Ermiyaas 9 - NABUWWA KEE MALIKWA

¹ «Yi ummattay tambaxem faxxahiyyah bar kee laqoh weeqa'gidih, moyya kee intiita yok ximo akak racta raceyna takkem faxe raare.

² Yi mari YALLAL luk sugen imaan cabe maray sinam gana kinnoonumih sabbatah, keenik xer baaxo geyaamal faxe raareh an. Mafdagay yi marak elle axxeerehiyya faxe raare» 'yaanam iyye.

³ YALLI iyyemii, «Diraabak sah nummat mayaaban; Maqarah loonum, diraaba. Nummak yaaxigeenim malon. Yi mari umaane umaanê-lakal aban; anu ken Dagelta kinniyom yok mayaaxigan» iyye.

⁴ «Tonna'mmay yaaminen toobokoyti siinit ane waamih sabbatah, kataysa kataysat siinik dacayrih gaca. Toobokoyti toobokoytat gano siinik aba; kataysa kataysa siinik camitaah deedal kaal haa.

^5-6 Kataysa kataysa siinik ganaah, nummat num siinik mayaaba. Arraaba dirab siinik baritte; abtan dambik mataduuran. Naharsi umaaneh lakal, gersi umaane abtan. Yoo aaxige cinteenih» 'yaanam keenik iyye.

⁷ Tohih sabbatah YALLAY Nabaamak Nabahiyya iyyaamah: «Birta girat elle yagirriben innal, anu inni mara agirribeyyo. Yakken mara keenik ableyyo. Yi mari aba dambi able waqdi, toh keenik abe week, maca keenik aba?

⁸ Arraaba keenik summi le gaysê-baxih gide. Kulli waqdi diraabat yaaban. Kulli num keenik meqe qangara afak sinam lih yaabaah darrek edde radoonu waan oflo keenih bicsa.

⁹ Hay ta mara digaalam yol matana'nna? Tannah yan marak ta umaane abalih digaale ikkal, ken cabam mameqe. Tahat yabtam yoo YALLA» 'yaanam keenik iyye.

¹⁰ Too waqdi anu exceemih, «Qaleelah rookitah an. Niqmatak ten baaxoy lacah muquk tenehiyyat gira ruuben. Too baaxoh weeqah an. Woo baaxo a saaku kafteeh sahda magexxa. Safarah woo gita gaca mari mayana. Laahi anay a saaku elle mayantaabba; kimbir kee dubaali akak yeerreh» 'yaanam exce.

¹¹ YALLI yok iyyemii, «Yarusalaam yiddigille abur abeyyo. Wakri dabaq tet abeyyo. Yuudâ-magaalooli abuuruy num sinniih lac sinnihiyya abeyyo» 'yaanam iyye.

¹² YALLI a baaxo annal akah kafseeh num ibah elle gexu duude waa bacari akah tet abem macaay? Kasak dudda le numuy ahat radahiyya iyyaay? Aham gersi marah warsaana'gidih, YALLI naharal elle akah warseh suge mari maay yan?

¹³ Too waqdi YALLI iyyeemih, «Aham keenit akah takku waytaamak sabab macaay intek, yi mari keenih hee xinto yok cineeh, aba keenik excem kee anu keenih ruube kitaabal tanim abe cineenih.

¹⁴ Yi yab cinna heenih dumaak abak yenen makot yanin. Isinni abbobtik kaxxih, Baqal akak iyyan duyyeh qibaadat yanin.

¹⁵ Tonna leemiik yoo YALLAY Nabaamak Nabah, Israayil doore Dagelta kinnihiyya ta marak abu waam koh warisu waa. Qeero le maaqo ken askameyyo. Summik tan lee ken afqeyyo.

¹⁶ Duma ken kee ken kaxxa abbobti able wayteeh aabbe wayte baaxoy oson kaadu ahaydumah aabbe weeniih able weenihiyya fanah ken ruubeyyo. Tokkel aaxige waan marih addal ken fixiixiseyyo. Saabo cabba haanam fanah, ken seltu wayta qaskar keenit ruubeyyo» iyye.

YARUSALAAM MARIH WEEQÁ

¹⁷ YALLAY Nabaamak Nabahiyya iyyemii: «Takku waytam ubula! Sinam rabta waqdi, weeqa aba agabuh naharal elle seecay suga, keenik inxica» iyye.

¹⁸ Ummat toh toobbe waqdi intemii: «Labhay isissikay! Neh weequ waa agabuh neh seeca. Neh boogisoonay inxica. Inti nek ximok tamaggeeh nanu kaadu dambar ximot nek aruqam fanah weqnaama» 'yaanam iyyen.

¹⁹ Ankacca haay! Siyoonul booge tantaabbeh tan. «Bayneeh; qaybit radneh nan. Magaala cabneh genxam nek faxximta; ahaysa buxaaxi nek abur tekkeh tan» 'yaanam iyyen.

²⁰ Ermiyaas iyyemii, «Taway isin kaadu agabow, YALLIH qangara ankacca haa. Usuk iyyam cubbusay. Xaylo weeqa elle aban inna barisa! Sin innah yan agabu kaadu rabe marah weeqa elle abeh meqe'nna barisa.

²¹ Macaay inteenik, rabi qarik xoggaak buxah adda nek culeh yaniih, maroh gasoosa edde nabbixe magaaloolih adda culeh yaniih, urru gitittel nek raaqisah yan. Furrayna qadaagah aroocal nek raaqisah yan» iyye.

²² Kaadu iyyeemih: «Rabe marih lafa saqi dacah innah, kulli ikkel qidelon. Yifiilen darok caben caffih innah, kulli ikkel cayxih aneleeh, ken yaaguqe num mageytima. YALLI yok inxica iyyem tamaha» iyye.

NUMMAH IXXIGA

²³ YALLI iyyemii: «Tu-taaxago isi ixxigat kaxxam akkale waytay. Celeema isi qandet kaxxam akkale waytay. Gaddaleela isi maalut kaxxam akkale waytay.

²⁴ Yoo yaaxigeeh, anu faxam yasmite num yenek, toh kaxxam kinnim yaaxigeemiiy amo elle yamqeemi. Niyaateh meqem tohu. Macaay inteenik, anu sahdah liyo kacni, yambaxe kacanu hinna. Cakki kee qadaalatak tan abto aba Dagelta kinniyooh; yoo ruffu haytam tamaha. Tahat yabtam yoo YALLA kinni» iyye.

^25-26 YALLI qagseh iyyemii, «Masri kee Yuuda kee Edom kee Qammon kee Mooyab kee, bacarih tan baaxol yan maray amô-xagor namma seltak isik yargiqehiyya edde digaalu waa wakti mamaatat yan. Ta mari yakkeemiik solot loonuuh immay, woo solot akah lon qahdi mayaaxigan. Ta mara kee Israayil marak yi qahdi num maxagurinna» 'yaanam iyye.