Hosiqa 4 - NABUWWA KEE MALIKWA

YALLI ISRAAYIL MARI ABA UMAANET YAABE

¹ Israayil ummatey, YALLI siinik iyyaah sin akah sahitam oobbeya. YALLI siinik iyyaamah, «A baaxol yan mari imaan cabeh yan. Kacni keenik yeerreh yan. Yalla kinniyom yok mayaaxigan.

² Xagana akah culeenim maduudusan. Diraabat yaaban. Sahda qidan. Garqa abaanah dalwat asan. Biili biiluk yembeggeh. Sahda kulli ayro titta qidak assa.

³ Tohih sabbatah baaxo kafele. Baaxô-bagul sugga 'tem inkih boolaatak boolaatele. Alak alaakulleyti inkih ambaxele. Kimbir kee kullum selliimele» iyye.

YALLI SEEKA ABTAAMAT YAABE

⁴ YALLI kaadu iyyeemih, «Cubbi abita. Sinaamak inkih tu waa mara makkina. Yoh tu gactek anu seekak wayto liyo. Isin seekak,

⁵ bar kee laqo adaf sin geeleeh; nabuwwa kaadu sin innah andafoofele. Inâ baaxo siinik bayseyyo.

⁶ Yi mari yoo aaxige weenimih sabbatah bayele. Isin kaadu seekak, yooy sin Dagelta kinnihiyya siinih eyyeeqe xinto cinteenih yoo cinteenih. Tohih sabbatah anu kaadu sin cineeh, sin xaylo yi seeka matakka.

⁷ «Isin seekak, elle andarruk tandarreenimil, abtan dambi siinik amagguk yamagge. Tohih sabbatah meqe migaq elle luk tenen ikkel qaybik sin qideyyo.

⁸ Yi mari abah yan dambi kalootuh orba sadgat siinih gaddaliino xale. Tohih sabbatah uxih mango dambit asaanam keenik faxxan.

⁹ Sinaamak kaxxih digaala siinit akkele. Sin inkih digaaleyyooh, abba hayten umaane siinil gacseyyo.

¹⁰ Maaqo geettoonu'mmay, qulul sin macaba. Xalay fayxih, gabak bicsen duyyey yallah litoonuhiyyah qibaadah aracal dalwa abak sugteeni'mmay, xalay mageytan. Macaay inteenik, yoo cabba hayteenih yalla axcuk duyyeeya tuqbuden» iyye.

YALLI GABAK BICSEN DUYYEH QIBAADA ILAAQEH

¹¹ YALLI kaadu qagseh iyyeemih, «Qinabak bicsen qusba kamri kee suge kamri yi marak kas beeh.

¹² Caxxak-kuren-exxa, Yallak tu keenih bahtam yakkalen. Caxxi oson faxaanam keenih warselem yakkalen. Ken Dagelta cabba heenih, kacoobuh lon kacanu kee, xeet kee cooxuk bicsen duyyet aban qibaada, makot ken beyte.

¹³ Qaleelah amol tan aroocal sadgat aban. Koomaamih amol silal meqeeh ayyuufa le caxah gubal qaydarus qeerisan. Too qaydarus woo cooxih gubal akah qeerisaanam, woo cooxih silal keenit yemqek sa. Tonna kinnuk siinik say-xaylo kacob tekke. Sin xayloh agbi dalwa aba.

¹⁴ Tohuh, anu ahah ken madigaala. Macaay inteenik, isin isinnih qibaadah qarih addal xiiqareh-xiina lih xintaanah, tonnah kaadu, ken lih gabak bicsen xeet kee cooxuh sadgat abtan. Missilah, ‹Hawri sinni mari finqitah› 'yaanam tan. Toh numma.

¹⁵ «Isin Israayil maraw, yoo ganteenih. Yuudâ mari sin akke way! Gilgal kee Beet-Awen magaaloolil qibaada maabina. Yi migaaqay waarahiyyal maxiibitina.

¹⁶ Israayil mari yabti cinah lac yekken. Hay, ta mara qayso yayloolen marqih innah mannal ken aylooleh dacrisaa?

¹⁷ A mari yi aftok xeet kee cooxuk bicsen duyyet aban qibaadah milkih gacen. Ahaysa yanoonay ken inxica.

^18-19 Qinabak bicsen kamrik cayya iyyan waqdi, dalwa abaanaah farcaan yakken. Meqe migaaqay luk sugeenik qaybik radaanam dooriten immay, kaxxa caacayih gadda akkeloonuuh, xeet kee cooxuy yalla 'yeenih yaqbudeenihiyyah aban sadgatat wacarriyelon» iyye.