Hosiqa 7 - NABUWWA KEE MALIKWA

¹ YALLI iyyeemih, «Israayil ummatay yi marah tani catam faxaah, maqaane keenih abam faxinnaan waqdi, aaminnaan taama kee gacca intaamat asah ken able. Titta ayrisan. Sahdâ-buxaaxi garqan. Sahda giti addal radan.

² Anu oson abba heen umaane aaxigem mayaaxigan. Oson abba heen dambi marot ken yabbixe. Oson aban taama yok maqellitta» iyye.

ISRAAYIL MALIKWA EDDE ASSE UMAANE

³ YALLI iyyeemih, «Ummat uma-taamat assa waqdi, malik kee kay gubal tan doolat abbobti inkih ruffa intaah, ken dirab kicnon.

⁴ Ummat inkih makô-mara tekkeeh, yaamineenim cabteh. Oson, gaqambo elle alaysaana'gidih yoskonoonocen giray barge waytahiyyah bis lon.

⁵ Malik xigla edde abe ayro, kaal malse mari kaa kee kay gubal tan abbobti qinab-kamrit iskirra 'teh hangi keenik akah gexa innah aben. Usuk kaal malse mari abah yan anqaasat gaba yessegelle.

⁶ Oson muufê girah bis lon. Gidiidin bar inkih ken naqbi ankonoonocuk xinna 'tah, saaku urta girah gide.

⁷ Abeenih yanin bagcarrah isinni abbobti qideenih. Isinni malikwak numuuy way keenik qideeni'mmay, num keenik cato yol messerinna» iyye.

ISRAAYIL KEE CUGGAH KEENIK TAN DOOLATWA

⁸ YALLI kaadu iyyeemih, «Israayil mari gambi akak alaye wee gaqamboh gide. Dariifal keenik yan mara lih gacca 'yeenih yoomen.

⁹ Too mari qande ken waysiiseemit isinnik maradan. Qumri keenik sugu waam dagoh gide kinniimit maradan.

¹⁰ Israayil maral, loonuh yanin kaxxiina sumaaqitta. Mangom keenit tekke'mmay, tohuh, yooy YALLAAY keenik kaadu Dagelta kinnihiyyal maaduurinnon.

¹¹ Israayil mari hawri cabeeh, kimbir innah meekita. Way catoh Masri mara fan yardeeniih, way kaadu Assuuriyah mara fan yarden.

¹² Takkay immay kimbir innah oflo keenih qideh, too oflot ken abbixeyyo. Inki ikkel gaabooweenih aben yaabal, ken digaaleyyo.

¹³ Bayeenih! Yi yab cineeniih, yoo cineenih. Ken catam faxeh immay finqitelon. Makot yoo yuqbudeeniih, tohih sabbatah bayelon.

¹⁴ Afqadook yoo maqbudinnon. Dooqa aban waqdi, gitat tet maaban. Takkay immay daffa 'yeenih diini-maleela akah abta'nnah, waxxaq axcukuuy boogisak aban. ‹Baaxol daro kee qinab nee mawaysiisin› axcuk dooqa aban waqdi, diini-maleela akah abta'nnah, xagar isinnik qanxisan. Yoo cineeniih darre yot caben.

¹⁵ Ken teynebeeh, ken qande bahsissem yook tene'mmay, yok aboonu waanamah malat gacen.

¹⁶ Yoo cabba heenih, yoo akke sinniimiy hebeltohim xiqe waytah qibaadat gaceenih, makot tan gaysey tu anfiqe wayta yekken. Ken abbobti kaxxam kaxxiinitta'mmay, uma rabah rabeloonuuh, Masri mari keenil anqaasah rabelon» iyye.