Hosiqa 5 - NABUWWA KEE MALIKWA

¹ «Seekay, ankacisa. Israayil ummatey, axcem oobbeya. Malikwa kee keenih ramad le maraw, edde yaaba yab ayti yoh acuya. Abtan cokmi qadaalatat abtaana'gidih, siinil yontocowweh immay, woh maabinnitoonuuy; tonna leemiik isin abba haytan cokmi siinil aduurele. Mixfa deqsita aracal, sahdah oflo tekken. Taabor qaleh amol, sabakat kullum elle yabbixen innal sahda tabbixen.

² Tikible-magaala deqsitta magaalah addal, sahda addat akak radda adda xer boodo tekkeeni'mmay, takkeenimik sin digaaleyyo.

³ Israayil addal tekkem nagay aaxige. Israayil yok edde tambooqore'kke mali. Imaan keenik yeerreh yi qibaadah mabican. Nadaasa is abte» iyye.

HOSIQA UMMAT ABTE DAMBIT YAABE

⁴ Hosiqa iyyeemih, «Ummat abtam Yalla fan adaari ken haytah matan. Oson xeet kee cooxuk bicsen duyyeh abak sugen qibaada Yallak ken teyxeereh. YALLA yaaxagoonu cineenih.

⁵ Israayil mari le kaxxiina, kinnon mara keenik taybullee. Ken dambi ken yaydafoofoleeh, ken yankiseh. Yuudâ mari ken lih annikissele.

⁶ Yallih sadgatah illi kee laa qideloonu'mmay, toh tu keenit mahayta. YALLI ken cabeh ikkal, kaa mageyan.

⁷ Oson xalan xaylo ilmu kinnuk, YALLA lih luk sugen xagana makeenih. Tohih sabbatah ken kee oson elle sugen baaxo alsi-bilot bayele» iyye.

YUUDA KEE ISRAAYIL MARIH FANAL QEEBI RADELE

⁸ Hosiqa kaadu qagseh iyyeemih, «Gibqal baanta ugura! Raamal turumba kaayisa! Beet-Awen deqsita aracal qeebih tirtirisa! Benyam maraw, qeebih ittikiya!

⁹ Israayil ummatey, digaala siinit edde takku wayta ayro xayih. Israayil foyya akkele. Israayil ummatey, tah nummaak takku waytaama» iyye.

¹⁰ YALLI iyyaamah, «Yuudâ marih abbobti Israayil baaxo geyta'gidih, cuduudul suge xeet kala marih innal tekke. Tohih sabbatah yi bagcarra weeqi innah keenil oobiseyyo.

¹¹ Israayil mari tu xiqe sinni xeet kee cooxuk bicsen duyye kaxxam faxaanamih sabbatah, xukkot yaniiniih, too digaalah biyaakat yanin.

¹² Irimbi caxa elle baysa'nnal, Israayil ummat bayseyyooh; Yuudâ maral abicte dale innah keenil aameyyo.

¹³ «Israayil ummat biyaakittu waytaah, Yuudah ummat daleela lem isik tabalu wayta saaku, Israayil catoh Assuuriyah malikil gexele. Takkay immay biyaakak ken macatay; daleelak ken muurusa.

¹⁴ Israayil kee Yuudâ marat lubak qeebi elle aba'nnal keenit abeyyo. Anu innih rike rikeh kurra ken heeh ken cabeyyo. Ken hirriigisu waa waqdi, num ken macata.

¹⁵ Yi mari dambik abeenimil yoo qaddoowe'kal, keenil maaduura. Gadaamah addat yanin waqdi, yoo kassiteloonuuh yoo gorriselon» iyye.