Makaabon 1 - NABUWWA KEE MALIKWA

KANQAAN MARAT ABEN QEEBI

¹ Yoosuwa rabek lakal Israayil mari *YALLAK iyyeemih, «*YALLAW, Kanqaan baaxo naharak nek tabbaxu waytam iyyay?» iyyen.

² *YALLI too yaabal keenil gacseemih, «Yuudah yooboke mari gexxa 'yeh yabbixeemi; a baaxo akah acayu waam keeni» iyye.

³ Sarrak qeebi gexoh bical gacen waqdi, Yuudah yooboke mari Simqaanah yooboke marak iyyeemih, «A saaku qeebih ne'lih gexaay; sin saaku kaadu baaxo tabbixeeni'gidih gexxan waqdi, sin lih gexennooh sin gaaduk maraqna» keenik iyyen. Simqaan mari toh keenik macininnay, meqeh, iyyeeniih;

⁴ tonna-leemiik Simqaanah yooboke mari too gaaduh ken lih gexen. YALLI too qeebil nasri keenih yeceeh, Kanqaan kee Feriidah yooboke marak yeyseenih. Bedek deqsita aracal tabna alfih numuk yeysen.

⁵ Adoonibedek wokkel geeniih qeebi kaat aben. Tonnal Kanqaan kee Feriidah yooboke marak yeysen.

⁶ Adoonibedek keenik kudeeh; takkay immay lakak kaa ayradduk suggu 'yeenih ellecabol kaa yibbixeeniih, iba kee gabak kaxxa-gili kaak kalen.

⁷ Sarrak Adoonibedek iyyeemih, «Malcina tabanih malikiy iba kee gabak kaxxa-gili akak kalehiyya anu maaqo elle akme miizih gubal yok radda maaqoh buluula onkoysak akamuk yeneeni'mmay; anu keenil baahem a saaku Yalli yok gacseh yan» 'yaanam iyye. Sarrak woo num Yarusalaam magaala fan beeniih; tokkel rabe.

⁸ Yuudah yooboke mari Yarusalaam magaalat qeebi abeenih, woo magaala woo qeebit yibbixen. Magaalal suge mara qideeniih, magaalat gira ruuben.

⁹ Tohuk lakal qaleela mango rasu kee mango koomaami le baaxo kee gabbi-qaxat raqta baaxoy bacarih tanil dabaaqah yen Kanqaanah yooboke marah gaaduh gexen.

¹⁰ Sarrak kaadu Kanqaan maray Cebron magaalal sugehiyyah gaaden. Cebron magaala too saaku Kiryat-Arbaq deqsitak ten. Tokkel Sesay kee Aciiman kee Talmayi deqsita sidiica gulubuh anuk yeneeniih; Yuudâ-mari qeebil keenik yeyseh.

¹¹ Tokkeek gexeeniih kaadu Dabiir deqsitta magaala fan gaaden. Too magaalak too saaku migaaqah Kiryat-Sefer axcuk yenen.

¹² Gaaduh elle gexen ikkel, ken addak migaaqah Kaalib deqsita num iyyeemih, «Kiryat-Sefer qeebit yabbaxu waa numuh inni baxáy Qaksa deqsitta digibih aceeyyo» iyye.

¹³ Toh yoobbe waqdi Kaalib-toobokoytih-baxay migaaqah Qotniyel deqsitahiyya woo magaala yibbixe. Too waqdi Kaalib isi baxá Qaksa digibih kaah yecee.

¹⁴ Digib yekke saaku, qibna qaruusuk inteemih, «Yi abbak baqurê-baaxo neh acuya innek, maca le?» kaak inte. Qibna edde sugte danan amok obba 'teh, abba fanah temeete. Too waqdi tet abba, «Maca faxxa, yi baxáy?» teetik iyye.

¹⁵ Is kaak inteemih, «Yi abbaw, barkatah, lee le baaxo yoh teceem kok faxa. Duma atu yoh tecee baaxo lee elle tan baaxo hinnak, lee le baaxo yoh ucuy» kaak inte. Toh kaak inte waqdi, daga raaqa buyyi kee guba raaqa buyyi teetih yecee.

¹⁶ Keena deqsita maray Muusak ballah yanihiyya, Yuudâ mara lih, Nakli le Magaalay Yeriko deqsittahiyyak gabbi-qaxal Yuudâ-baaxok bacarih tan baaxoy migaaqah Qarad deqsittahiyya fanah yemeeten. Tokkel suge mara lih dabqah gacen.

¹⁷ Yuudah yooboke mari Simqaan-mara lih gacca 'yeh Kanqaan maray Dafat deqsitta magaalal sugehiyya gaaden. Qeebil too marak yeyseenih. Magaala abaareeniih; tet bayseenik sarra, woo aracak migaaqah Corma teetik iyyen. Maqna akak baati 'yaanamah tamaate.

¹⁸ Yuudah yooboke mari kaadu Gaada kee Askalon kee Ekron deqsitta magaalooli kee too magaaloolih dariifal tan baaxo yibbixen.

¹⁹ YALLI Yuudah yooboke mara cateeh; qaleela mango baaxol yen mara wokkek xiiriyeenih, ken baaxol gacen. Takkay immay baddi dariifal yen mari biriitak bicsen gaariira luk yeneeniih; tohih sabbatah Yuudâ mari keenik iissa 'yeh baaxok ken yayyaaqem maduudinnon.

²⁰ Muusa ken elle amrissa hee innal, Cebron-magaala Kaalibih yeceen. Kaalib duma woo magaalah adda sugte Qanak deqsitta kedoy sidooca gulubuk raddehiyya tokkek yeyyeeqe.

²¹ Benyam marah tu gactek, Yabuusah yooboke maray Yarusalaam addal sugehiyya woo magaala yibbixen saaku mayyaaqinnon. Tonna-leemiik Yabuusâ-mari, Benyam-mara lih too magaalal elle raaqen.

^22-23 Efrayim kee Manasseh yooboke mari, Beetal deqsitta magaalay dumah Luud deqsitak tenehiyya yabbixeenim faxen. YALLI woo gaadul ken cateh. Sinam gibah woo magaala fan ruubeeniih;

²⁴ a mari magaala gufe waqdi, wokkek num awaquk keenih suge. Woo numuk iyyeenimih, «Kol bahnam mannuk, a magaala akak cula'kke nee uybulluyey» kaak iyyen.

²⁵ Too num toh ken yuybulleeh; tohuk wadir Efrayim kee Manasseh yooboke mari too magaala gaadeeniih, magaalal suggu 'ye mara inkih qiden. Too numuy magaala elle culan inna keenih warse kee, kay buxah marak kalih mara qideenih num macabinnon.

²⁶ Too num sarra Ciitâ baaxo fan gexeeh, tokkel magaala xiseeh, woo magaalak migaaqah Luud iyye. Ta saaku fanah too magaala migaaqah Luud deqsitta.

²⁷ Manasseh yooboke mari, Beet-Saqan kee Taqnak kee Door kee Yiblaqam kee Magiddo kee wohih dariifal tan gaandoodil suggu 'ye mara mayyaaqinnon. Kanqaan mari tokkel elle raaqe.

²⁸ Sarrak Israayil-mari qande baahak elle baahaamal, ken dirkisak isinni taamah mara ken aben. Takkay immay baaxok ken mayyaaqinnoonuy, yanoonay ken iyyen.

²⁹ Efrayim mari kaadu Kanqaan maray Geser deqsitta magaalal sugehiyya mayyaaqinnoonuy, elle yanoonay ken iyyeeniih; too mari too magaalal elle ken lih raaqe.

³⁰ Dablon mari kaadu Kitron kee Nahlol deqsitta namma magaalal suge Kanqaan mara mayyaaqinnoonuy, yanoonay iyyen. Takkay immay dirkih isinni taamah mara ken abeeniih; keenih taamitak elle raaqen.

³¹ Aaser mari kaadu Qakko kee Sayda kee Aclab kee Akdib kee Celba kee Afeek kee Racob deqsitta magaaloolil suge mara mayyaaqinnoonuy, yanoonay ken iyyen.

³² Woo baaxoh yooboke Kanqaan mara baaxok mayyaaqinnoonuuy; tonna-leemiik too mari too magaaloolil ken lih anuk yenen.

³³ Naftaali kaadu Beet-Semes kee Beet-Qanat deqsitta namma magaalal suge mara mayyaaqinnoonuuy, yanoonay ken iyyen. Too kedo woo baaxoh yooboke Kanqaan mara cabeenih mayyaaqinnoonu'mmay, isinni taamah ken dirkisak isinni taamah mara ken aben.

³⁴ Amoorah yooboke mari, Daan-mara qaleela mango baaxo fanah dirkih ken gacseeniih, tokkeek addah booxaaxih tan baaxo fanah oobe ken kalen.

³⁵ Amoorah yooboke mari Ceres deqsitta Qale kee Ayyaalon kee Saqalbim deqsita aracal elle raaqen. Takkay immay Efrayim kee Manasseh yooboke mari reedah amol keenik gacca 'yeenih, ken dirkisak isinni taamat ken heen.

³⁶ Amoorâ-marih cuduud, kilbat le kabul Silaq deqsita aracak Igix le Daaba deqsita arac fan beyak raaqa.