Hosiqa 13 - NABUWWA KEE MALIKWA

YALLI KEENIT ABU WAA DIGAALA

¹ Dumah yan saaku Efrayimih yooboke mari yaaba waqdi, Israayilih yooboke mari meysih axaxitak suge. Amo qunuunusak ken fan wagitak sugen. Takkay immay Baqal akak iyyaanamih qibaadat gaceeniih, dambi lem baahen. Tohuk gexxaamah bayen.

² A saaku inkinnah woo umaanet bisoh gexak gexaanaah, isinni gabak lakqok bicsen duyye yaqbuden. Too duyye gabâ-naggaarinna keenik leh yan mari bicissa haah, sarrak yaqbudeenih. «A duyyeh sadgat aba» iyyan. Laahi ceeloy gabak bicseenihiyya fugtan! Sahdayti isi gabak bicse ceelo wadir mannal fuguta?

³ Tohih sabbatah ta mari, saaku maacisa naafu kee qubul ayro tewqek wadir elle baata'nnal, bayelon. Anfiyan daroh caffa caacay elle beya innal qellitelon. Girak yawqe qer elle baya innal bayelon.

⁴ YALLI iyyeemih, «Anu YALLA kinniyooh, sin Dagelta kinniyo. Masrik sin bahtem yoo. Yook sa Yalli mayana. Sin cattam dibuk yoo.

⁵ Woo bacarih tan baaxol tenen saaku, amo siinik wagitak sugtem yoo.

⁶ Takkay immay niqmatak tan baaxo culten saaku, faxxaanam geyteeniih cayteenih; kaxxiina siinit hayteeh yoo hawwenteenih.

⁷ Tohih sabbatah, lubak innal sin dadheyyo. Kabqi gital raarisak suggu 'yeh sahda elle yabbixe innal, sin abbixeyyo.

⁸ Baxi akak baye say-kabqih innal, sin abbixeyyooh qanxissa sin heeyyo. Lubak innah sin anxuqeyyo. Alluwwah innal kitittiffa sin heeyyo.

⁹ Israayil ummatey, sin bayseyyo'mmay, num sin macata.

¹⁰ Malik kee abbobti fanxa yok inten. Away sin cata malik mayanay, abbobti le magaala matan.

¹¹ Sin inqibe saaku malik siinih hee. Siinih bagcarrite saaku woo malik siinik kale.

¹² Israayil marih umaane temeggeeh, daanat abbixe.

¹³ Israayil mari kas weeh, meqe mano cineenih; inâ-bagut yan baxay awqe cine yekken.

¹⁴ «Ta mara raba kee akeerak maay cateyyoo? Rabaw, ken bakta'gidih am! Akeeray, ken hirig! Ahaysa keenih maxuwaawa.

¹⁵ Israayil ummat away wir intam celtaamah; ayrô-mawqa le kabuk bacarih tan baaxok ruubu waa laqin caacay ken kafsele. Too caacay buyyitte kee qelwa keenik kafsele. Keenit muquk sugtem inkih beele.

¹⁶ Samaariyah mari yi yab cineemih sabbatah, digaala keenil tamaate. Xaylo keenik carbit rabele. Qunxa urri keenik xeetil tafqelon. Bagut le agabuk bagu fakelon» iyye.