Makaabon 18 - NABUWWA KEE MALIKWA

DAAN-MARI ELLE GACA BAAXO GORRISE

¹ Too dabaanal Israayil mari malik luk mananna. Israayilik Daan-kedoh yooboke mari, Israayil mari inkih baaxo elle gee'kkel, baaxo gee'kal yeneeniih; tohuk gexxaamah yabbixen baaxoh goranat gacen.

² Sarrak kedoh addak doorru heen koona num guubuh elle gacoonu waan baaxo gibteenih yamaateeni'gidih, Xorqa kee Estool deqsitta namma magaalak ken ruuben. Keenik iyyeenimih, «Gexay baaxo elle tan gurra wagga haay ama» axcuk, giba elle aban inna escessa ken heenih, ken ruuben. Efrayim rasuk qaleela le arac yemeeteeniih tokkel Miikâ-buxa culen.

³ Woo buxal keenih suge furraynuy Leewih yoobokehiyya, elle yooboke'kkel yaabal kaak yeexegeeniih, kaal amma 'yeeniih, «Akkel maca abtaah? Iyyi koo baaheeh?» kaak iyyen.

⁴ «Akkel Miika lih aniih, ‹Yi buxal gacaay sek yoh tik, wohul galto koh aaxigeyyo› yok iyyeeh; wohul titta geyneh. Wonna leemiik akkel kaa'lih an» keenik iyye.

⁵ «Hay tonnal, abnah nan safar nel yamqem kee amqe waam Yalla neh esserey» kaak iyyen.

⁶ «Akah sakkittaanam manton. Abtan safaral YALLI sin dacriselek, gexa» keenik iyye.

⁷ Toh keenik inxicca 'ye waqdi, woo koona num Laysâ-magaala fanah safarte. Too magaala gufen waqdi, magaala yubleeniih; magaalal yan mari hammi sinnim amaanah elle xiinan inna keenik yismiteenih. Saydâ-marak kaxxih, a magaalal yan mari amaanah yeneeniih; ken xagtam mananna. Oson kaadu xagtan mara luk manannon. Mano keenil muquk teneeh; faxxa haanam inkih luk yenen. Laysâ-magaala, Saydâ marih magaalak xeeruk raaqak teneeh; hebeltô-mara luk heen bica kee qalla luk manannon.

⁸ Gibah ruuben mari yuduure saaku, ken ruube ken baaxoh mari xaagu keenik abeeh, «Maca tubleenih temeeten?» keenik iyyen.

⁹ «Akah genxe baaxo nubleeh, meqe baaxoy niqmatak tanihiyyak ten. Akkel foyyah daffeyna ikkalahaa, away sissikuk genxek, baaxo keenik raaqisennok, ugutay labhay nee beya.

¹⁰ Wokke guftoonu waytan waqdi ablettoonu'mmay, qeebi net akkeleh bical yan marak masugan. Sin yablen way sin madereeman. Baaxo kaadu kaxxa baaxoy num faxxa haam elle geyahiyya. A baaxo Yalli siinih loowe baaxok, ugutay raaqisa» iyyen.

¹¹ Too saaku toh yoobben waqdi, kedok lica boolih num Xorqa kee Estooluk gaaduh gexen.

¹² Gaaduh daqaarimeeniih, Yuudâ-rasul Kiryat-Yaqaarim deqsita magaalak ayrô-culma le kabuk raaqe aracal yinfiddigen. Too aracak ta saaku fanah migaaqah Daan-Mafdaga 'yaanam iyyan.

¹³ Tokkeek gexeeniih, qaleela mango Efrayim baaxol gacak, Miikâ-qari elle geytima arac yemeeten.

¹⁴ Duma Laysâ-magaala gibah gexeh suge koona num, gaaduh yemeete marak iyyeenimih, «A qarwak qarik teenal lakqok bicsen ceeloy yaqbudeenihiyya tan. Tohuk kalah aki duyyey yaqbudeenihiyya kee rikeek tan saroy sek haysita elle tanik, tahak maca abnam tayse?» iyyen.

¹⁵ Toh keenik inxicca 'yeenih wadir enkeleelebba 'yeenih Miikâ-qari fan gexen. Tokkel taaxige furraynuy Leewih yooboke geen waqdi, salaamatta kaah abba heeniih, «Mannah tan hay!» kaak iyyen.

¹⁶ Oson too xaagu kaak aban waqdi, lica boolih qaskariitay gaaduh gexxahiyya silac gabat luk qarik afal soolak sugte.

¹⁷ Sarrak a koona num qari culeeniih, taaxige ceeloy lakqok bicseenihiyya kee, wohuk kalah tan duyye yaqbudeenihiyya kee rikeek tan saroy sek haysita gabat luk yewqen. Sek too waqdi qari-afal too qaskar luk raaqe.

¹⁸ Qari adda culla 'yeenih, gabat oren duyyey yaqbudeenihiyya kee taahirik-tan-duyye akak iyyan duyye beyah ken yuble waqdi, taaxige sek, «Labhay, abtaanam macaa?» keenik iyye.

¹⁹ «Tibba 'xic bas; qangara guduqqa maxcin» kaak iyyen. Sarrak kaak iyyeenimih, «Sek neh akkettok, ne'lih am. Inki numih sek takkeemik, Israayil-kedoodak inkih tan Daan kedoh sek takkem koh taysek, ne'lih gex» kaak iyyen.

²⁰ Too waqdi sek farcaan yekkeeh, taahirik tan duyye akak iyyan duyye gabat hayya heeh, ken lih gexe.

²¹ Sarrak isinni xaylooy, lac kee duyyek elli haanam foocat isinnik hayya heenih isinni gexoh gexen.

²² Ta mari yexxeereenik sarra, Miika cuggaanê-marah deero abba heeh, qeebi keenit abaana'gidih, lakak ken kataaten. Sarrak ken yeybeebexeeniih,

²³ qandek xongolak keenit karaaraqen. Daan mari enkeleelebba 'yeeh, Miikak «Ah macaay waytam? Sinaamak a gide takke butta lakak nee akah kataytam macaay?» kaak iyyen.

²⁴ «Yaa? Maca waytaanaa yok intaanaa? Sek kee bicsiteh an yallitte inkih yok beyten way, maca waytan mannal yok intan? Maca luk raaqeh?» 'yaanam keenik iyye.

²⁵ Too waqdi kaak iyyeenimii, «Numow, gabat nek rabtam faxe waytek, qangara mayaabinay tibba 'xicay, uduur. Sarrak naqabu le mari net yaniih, too mari koo kee ku buxah marat qeebi abelon; num siinik macabaanay sella sin haanam koh mataysak, tibba 'xicay gex» kaak iyyeeniih;

²⁶ isinni gexoh gexen. Miika qandeh ken duude waam ubulla isik hee waqdi, isi buxa fan yuduure.

²⁷ Sarrak Daan-mari, Miika luk suge duyyey yaqbudeenihiyya kee buxal luk suge sek gabat hayya heeniih, abak sugen safarah Laysa gaaduh gexen. Tokke gufen waqdi Laysâ-maray amaanah yaniih toobbe kee tublek tu-xaagu sinnihiyyat qeebi aben. Magaalal suggu 'ye mara qideeniih, sarrak magaala carriseenih.

²⁸ Laysâ-mari ken cata mara magennon. Akah weenim, Saydâ-magaala xeri'kkel keenik raaqak ten. Sinam lih kaadu hebeltô-qalla luk manannon. Sarrak cararisen magaala nammeyhaak xissitta haysiteenih isinnih elle gacen. Laysâ-magaalaa, Beet-Racob deqsita daqaaral ten.

²⁹ Magaalak migaaqah Daana iyyen. Daan ken kaxxa abbah migaaqaay Yaqkuubuk baxak ten.

³⁰ Taaxige ceeloy lakqok bicseenihiyya yaqbudeeni'gidih soolisen. Muusak baxi baxah yen Gersóm-Yonaatan deqsita num Daan marih seekih yeneeh; usuk rabek wadir kaak rade mari, Daan mara marin baaxo seewah beyya haanam fanah ken seekah sugen.

³¹ Yalla elle yaqbuden siraq Siilo deqsita aracal udduruk suggu 'yem, a ceeloy duma Miika luk sugehiyya kaadu Daan magaalal elle sugte.