Hosiqa 8 - NABUWWA KEE MALIKWA

YALLI ISRAAYIL ABTE MAKOT YAABA

¹ YALLI kaadu qagseh iyyeemih, «Baanta nagay kaayisa. Qawi qaraanak raarisak elle yamaate'nnal, naqboytit baaxol raarisak yi marat tamaate. Yi ummat anu ken lih hee bica yol makteeh, anu aba keenik exceemit darre cabte.

² Israayil mari, ‹Ni Dageltaw, nanu koo naaxigeh› yok iyyaanah immay,

³ meqeemit maasan. Tohih sabbatah naqboytit ken tayradde.

⁴ «Yi mari malikwa keenih yekke mara isinnih dooriteeni'mmay, woo dooro yoo maleh, isinni amok aben. Abbobti keenik yakku waa mara dooriteenih immay, woo dooro keenik moggoliminna. Buxal luk sugen qado lakqo kee dahabak, yalla axcuk yaqbuden duyye bicsen. Too duyye baati keenil baahele.

⁵ Samaariyal yan maraw, dahabak bicsen daheltih ceeloy taqbudeeni ablem mafaxa. Tah aba mara anqibeh. A mari taahirik tan taama abu waam, maa saakuk tan kaa?

⁶ Israayil mari yaqbudem, num gabak bicse duyye ikkalah Yalla hinna. Samaariyal yan mari yaqbude daheltih ceelo bututtukku heelon.

⁷ Umaane yaysubukeenih, kaxxa umaane ken geele. Orbise ween darok gaqambo mabicsan. Daro orbiseenih gaqambo akak bicseenik, marin baaxoh marih gadda keenik akkele.

⁸ Gersi rasih mari Israayil yunxuqe. Israayil mari gersi rasih marih innal gaceemih, kallak bicsen buutiy yiddigille yekken.

⁹ Yabti cinah dabookali yekkeeniih, isinnih faxen gitat gexa mara yekken. Assuuriyah rasu fan catô-goranah gexeeniih, doolatwak nee catah guqul yeceen.

¹⁰ Tonna'mmay ta saaku yakkeenimik gaabossa ken heeh, ken digaaleyyo. Assuuriyah malik keenit xukkutu waa saaku, keenit yakkeh yan biyaakah iihiselon.

¹¹ Dambi-kalootuh sadgat elle aboonuh, mango qibaadah-arooca elle xisaanamal, dambi keenik amagguk yamagge.

¹² Ummat mango baritto barsa. Takkay immay tu xiqe waytaah foyyâ-baritto tet aban.

¹³ Yi migaaqal sadgatah saq qidan. Qiden saqih cado yakmen. Takkay immay yooy YALLA kinni ken inqibeh, ken faxah maan. Oson baahen dambi aaxaguk ken akah digaaleyyo. Akak yemeeten Masri fan ken gacseyyo.

¹⁴ Israayil mari malik qarwah xiso yeexegeh immay, ken gine Dagelta hawweeneenih. Yuudâ mari, meqe magaalooli dacayrih xisen. Oson malikwah xisen qarwa kee magaalooli keenik bayissa gira keenil ruubeyyo» iyye.