa elle ken sugse.

⁵ Fereyhaytoh ayro saaku dibrot ugutta 'yeenih gexaana'gidih bical gacen. Awkáh abbah tu gactek, iyyeemih, «Naharak maaqo afah xag. Kot amqeleeh gexo sarrak abettok» kaak iyye.

⁶ Balli, «Meqeh hay» iyyeeh, sarrak maaqo baahen waqdi nammayak daffa 'yeenih yokmeeniih, yooqoben. Tohuk gaba kalen waqdi, kay balli qagseh kaak iyyeemih, «Ahaysa magexinay ku maganah farcitaay elle ne'lih xin» kaak iyye.

⁷ Leewih yooboke num gexoh ugteh immay, balli kaat qagamqagseh, «Ahaysa ne'lih xin, saaku gexettok» kaak iyyeeh; ellecabol elle xiine.

⁸ Konoyhaytoh ayro saaku dibroh ugutta 'yeh gexam faxa waqdi, awkáh abba kaak iyyeemih, «Naharak ku maganah tuk teena afah xagey gexo carra abettok» kaak iyye. Sarrak ballu kee ballu maaqo daffa 'te titta lih tokme.

⁹ Too ayrot edde waqlak wadir, ballu kee kay barra kee isi taamah num gexoh ugutteeh; too waqdi balli iyyemii, «Ayro korteh bari yakkem faxam matablaana? Ahaysa bari siinit akkelek, magexinay elle xinna 'xicay, beera saaku dibrot ugutta 'teenih gexetton» kaak iyye.

^10-11 Too bar tokkel xiinaanam kaal tigibdiyeeh, tohuk gexxaamah kaa kee kay barraay kay taamah num, namma dananay koori elle heenihiyya luk daqaarimen. Sarrak magrib radam faxa waqdi, Yaabus deqsitta magaalay sarra Yarusalaamal muggaaqiseenihiyya gufen. Too waqdi isi taamah num, «Ahaysa a Yabuusâ-marih magaalal xinna'gidih daggawnu wayna» kaak iyye.

^12-13 Usuk lih yan num iyyemii, «Aleey, marin marih magaala kee Israayilih aabuke wee marih buxaaxi maculla. Dagoom bisoh gexxa inna waqdi, Gibqa akkiiy Raama magaala gufe akkennooh; too namma magaalak magaalak teenal xiinenno» iyye.

¹⁴ Yaabus magaalak tatreeniih, ayro culla 'te waqdi Gibqâ-magaalay Benyam rasul tanihiyya fan yemeeten.

¹⁵ Gexak sugen gitaak magaala fanah daggaawen. Magaala guffu heen waqdi, magaalak gudey sinam gitah gexxaah gactahiyyal daffa 'yen. «Buxal ne'lih xiina» iyya mara magennon.

¹⁶ Oson tokkel yanin waqdi, idaltuh yan numuy taamak orbahiyya keenil yemeete. A idalti aslik Efrayim numuk yene'mmay, woo saaku buxah woo magaalal yen. A magaala lem Benyam marak ten.

¹⁷ A idalti magaalak gudel ken yuble waqdi keenil yemeeteeh, «Ankek temeeteeniih, anni baaxo fanah gexxaanaah?» keenik iyye.

^18-19 «Elle sugnem, Yuudâ-rasuk Beetlacam magaalaay; away genxam, ninni baaxo. Baaxo nek Efrayim rasuk qaleela mango exxay xeeruk raqtahiyyal tan» kaak iyye. «Beetlacam fan gexeeh, away inni buxa fan gacah an. Nakme'gidih gaqambooy, maqabah qinab kamri linooh, danoonâ-qayso kinni way ninnih linoh immay, xiinih buxah nee beya mara nableh manan» iyye.

²⁰ Too waqdi idalti keenik iyyeemih, «Arciba hay, yi buxah sin beyak» keenik iyye. «Akkel magaalak gudel maxiininay, yi buxah amaay faxxaanamah arciba» keenik iyye.

²¹ «Marcaba hay» iyyeeniih, ugutta 'yeenih kay buxah kaa'lih gexen. Tokkel danoonah qayso keenih qidda heeh; sarrak iba kaqliseenih, maaqo kee maqab xagen.

²² Tonnal farcatat yanin waqdi, magaalah addal tan labhay taama akak toomehiyya garciik qari keenik marot heen. Qari afa keenil kaxxam yoogoren. Qari le numuk, «Ama ku buxa yemeete num annah afah nel eyyeq; fido kaat fanxa'gidih neh kaa eyyeq» iyyen.

²³ Qari le num afah keenil bukka 'yeh, «Kata maxcina. Yi toobokoy, annah tan qax-umaaneh tanim maxcina. A num yi qibnaytuk, kata bas.

²⁴ Faxxeenik, akkel kay barra kee yi baxáy bikirit tanihiyya taniih, afah siinih ayyaaqeyyok, ken lih xiinaay faxxeenim keenik aba. A numuh tu gactek, aham maxcinaay a qax-umaanek raaqa» keenik iyye.

²⁵ Yab kaak cinaanam yuble waqdi, qibnaytuh yan numuu, isi barray caggoytâ-gubih caggoytah lehiyya beyya heeh foocal keenik hayya heeh cabe. Taaxige mari inkih yan bar caylisakaay, waqdiiy num tet ciggiilakaay, isinnih elle faxen innal fido teetit faxak xinna 'yeenih saaku fan luk tet maacisen.

²⁶ Saaku maaci maacise waqdi tet ruuben. Is idalti-qariy tet baqli edde yenehiyyah afal tinnikisseh maacisse.

²⁷ Maaca tet baqli gexoh ugutta 'yeh, afah bukka 'ye waqdi, kay barray qarik afat gaba ruubuumut lehiyya, yuble.

²⁸ Too waqdi, «Ugutay nee bey, genxu waynak» teetik iyye. Yab kaal gacse wayte waqdi, dananal tabtabbih tet hayya heeh, daqaarimma 'ye.

²⁹ Buxa guffu heeh qari culla 'ye waqdi, gile luk yewqeeh, isi barray rabtehiyya too gilet taban kee namma maasayyal irgiggiqqa heeh, kulli exxa Israayil kedoy taban kee nammay takkehiyya fanah ruube.

³⁰ Israayil mari tah yuble waqdi, «Ah Masrik newqeemih nubleeh noobbem hinnak. Ah macak tanih tan? Ahak tuk teena axcee kee abe nakkem tayse. Tibba axce waynay» iyyen.