Hosiqa 14 - NABUWWA KEE MALIKWA

HOSIQA KEN AFAT HEE XAAQO

¹ Hosiqa iyyeemih, «Israayil ummatey, YALLAY sin Dagelta kinnihiyya fanah uduura. Edde tanin dambi baati siinih xale.

² YALLAL uduuray, a dooqa Yallih garil oggol siinik geytay. Dooqah intaanamah, ‹Abba hayne dambi neh cab. YALLAW, sadgatah awurwa koh qidnaamak koo faylisnak, abnah nan dooqa nek oggol.

³ Assuuriya nee macatta. Carbi faaris catoh tu neh maxiqa. Ahaysa gabak bicsen duyyek, ‹Ni Dagelta› m'inna. YALLAW, qayxiixah racmata Dagelti dibuk koo› inxica» keenik iyye.

YALLI ISI MARAH CULE XAGNA

⁴ YALLI iyyaamah, «Ahaysa keenit luk suge bagcarra xabbacoowe'mmay yoo fan ken gacseyyooh, baguuk ken akcineyyo.

⁵ Israayil mara, qabar le baaxo rob elle doogisa'nnal doogiseyyo. Qobor innah wir axcelon. Lubnaan rasih cooxih innah, qande le daabisiyyah ken daabiseyyo.

⁶ Qusba ubka keenit abeyyooh, meqe xintoh xiinelon. *Daytuun cooxih innah wir axcelon. Lubnaan *sariidah innah, banniy axcelon.

⁷ Ahak sarra yi dacayrih xiinelon. Meqe daro aysubukeloonuuh; qinab xale cooxih innah xaylo xalelon. Lubnaan rasul qinabak bicsen kamri migaq-gexxoh le inna aallelon.

⁸ Israayil maraw, ahaysa xeet kee cooxuk bicsen duyyeh intit yoo tableenim siinik moggola. Dooqa siinik oggoltaah sin dacrissem yoo. Anxax caxah innah sin silaalissem yoo. Eelli haan barkat siinit haytem yoo» iyye.

⁹ Kas le mari a kitaabal yan yaabat radeleeh, afqadot raaqisele. YALLIH giti, cakkik yan gita. Cakki gitat gexa mari kay gita kataatele. Dambileelaay a yaabat baaqid mahaytaay, tohih sabbatah, kay giti adaf keenil yakke.