Makaabon 15 - NABUWWA KEE MALIKWA

SAMSOON ABE CANÊ-GACSA

¹ Waqlak wadir Samsoon girgirru gabat hayya heeh, kamadi edde orbisan waktit, isi barrat boysita'gidih gexe. Wokke gufe waqdi tet abbak, «Inni barral xinti qari culam faxa» iyye. Tet abba cule kaa kaleeh kaak iyyeemih,

² «Anu atu tet faxe waytam ekkeleeh ku kataysah tet ecee'mmay, tet maqanxáy barah teetik qunxahiyya qaxah teetik tayseh tanik, teetil raq» kaak iyye.

³ Too waqdi Samsoon kaal gacseemih, «Tahaysaay Filistiin mari yi gabat biyaakitta 'ye kaa tekkek, tohut yoo asissem sin kinnim ixiga» iyye.

⁴ Sarrakaay gexxa 'yeeh sidiica boolih wakri yibbixe. Woo wakaara nammay nammeyah hayya heeh geera tittat keenik yoxee. Woo geerak kuntubbat keenik kafin qaysoyta yoxee.

⁵ Sarrak woo geerat keenik yoxee qaysot gira ruubeeh; woo wakaara woo gira luk, tooboke kamadih addat keenik ruube. Too gira dibuk yirgiqen kamadi hinna'mmay, argiqe'kah sugen kamadi keenik selli hayte. Toh lih kaadu, qinab xale coox kee *daytuun xale cooxih agantah keenik cararisseh.

⁶ Filistiin-mari ah abtem kinni mara esseren waqdi, ah abtem Samsoon kinnim yeexegeenih; akah abem kaadu, balli kaak barra Samsoon kataysah yeceemih abem yeexegen. Kay balli Timna deqsitta magaalah numuk ten. Tonna-leemiik Filistiin-mari gexxa 'yeh, woo barra kee tet abba carrisen.

⁷ Sarrak Samsoon keenik iyyeemih, «Sin taama tah teetii? Ahamih cane siinik gacse'kal, aade waamah xiibitah» keenik iyye.

⁸ Tohuk lakal caylah ken yibbixeeh mango mara keenik qide. Sarrak gexeeh Qetam deqsitta boolok bagut tan gablah addat yombooqore.

SAMSOON KEE DANANIH QANGABBI

⁹ Tohuk lakal Filistiin-mari qeebih gexeeh, Yuudâ-rasul yinfiddigen. Sarrak Laci deqsitta magaala wararen.

¹⁰ Yuudâ-marih labhay, «Macah nee gaaddan?» keenik iyye. Osonuuy, «Nanu Samsoon casbit hayya hayneh too nel bahha heem kaal bahnam fanxa» keenik iyyen.

¹¹ Too waqdi Yuudâ-marak sidiica alfih num woo Qetam qalek boolok bagut tan gabla fan gexeeniih, Samsoonuk, «Filistiin-mari ni amol yanim mataaxiga innaa? Annah tanim macah nel bahte?» kaak iyyen. Usuk keenik iyyemii, «Oson yol baaheenim keenil baahe» keenik iyye.

¹² Too waqdi kaak iyyeenimih, «Nanu akke akah nemeetem, uxuyya koo hayneh ken gabal koo hayna'gidik, gablak eweq» kaak iyyen. Usuk keenik iyyemii, «Isin isinnih yoo qide waytaanamih xagna yoh cula» keenik iyye.

¹³ Osonuuy, «Aleey, koo maxagnaay uxuyyu koo hayneh ken gabal koo heenno ikkal, koo qide waynaamah xagana koh culla» kaak iyyen. Sarrak qusba akootak nammay tittat uxuyya heenih kaa edde yoxeeniih edde suge gablak kaa yeyyeeqeenih axawat kaa ruuben.

¹⁴ Laci deqsita arac yemeete waqdi, Filistiin mari waxxaq axcuk arduk kaa fan yemeete. Garciik YALLIH *Roocaaniyya cayla kaat hayteeh, too waqdi caray kee mogoyut axawah kaak suge namma akat gira tokme tafulta elle yargiqen gurral yirgiqe.

¹⁵ Sarrak xayi wakti rabe dananih qangabbi-lafa geeh, qununna 'yeh woo qangabbi yakkuqeeh, too lafat alfi num qide.

¹⁶ Too waqdi tirtiriseeh, «Rabe dananih qangabbit alfi num qide. Danan lafat alfi num qide. Raysa tittin bagul keenik hee» axcuk tirtirise.

¹⁷ Tohuk lakal danan-qangabbi wonnah baaxot qide. Aham elle tekke arac migaaqah Ramat-Laci deqsitak yen.

¹⁸ Sarrak Samsoon kaxxam bakaariteeh; too waqdi YALLAL weeqeeh iyyemii, «A gid takke qande yoh teceeh iisa yoh tecee. Takkay immay bakaarah rabam faxaah, a diini-maleelah tan *Filistiin yoo tabbixem faxxa, YALLAW» iyye.

¹⁹ Tohuk lakal Yalli Laci deqsita aracal baaxo boohayseeh tokkek lee tewqe. Samsoon too leek yooqobeeh, too waqdi nagay yekke. Too buyyik migaaqah Qen-Cakkoore 'yaanam iyyen. Woo buyyi uxih Laci deqsita aracal elle yan.

²⁰ Filistiin mari baaxol ackumuk yen dabaanal, too baaxol Samsoon Israayil mara miraacisak labaatanni sanat suge.