Hosiqa 6 - NABUWWA KEE MALIKWA

UMMAT CELSISSOH ABEN TOOBA

¹ Ummat intaamah, «Ahaysa YALLAL nadaaru wayna. YALLI nee biyaakeh immay nee qaffoysele. Nee mudeh immay dale neh urusele.

² Namma ayro kee sidiica ayrot, mano net gacseleeh; kay xaqul anenno.

³ YALLA naaxagay. Kaa naaxige'gidih, digga innay. Tonnal, barak lakal maaci maacisam akah naaxige'nnah, YALLI nel amaatelem digga hayna. Dabayba kee sugum rade rob baaxo akah doogisa'nnah, YALLI rooci nek aqusbuusele» iyyan.

⁴ Takkay immay YALLI iyyeemih, «Israayil kee Yuudah ummatey, maca siinik abu? Yoh liton kacni saaki-silaalo elle gexxa'nnal, siinik gexa. Ayro laqta way taarre saldah innah, siinik yeerreh.

⁵ Inni nabuwway farmo gabat le sin fanah ruubeeh, uma cokmi kee baati siinit akkelem siinih akah warsem tohu. Anu siinik faxam qellu lem hinna.

⁶ Anu siinik faxam, kulli way yoo takcineenimi'kkal, saq sadgatah yoh qiddaanam hinna. Anu inni marak sadgatah qiden saqih xayta carrisaanah qaydarus ruubaanam hinna'mmay, yoo akah yaaxigen innah keenik faxa.

⁷ «Adamak kaxxih a mari ken lih heeh suge bica yol makeh.

⁸ Gilqad deqsitta magaala, umeynit kee biileenit dabaq tekke.

⁹ Seeka, siftay sinam qidimih raarissa tekke. Seekem magaala fan beya gitih addal kinni way sahda qidan. Makkook kaxxa umaane aban.

¹⁰ Israayil addal, ableh uma umaane akkih able. Yi mari duyyeeyâ-qibaadat gaceeh nadaasa is abe.

¹¹ «Tonna'mmay sin tiyah tu gactek Yuudâ maraw, sin edde digaalu waa wakti eexegeh aniih, abba haytaanamah sin digaaleyyo» iyye.