Makaabon 16 - NABUWWA KEE MALIKWA

SAMSOON GAADA DEQSITA ARAC GEXE SAAKU

¹ Ayrok teena Samsoon Gaada deqsitta magaala gexe. Tokkel xiiqareh-xiina geeh tet lih xiine.

² Gaadâ-mari Samsoon woo magaalal yaniimih xaagu geen waqdi, woo arac marot hayya heenih, yawqem fan woo magaalak culmeynal inkih yan bar kaa qambaalak xiinen. «Maaci maacisam fan elle kaa qambaalennooh; yamaate waqdi, kaa qidenno» 'yaanam isinni niyal hayya heenih inkih yan bar tibba axcuk sugen.

³ Takkay immay Samsoon woo barra lih xiinit sugem, inkih yan bar hinna'mmay barak gudek ten. Sarrak ugutta 'yeeh woo magaalak culmeynah yemeeteeh; too waqdi woo gasoh alif kee alfinti cooxuuy mafaatic inkih kalla heeh, wohim inkih sunkut hayya heeh, Cebron magaala akak tambulle qaleh amo fan luk yewqe.

⁴ Tohuk lakal Samsoon Soorek deqsitta golol ten Daliila deqsitta barra yikcine.

⁵ Sarrak woo konooy akkuk ten Filistiin-malikwa woo barral gexxeh, teetik iyyeenimih, «Samsoon celem akah yekkeemik adda baritaay, elle yekke innah ayrissa kaa haay, sirri kaak eyyeq. Tuxxiq sinni num kaa ab. Too sirri geyya hayta waqdi, net akah koysite waa'nnah uxuyya kaa heenno. Toh abtek, nakke konooyuk kulli num nek alfi kee bool garsi koh aceele» teetik iyyen.

⁶ Too barray toh toobbehiyya Samsoonuk intemii, «Ku maganak annah yan celem elle tekkem mannaay? Numuk teeni uxuyya koo heeh akah koysite wayta'nnah kok abam faxek, mannah kok abaah?» kaak inte.

⁷ «Malcina qusba qarumuy kafe weehiyyat yoo toxeek, tonnal sinam akah boolatta'nnah, boolaateyyo» teetik iyye.

⁸ Toh yok iyyem keenik inte waqdi, Filistiin malikwa malcina qusba qarumuy kafe weehiyya bahha heenih teetil yeceen. Is too waqdi woo qarumut Samsoon kariqqa hayte.

⁹ Too qarik gersi golih addat tet qambaala mari yen. Is too waqdi anay fayya haak, «Samsoonow, Filistiin-mari kot yemeeteh» inte. Takkay immay usuk woo waqdi woo qarum, gira tafulwat gexxa waqdi duufut elle taggiriqe'nnal, yirgiqe. Tah yublen waqdi, ta numih qande akak tani'kke waagiseenih.

¹⁰ Sarrak Daliila kaak inteemih, «Atu away yoo duquurusseeh numma yoh mawarsinnitok, ku maganak koo yaxoonu elle duudaanam mannay?» kaak inte.

¹¹ «Duma hebeltohim edde axee ween akootat yoo yoxeenik, sinam bis aalleyyo» teetik iyye.

¹² Daliila qusba akoota bahha hayteh edde kaa toxee. Sarrakaay, «Samsoonow, Filistiin mari kot yemeeteh!» kaak inte. Sahda too qarik gersi golih addat tet qambaalak sugte. Too waqdi usuk woo akoota woo waqdiik gabak isik, tafulti innal, yirgiqe.

¹³ Sarrak Daliila Samsoonuk annah inte: «Atu uxih yoo duquurussah taniih, nummat yo'lih mayabta. Koo elle yaxoonu duudan inna macah yoh mawarissa?» kaak inte. Usuk too waqdi annah teetik iyye: «Yok malcina xagorta kee tafulwa tittat sookka haytek lakal, edde yaxcixen mudeynat digga haytek, wonnal sinam bis aalleyyo» iyye.

¹⁴ Too waqdi xin kaat yamaate'gidih, kaa soocarteeh; xin kaat yemeete waqdi, malcina xagorta kaak tafulwa luk sookteh. Sarrak mudeynat digga hayte. Too waqdi anay fayya haak, «Samsoonow, Filistiin mari kot yemeeteh» inte. Takkay immay Samsoon ugte waqdi xagorta sookok isik kaleh.

¹⁵ Tohuk lakal kaak inteemih, «Atu yoo makicintok, ‹Koo kiciyyoh› macah yok inta? Sidiica waqdi yoo duquurusseeh; uxih celem akah tekkem yoh mawarsinnito» kaak inte.

¹⁶ Taham kulli ayro kaa esserteeh; usuk a esseroy kulli way kaat abtahiyyak taqabeh. Mangom sabri yaallu maxiqinna.

¹⁷ Sarrak ellecabol numma teetih warse. Teetik iyyeemih, «Amô-xagorti yok inkinnah makalinnon. Ooboke saakuk xabba haanam, *Qahdi-culeyna yekke marih innah, Yalli-caglita-num ekke. Tonna'mmay amô-xagorti yok yiggiriqek, sinam innah boolaateyyo» teetik iyye.

¹⁸ Daliila nummat tet lih yaabem teexege waqdi, woo Filistiin malikwah farmo rubteeh inteemih, «Away nummat yo'lih yaabek, inki adda qagitay ama» keenik inte. Oson too waqdi yuduureeniih woo maalu gabat luk yemeeten.

¹⁹ Daliila Samsoon gurumbal isik hayya hayteh, xiina'gidih kaa saacorteeh; sarrak Samsoonuk malcina xagorta amok kaak yargaqu waa numuh secte. Woo num woo xagor kaak yirgiqeh. Tohuk lakal usuk luk yen qande cabeh. Tonnal kaa boolasseeh luk yen cayla kaak beyte.

²⁰ Sarrak anay fayya haak, «Samsoonow, Filistiin mari kot yemeeteh» inte. Too waqdi usuk xiinik ugteeh; dumaak akah abak suge'nnah, ugutta 'yeh daqaarimma axcelem yekkeleeh; YALLI wakalih kaa'lih mayanim maaxaginna.

²¹ Filistiin mari kaa yibbixeeh, namma inti kaak yeyyeeqeenih. Gaada deqsita arac kaa beeniih, tokkel nacaasak bicsen silsilatat kaa yoxeen. Casbit kaa heeniih daro eceyyal kaa riysiisen.

²² Amo xagorti sarrak kaah yembeh.

SAMSOON RABA

²³ Filistiin malikwa yallah loonumuy migaaqah Dagon akak iyyaanahiyyah kaxxa sadgat abaana'gidiiy woo ayro yassakaxxeeni'gidih, inkih aracal gaaboowen. Too waqdi qadar abeeniih woo qadarah iyyeenimih, «Ni yalli naqboytah suge numuk nee yiysiiseh» iyyen.

^24-25 Too waqdi kaxxam yifriceeniih, sarrak «Samsoon nee yaysussuule'gidih kaah neh seeca» iyyen. Oson casbik kaa yeyyeeqen waqdi, ken akah yaysussuule innah kaa absiisen. Kaa yublen waqdi oson yallah lon duyye fayliseeniih, iyyeenimih, «Ni yalli, ni baaxo bayseeh mango mara nek qide numuk nee yiysiiseh» axcuk saare aben. Sarrak qamidwak fanat kaa soolisen.

²⁶ Samsoon too waqdi gabal kaa beyak suge awkak iyyeemih, «Qarik amo xagta qamidwa gabah xagay yoo inxic, elle qekitam faxak» iyye.

²⁷ Woo qarih addal agabu kee labhak mangom gaabowteh ten. Filistiin koona malik kaadu wokkel ten. Woo qarik amol kaadu sidiica alfih num yen. Too mari Samsoon ken elle yaysussuule inna wagtaana'gidih yemeeteenih yenen.

²⁸ Too waqdi Samsoon dooqa abeeh, woo dooqah iyyeemih, «YALLAW, Mulki le Dageltaw, ku maganak yoo kassa hay. Yallaw, ku maganak a Filistiin maray namma inti yok yeyyeeqek cane gacsa'gidih, inki adda qande yot hay» iyye.

²⁹ Sarrak fanti namma qamidduy woo qarik amo gufahiyyak tiyaay gabah xabba heeh gutuqe.

³⁰ Too waqdi anay fayya haak, «Filistiin mara duufut beeh rabam tu hinna» iyye. Sarrak woo qari qandek leemiik gutuqeeh; too waqdi woo qari woo koona malik kee raqqa 'ye maral inkih rade. Samsoon Filistiin marak addunyal yen saaku qideemik fula, rabe saaku qide.

³¹ Kay tooboko kee kay buxah mara kay raysa woo aracak beyta'gidih temeete. Kay raysa beeniih kay abbay Manowac deqsitah kabrit kaa yoogoqen. Woo kabri Xorqa kee Estool deqsita aracak fanal yan. Samsoon labaatanna karmah Israayilik makaabantuh suge.