Hosiqa 2 - NABUWWA KEE MALIKWA

¹ Tonna kinnuk Israayilih yooboke maray sin toobokoh yanik, Yallih maray Yalli akah racmata, inxic>> 'yaanam yok iyye.

DALWA LEH TAN GOOMAR KEE IMAAN SINNI ISRAAYIL MARA

² «Yi xayloy, sin ina ahaysa yi barra hinnaay, anu tet baqala hinniyo'mmay, ama abtah tan dalwa kee caraamu maabina teetik inxicaay tet kallaca.

³ Siinik cintek, sara teetik kalla heeh, tooboke saaku qasunuk akah sugte'nnah, qasunuk tet heeyyo. Kafte baaxoy tu elle aabuke waytah innah tet heeyyo. Bakaarah rabele.

^4-5 Tet xayloh kaadu maracmata. Ken ina dalweenaay; abta dalwat mawacarriyta. ‹Inni mareytit fan gexeyyooh, lee kee maaqo oson yoh aceelon. Xagar meqe sartanay illi xagor kee *baftak bicseenihiyya oson yoo sariselon. Caxâ xaylok bicsen *zeyti (saliid) kee qinabak bicsen kamri oson yoh aceelon› 'yaanam is isih inteh ten.

⁶ Tohih sabbatah keenan le daggek bicsen gasot tet heeyyo. Gititte gee wayta'gidih, xiseh an gasot tet alfeyyo.

⁷ Mareytit lakal ardele'mmay, ken maalelta. Ken gorrisele'mmay ken mageyta. Too waqdi intu waytaamah, ‹Ahaysa inni baqala fan aduuru waa. Away edde an caalatak, duma elle suge inni yoh yayse› axcele.

⁸ «Maaqooy qinabak bicsen kamri kee caxâ xaylok bicsen *zeyti teetih teceem yook tene'mmay woh yoh maaxaginna. Baqal axcuk yaqbuden duyyeh qibaadah hayte lakqo kee dahab teetih teceem yook tene'mmay; toh yoh maaxaginna.

⁹ Daro kee qinab orobta saaku, inni daro kee qinab xaylo teetik gacsiteyyo. Sarittuh teetih ecee illi xagor kee *baftak bicsen sartan teetik beeyyo.

¹⁰ Tet mareytiitik garil qasunuk tet cabeyyo'mmay, yi gabak num tet macata.

¹¹ Kulli alsih bilooy kulli sabtih diini migaaqal abta qiid kee gersi qiiditte abta farcat ahaysa teetik raaqiseyyo.

¹² Tet qinab xala coox kee tet sublâ-cooxuy is, ‹Yi mareytit yoh tecee› akak intahiyya teetik bayseyyo. Qinab coox kee bustaan elle tuysubuke arooca garbo teetik abeyyo. Too cooxuy qinab xala kee bustaan alluwwa baysele.

¹³ Yoo hawwenna hayteh Baqal akak iyyan duyyeh qaydarus qeerisseh; bilqitta inteh mareytit lakat gexxe'mmay, toh teetit macabay, tet akah digaaleyyo. Tahat yabtam yoo YALLA» 'yaanam iyye.

YALLI ISI MARA KICNA

¹⁴ YALLI kaadu qagseh iyyeemih, «Wadir woo elle sugte bacarik tan baaxo fan tet gacseyyo. Tokkel teetih liyoh an kacanu teetih warisu waa waqdi, yol aduurele.

¹⁵ Duma luk sugte qinab xala coox teetih gacseyyo. Gadaamâ Golo deqsitta golo, niya elle moqon golo akkele. Tohoysa baxuwwah Masrik tet eyyeeqe saaku akah yoo oggolte'nnah, yoo oggolele.

¹⁶ Tohuk wadir ‹Yi Baqalaw› yok axcele ikkal, Baqal deqsitta duyyek elle inte'nnal, ‹Yi Wannaw› yok m'inta.

¹⁷ Ahak wadir Baqal 'yaanamih galab xagi tet maha.

¹⁸ «Too saaku alak alaakulleyti yi mara xage waa'gidih, qahdi heeyyo. Carbi edde abba haan silaacak seef kee gaysê-baxa baaxok ayyaaqeyyo. Yi ummat amaanah xintay 'yaanam axceyyo.

¹⁹ Israayil ummatey, num barral akah rihima'nnah, anu innih sin haysiteyyo. Cakki kee qadaalatat sin xiiniseyyo. Ahaysa kulli way kacanu kee xuwaawat sin xiiniseyyo.

²⁰ Siinih cule xagna siinil mamaka. Akah exce'nnah, inni mara sin abeyyo. Too saaku YALLA kinniyom yoh aaxigetton» iyye.

^21-22 «Yi mari yot aban kallaci keenik oggoleyyo. Rob keenih baaheyyo. Baaxol daro kee qinab xaylo kee *daytuun keenih aysubukeyyo. Yidraqel-Daqarih xaqul daro kee coox aysubukeyyo.

²³ Inni mara le baaxol nookiseyyooh, ken gaddaliseyyo. Racmat-Wee akak axcuk suge marah racmateyyo. Yi mara hinnon akak axcuk sugen mara, inni mara abeyyo. Yi mara kinniton keenik axceyyo. Ni Dagelta kinnitoh yok axcelon» iyye.