Hosiqa 9 - NABUWWA KEE MALIKWA

DIGAALA ISRAAYIL MARAL OOBELE

¹ Hosiqa iyyeemih, «Israayil ummatey, qiidih assan saaku diini-maleela akah abta'nnah maabinaay; kaxxam ruffa maxcina. Isinni Dageltak texxeereeniih, kaal luk sugten imaan siinik yeerreeh; qusbih orbisen daro kee caffa tittak elle meexxan aroocal, migaaqah Baqal akak intaanamay raabitteenihiyyah qibaadat gacten. Daro Baqal siinih yeceem takkalen; yoo cinten.

² Takkay immay ama away liton daro kee *daytuun kee qinab edde waytoonu waytan wakti maxeeri.

³ Israayil mari a YALLIH rasul maraaqay, ahak sarra Masri fanah aduurelon. Assuuriyal caraamak tan maaqoh gacelon.

⁴ Too baaxoy kenim akke waytahiyya gexoonu waan saaku, qinabak bicsen kamri YALLIH sadgatah acayuk maraaqan. Sadgatah saq qidaanamah YALLI keenik maraabita. Tonnah yan sadgat woo saaku akminnaan numul caraamu akkele. Rabe numih migaaqal yakmen maaqoh gide keenil akkele. Satqak bagi kibah yakmen maaqoh gidek keenih loowimele. Oson sadgatah qidan saqih cado, YALLIH Qibaadah-Qaril aban sadgatah keenik moorobta.

⁵ YALLIH qiidih ayro ta mari maca migaqsitele?

⁶ Ken baaxo bayisu waa saaku, yasillimu waa mari Masri baaxol gexeleeh, magaqah Moofu deqsita aracal ken aaguqelon. Oson duma yedderen qado-lakqo elle luk sugen arooca kee, dabaaqah edde sugen buxaaxi elle ten aroocal, keenik waaqex kee sissib aabukele.

⁷ «Digaala siinit edde takku wayta uddur xayyooweh. Too saaku siinih taguude digaala siinit akkele. Sin garil nabi duquruuy; Yallih wacyi elle oobe num cissit ane waa numuh tablen. Kaxxa dambit asseenimih sabbatah, nabi kaxxam niqibton.

⁸ Nabi, Yalli Israayil ummatay kay marah tanihiyyah aylahu kaleh, takku waytam keenih warsa'gidih ruube numu. Tohuh isin kaa ablinnaan waqdi, kimbiro oflot elle yabbixen innal, kaa tabbixeenim faxxaanaah, Yallih Qibaadah-Qaril kaa tinqibeenih.

⁹ Gibqa deqsita rasul akah abak sugga iyyen innah, umaanet badih innah sutta 'ten. Yalli isin aben dambi uxih digga haah, uxih mahawweeninnaay, sin dambih sin digaalele» iyye.

ISRAAYIL EDDE ASSE DAMBIH GALTO

¹⁰ Yalli iyyeemih, «Israayil ummat naharak gee saaku, bacaril tooboke qinab caxah bis luk yenen. Sin kaxxa abbobtiy isin akak raddeenihiyya, coox elle yaabuke waktil naharat xalte *sublaytoh bis luk yenen. Takkay immay Faqor deqsitta qale yemeeten saaku, Baqal akak iyyan duyye Yallah haysiten. Ableh uma qibaadat gacca 'yeenih, uma ceelot aseenimih sabbatah, uma mara yekken.

¹¹ Israayil mari luk yen kaxxa nabna, bar yublen soonoh innah, saaku mamaacissa. Tahaysa xaylo maxalaanaay, agbi keenik mayaadiqaay; mayandarran.

¹² Dadlisen xaylo kinni way, num raaqe'kal keenik beeyyo. Ta marat darre cabu waa saaku, woyyow keenil obtu waytaamak!» iyye.

¹³ «Israayil, Suur innal qaxa le baaxo anih ableeh, takkay immay away ken xaylo masgaada beelon» iyye.

¹⁴ Nabi Hosiqa iyyeemih, «YALLAW, a marak maca abeh meqe? Agabu fanak keenik xalisay, angu keenik kafis» iyye.

¹⁵ Yalli iyyeemih, «Oson umaane elle qimbiseenim, Gilgal deqsita araca. Anu naharak ken inqibem too ayrok ten. Oson aben umaaneh sabbatah, inni baaxok ken ayyaaqeyyo. Ken abbobti yi yab cinteh immay yok kaadu keenih luk suge kacni gaba kaleh.

¹⁶ Israayil mari buxux akak kafe caxay xaylo xale wayta yekken. Xaylo maxalan. Xaleenik kaadu kaxxam kicnon xaylo keenik qideyyo» iyye.

HOSIQA ISRAAYIL LIH ABE YAABA

¹⁷ Hosiqa iyyeemih, «Yi Dagelti isi mara cinele. Ken akah cinu waam, kay yab cineenimih sabbata. Marin baaxol marin marih addat meekita mara akkelon.