Makaabon 10 - NABUWWA KEE MALIKWA

TOOLAQ DEQSITA MAKAABANTU

¹ Abimalik rabek lakal, Fuuwâ-baxi Toolaq, Israayil isi naqboytitteh gabak yayyaaqe'gidih yemeete. Toolaq Doodô-baxih baxak ten. Akah aabakuk yenem, Issakar deqsitta kedok teneeh; guubuh elle sugem, Saamir deqsita aracay Efrayim baaxok qaleela le kabut raaqa rakaakayal yenehiyya.

² Usuk labaatanna kee sidiica sanatah Israayil-abbah suge. Rabe saaku Saamir deqsita aracal kaa yoogoqen.

YAAQIR DEQSITA MAKAABANTU

³ Toolaqak lakal Yaaqir ciggiile. Yaaqir elle yoobokem, Gilqad deqsitta baaxol ten. Labaatanna kee namma sanatah Israayil abbah suge.

⁴ Soddom dananak amot gexxa lab-xaylok soddom luk yen. Oson kaadu Gilqad rakaakayal soddom magaala luk yenen. Woo magaalooli a saaku fan Yaaqir-magaalooli deqsitta.

⁵ Yaaqir elle rabeeh elle yoogoqeenim, Kamoonu.

QAMMON MARI ISRAAYILIT QEEBI ABE

⁶ Israayil mari fiiruk geerah Baqal kee Qastarot deqsittam aqbuduk yeneeh; tonnah kaadu, Suuriya kee Saydaay Mooyab kee Qammon kee Filistiin mari yalla 'yeh yaqbude duyye aqbuduk yeneeniih; tohih sabbatah YALLAL dambi lem baahen. Oson YALLA hawweeneeniih kaa yaqbudeenim cabeenih.

⁷ Tonna-leemiik YALLI ken yinqibeeh; tohih sabbatah Filistiin kee Qammon mari qeebih keenik iysissa heeh reedah amol keenik hee.

⁸ Taban kee bacra sanatah, Amoorâ-baaxok Ordon weeqaytuk ayrô-mawqa le kabut raaqa Gilqad deqsita rakaakayal, tikki 'ya Israayil marat xukkuteeniih xakaake ken kalen.

⁹ Qammon-mari kaadu, Yuuda kee Benyam kee Efrayim kedoodat qeebi abaana'gidih, Ordon keenil taben. Israayil mari kaxxa gadaamah addat suge.

¹⁰ Too waqdi Israayil mari, YALLAL weeqeeh iyyeemihii, «YALLAW, kooy ni Dagelta kinnihiyya cabneh; Baqal akak iyyeenim nuqbudeeh dambi lem kol bahneh nan» iyyen.

¹¹ Too waqdi YALLI keenik iyyeemih, «Duma yan saaku Masri mara kee Amoorah maraay Qammon maraay Filistiin mara kee

¹² Saydâ maraay Qamaalek kee Maqon mari siinit xukkutak suge. Tohuk yol weqteeniih; anu too waqdi oson siinit abak sugen xukkok sin cateh.

¹³ Hay, yooy toh siinih abah yanihiyya cabba hayteenih xeet kee cooxuk bicsen tumammeh qibaadat gacteenik, tahak wadir tu siinit takkeemih sin macataay;

¹⁴ isin isinnih dooritten duyyeeyay taqbudeenihiyyal weeqa. Gadaama sin tabbixe way too duyyey taqbudeenihiyya sin cattay» keenik iyye.

¹⁵ Israayil mari too waqdi YALLAK iyyemii, «Nanu dambi lem bahneeh; sarrak faxxem nek ab immay, awayih ibak a umaanek nee cat» kaak iyye.

¹⁶ Sarrak aqbuduk sugen duyye baaxot qideenih, YALLA yuqbuden. YALLI Israayil marat yakke gibdaabina qansiise cineh.

¹⁷ Sarrak Qammon mari qeebih bical gaceeh; Gilqad deqsita aracal yinfiddigen. Israayil mari kaadu titta lih gacca 'yeh yemeeteeh, Gilqad rakaakayak Mixfa deqsita aracal yinfiddigen.

¹⁸ Tohuk lakal Gilqadal ten Israayil-kedoh-abbobti titta esserteemih, «Qammon mara lih abnu wayna qeebik foocat iyyi neh gacelee? Ta qeebik foocat gacinnaan num Gilqadal enna 'ya marih abba akkele» iyyen.