Makaabon 12 - NABUWWA KEE MALIKWA

YEFTAC KEE EFRAYIM-KEDOH YOOBOKE MARA

¹ Efrayim mari qeebih bical gace. Ordon weeqaytuk tabba 'yeenih Xafon deqsitta magaala fan yemeeten. Tokkel Yeftacak iyyeenimih, «Qammon marat qeebi abta'gidih gexxe waqdi, qeebih ne'lih gexa 'yaanam nek axce'kal, nee cabba hayteh akah gexxem macaay? Addat akak tan qari amok kol cararise wayya haynek, abletto» kaak iyyen.

² Yeftac keenik iyyeemih, «Yoo kee yi mara, Qammon-mara lih kaxxa tittin way luk sugneeh; too saaku siinih seeceh suge'mmay yoh mamatrinniton.

³ Catoh amaate yoh wayteenim uble waqdi, ‹Ahaysa faxem yot takkay› exceeh, qeebi keenit aba'gidih cuduud keenil tabe. YALLI too qeebil keenik yoo yiysiiseh. Tu elle tekkem tonna'mmay, taway isin qeebi yot abtaanam akah faxxaanam maaxiga» iyye.

⁴ Sarrak Yeftac Gilqad marah secca 'yeeh, Efrayim marat qeebi abe. Too qeebil keenik yeyseh. Efrayim mari dumah yan saaku Gilqad marak, «Gilqad maraw, isin Manasse kee Efrayim maray kudeenihiyya kinniton» 'yaanam iyyeenih yenen. Tohuk gexxaamah qeebi keenit aben.

⁵ Efrayim-mari akak kuda gita yabbixeeni'gidih, Gilqad-mari Ordon weeqaytuk akak taben afa keenik yibbixen. Efrayim-mari tokkek tabam faxa waqdi, Gilqad-mari tabeenak afal keenih suggu 'yeh, kulli numuk, «Efrayim num maay kinnito?» kaak axcuk sugen. «Aleey hinniyo» iyyekii,

⁶ «Hay, ‹Shibbolet› inxicey» kaak axcuk sugen. Takkay immay hununuh tonnah axce wayya heeh, «Sibbolet» iyye kaa tekkek, Efrayim num kinnim elle kaak aaxaguk yenen. Too waqdi xabba kaa heeniih, Ordon weeqaytu akak taban tabeenal elle kaa qidak yenen. Tonnah abak too saaku Efrayim marak morootom kee namma alfih num rabe.

⁷ Yeftac Israayil marak makaabantuh lica sanat suge. Sarrak rabe saaku, Gilqad rasuy elle yoobokehiyyal kaa yoogoqen.

IBXAN KEE EELON KEE QABDON

⁸ Usuk rabek lakal Ibxan deqsita numuy Beetlacamal yoobokehiyya Israayil marih makaabantu yekke.

⁹ Too num xaylok lab xayloh soddom kee, say xayloh soddom luk yen. Say-xaylo isi gulub hinna'mmay, aki marah rihimih yeceeh; lab-xaylo kaadu aki gulubuh rihmise. Ibxan Israayil ummatak malcina sanat abbah sugeeh,

¹⁰ rabe saaku Beetlacamal kaa yoogoqen.

¹¹ Kay lakal Eelon deqsita numuy Dablon kedoh yoobokehiyya tabna sanatah Israayil marih makaabantu yekke.

¹² Rabe saaku Ayyaalon deqsitta magaalay Dablon marih rasul tenehiyyal kaa yoogoqen.

¹³ Kay lakal Qabdon deqsita num makaabantu yekke. Qabdon Hillel deqsita numih baxak teneeh; Firqaton deqsitta magaalal yooboke.

¹⁴ Qabdon lab-xaylok morootom luk yeneeh; xaylô-xaylok kaadu lab-xaylok soddom luk yen. Kay xaylo kee xaylô-xaylo gexxa way malcina-tabanih dananal gexak yenen. Bacra sanat Israayil abbah sugeeh;

¹⁵ sarrak rabe saaku, Efrayim rasul Qamaalek mari elle yen qaleela mango baaxol, Firqaton deqsitta magaalal, kaa yoogoqen.