Hosiqa 1 - NABUWWA KEE MALIKWA

¹ Quddiyya kee Yootam kee Acad kee Ciskiyyaahu Yuudâ-rasul malikwah sugteeh, Israayil rasul kaadu Yahoqás-Yarobqam malikih suge dabaanal, YALLI Beqeerí-Hosiqal farmo ruube. Ruube farmo ah teeti.

HOSIQA BARRA KEE XAYLO

² YALLI naharak Hosiqal ruubem, Israayil marih giddinaamak ruube farmok ten. Iyyeemih, «Hosiqaw, gexay digib. Digibih abittu wayta barra, xiiqareh-xiinayto. Is xaltu wayta xaylo kaadu teetik kaxxih imaan maleela akkelon. Macaay intek, yi mari yot darre cabeeh, xeet kee cooxuk bicsen duyye yaqbuden» kaak iyye.

³ Hosiqa Goomar deqsitta barral rihime. Goomar-abba Diblayim deqsita numuk ten. Naharsi-baxa kaah xalte saaku,

⁴ YALLI kaak iyyeemih, «Ama yooboke awkak migaaqah Yidraqel inxic. Macaay intek, Israayil malik akak rade kay kaxxa abba Yaahu, Yidraqel deqsitta daqaral sahdat abe qidiyyah, Israayil malik edde digaalu waa wakti xayih. Yaahu nasabak dardaarinni gaba kalele.

⁵ Yidraqel-Daqarih addal Israayil qaskar le qande selsiiseyyo» iyye.

⁶ Goomar qagisak teedeqeeh baxá xalte. Too saaku YALLI kaadu Hosiqak iyyeemih, «Tama awkák migaaqah Racmat-Wayti inxic. Macaay intek, Israayil marah tahaysa maracmata. Qafu kaadu keenih maaba.

⁷ Yuudâ marah tu gactek, keenih xuwaaweyyo. Yoo YALLAY ken Dagelta kinni ken cateyyo. Ken elle catu waam, carbi abitto hinnaay, seef kee gaysê-baxa hinnaay, faaris kee faaris amot yan mara hinnay, inni qandet ken cateyyo» iyye.

⁸ Goomar too baxá anguk teyyeeqek lakal, kaadu teedeqeeh lab-baxa xalte.

⁹ Too waqdi YALLI kaadu kaak iyyeemih, «Tama awkak kaadu migaaqah Yi-Mara-Hinnon, 'yaanam inxic. Macaay intek, Israayil mari ahaysa yi mara hinnoonuuy, anu kaadu ken Dagelta hinniyo» iyye.

ISRAAYIL ADUURELE

¹⁰ YALLI iyyeemih, «Takkay immay Israayil mari loowo akak duudume waytah gide akkeloonuuh; mangah baddi-afih qiddeh gide akkelon. Anu, ‹Yi mara hinniton› keenik elle exce ikkel, wadir inni mara ken abeyyooh, Yallay waarahiyyah xaylo akkelon.

¹¹ Yuudâ mara kee Israayil-mari wadir kaadu angaleleeh inki mara akkelon. Inki amoyta haysitelon. Isinni baaxol gaddaleela akkelon. Yidraqel-ayro, kaxxa ayro akkele.