Makaabon 17 - NABUWWA KEE MALIKWA

MIIKA DEQSITA NUMU

¹ Dumah yan saaku Miika deqsita num suge. Too num dabqah Efrayim rasuk qaleela mango baaxol suge.

² Too num ayrok teena alfi kee bool garsi inak garqoh bee. Sarrak inak iyyemii, «Yi inay, woo lakqo garqoh kok bee num abaarah koo oobbeh en. Takkay immay lakqo kok beytem yooy, koh gacsahak, ayka» iyye. Kay ina toh toobbe waqdi, «Yi baxaw, YALLI barkat kot haay» kaak inte.

³ Too lakqo isi inah gacseeh; too waqdi is intemii, «Yi baxa cata'gidih, a lakqo YALLIH sadgatah aceem yol tan. Tonna leemiik a lakqok yaqbuden duyyeeya bicsiiseyyo. Awayah tu gactek, lakqo gacsah koh aceeyyo» inte.

⁴ Takkay immay usuk beeh suge taaxige lakqo inal gacse. Kay ina woo lakqok namma boolih garsi beyya hayteeh, lakqok duyye bicsa naggaaral tecee. Too num woo lakqok yaqbuden duyyeeya bicse. Sarrak too duyyeeyay yaqbudeenihiyya Miika buxal heen.

⁵ Miika qibaada elle aba arac luk yen. Yaqbuden duyyey gabak bicseenihiyya kee, rikeek tan saroy sek haysita buxal luk yen. Too duyyey yaqbudeenihiyyah garil gacu waa seekih isi baxa hee.

⁶ Too dabaanal Israayil rasul malik manannaay; tonna-leemiik kulli num isih faxem abbaasitak yen.

⁷ Too dabaanal kaadu Leewih yooboke furrayni Beetlacam deqsitta magaalay Yuudâ rasul geytintahiyyal dabqah suge.

⁸ Sarrak woo magaala cabba heeh, dabqah elle gaca ikkeh goranah safare. Ellecaboh Efrayim rasuk qaleela le aracal tan Miikâ-buxa yemeete.

⁹ Buxa elle yemeete'kkel, Miika, «Manni kabuk temeete?» kaak iyye. «Anu Leewih yooboke num kinniyooh, akak emeetem Yuudâ rasuk Beetlacam magaala. Tonna'mmay awayii, buxah elle gaca'kkeh goranah safarah an» kaak iyye.

¹⁰ Too waqdi Miika, «Wonnal akkel buxah yo'lih gacaay; fayu yoh aceettooh, sek yoh akketto. Wohoysa, sanatal tabna garsi koh aaxigeyyooh, sartan kee maaqô tiyak kaadu yoo lito» kaak iyye.

¹¹ «Meqeh hay» iyye. Sarrak baxi gide kaah yekke.

¹² Miika sek kaa abeh, isi buxal kaa abbaxuk yen.

¹³ Miika isi niyal, «Leewih yooboke sek geek wadir, YALLI kullim gabal yok aymaaqele» iyye.