Ermiyaas 8 - NABUWWA KEE MALIKWA

¹ YALLI iyyaamah, «Too saaku Yuudâ-malikwa kee, Yuudâ-doolatak abbootan luk suge mara kee, seeka kee nabuwwa kee, wohuk kalah yan maray Yarusalaam magaalal suggu 'yehiyyah lafay kabrit sugtehiyya kabrik ayyaaqelon.

² Too lafoofi inki aracal gaaboysak mayaaguqaanaay; guddaafa baaxot elle caxan innal, baaxot qidelon. Ken elle qiden ikkel qangalaylut raaqelon. Tokkel ayro kee alsa kee cutuukay oson kicinukuuy aqbudukuuy faxaanam elle esserak sugeenihiyyah gubal qangalayle lon.

³ Too saaku ta uma-marih addak rabak raaqe maray anu ken elle fixixise baaxooxal yanihiyya, elle yanin baaxol, manok raba laftelon. Tahat yabtam yoo YALLA» 'yaanam iyyah yan.

DAMBI KEE DIGAALA

⁴ YALLI kaadu qagseh yok iyyemii, «Yi marak intaamah, ‹Yinnikisse num niksok maay ugte waa? Gitak hoxe num gitah maay aduure waa?

⁵ Hay yi maraw, yok texxeereenim ublehik, yol macah aduure waytan? Isinni gabak abten xeet kee cooxuk bicissen duyyeh qibaadat gacteeniih, yol taduureenim cinteenih.

⁶ Intaanam siinik aabbeh immay, nummat mayabtan. Abe umaaneh nadaamita num siinit mayan. «Labhay, umaaneh baahem macaay?» iyyeh essera num siinit mayan. Kulli num siinik qeebi booxa fan xoxbisan farasih innal isi faxa gitat xoxoba.

⁷ Koxxali kinni way isi aracah edde yaduure wakti yaaxigeh. Kukkurru kee kalah yan kimbir safarah gersi rasu fan edde gexa wakti isik yaaxigeh. Yi maraw, siinih tu gactek, anu sin elle xiinisa xinto mataaxigan.

⁸ «Nanu kasloytit kinnino ikkal, YALLIH xintok iginnom mannu» elle intaanam mannaay? Anu siinih hee xinto, «Xintoh adda nanu naaxige» inta kabirway aamanti sinnihiyya koramkorisse.

⁹ Isin kasloytiitih liton mari qaybit radele. Badit ken abbixeleeh, oflot radelon. Yi qangara cineenim ablehik; amol akak yaniinim, manni'nnah yan kasaay?

¹⁰ Tohih sabbatah oson luk sugen baaxoy buqre elle abaanahiyya, marah keenik aceeyyo. Gennaaqoh agabu keenik marah aceeyyo. Macaay inteenik, kaxxa num kee qunxa num keenik marin duyye dulmih elle beyan innih malat yan. Nabuwwa kee seeka kinni way sinam duquurussaah sinaamal dirab taceem bahte.

¹¹ Yi mari kaxxa biyaakah biyaakita immay, sahlih yaniinim celsiisan. Baaxo amaan mali'mmay, «Baaxo sahliiy, amaanaay; umaane matana» iyyan.

¹² Yi mari abeh yan umâ-yabulih wacarriya mara hinnon. Dirigga akah m'iyyan. Wacarriy kinnim yaaxige mara hinnon. Tohih sabbatah qeebil gersi marat tekkem keenit akkele. Keenit abu waa digaalak maraaqan. Tahat yabtam yoo YALLA› 'yaanam keenik inxic» yok iyye.

¹³ YALLI qagseh iyyemii, «Sahdayti tooboke daro elle gaaboysa'nnal, inni mara gaaboysam faxa. Takkay immay qinab-caxay xaylo xale wayta yekken. Sublay xalay wayteeh, ayyuufi akak kafe yekken. Tonna leemiik allak yemeete marih gabal ken heeyyo» 'yaanam iyye.

¹⁴ Yallih mari iyyu waamah, «Akkel abnam macaay? YALLAY ni Dageltah yanihiyya, dambi lem kaal bahnem nek yubleeh, tonna leemiik nee baysam faxa. Summi le leek nee yafqem faxak, sitta fanah gacnay, woo gasoosa maroh edde tan magaalooli fanah nee beyaay, wokkel rabnay nee inxica» 'yaanam axcelon.

¹⁵ «Ahak wadir amaanah xiinennooh edde nan biyaakak qaffootennom akkaluk sugne'mmay, woh makkooy; wohih aftok akak cunxitan umaane nee tibbixe.

¹⁶ Neh qeebih yamaate mari Daan deqsitta magaala gufeh yan. Ken faaris abah yan xongolo nel radda. Oson edde yanin faaris abah yan xongoloh, inkih tan baaxo axaxittah tan. A mari akah yamaatem, ni baaxo kee tet addal enna 'tam baysa'gidiiy ni magaala kee tet addal yan mara sela'gidi» 'yaanam iyyan.

¹⁷ YALLI iyyeemih, «Ubula bas! Abeesaasay summi lehiyya siinit ruubeyyo. Abeesaasak elle tasillimen inna mageytan. Siinit arele. Tah intam yoo YALLA» iyye.

ERMIYAAS ABE QAADIYYA

¹⁸ Ermiyaas iyyeemih, «Edde anim, akak qaffoota biyak hinna; bagi yok kaxxam siinih qaadah.

¹⁹ Inkih tan baaxol inni marak weeqa aabbek, ankacca haay! ‹YALLI Siyoonul mayana'nnaa?› iyyan. ‹Siyon malik Siyoonul mayana'nnaa?› 'yaanam axcih ken aabbe. Ken malikiy YALLA kinni tohuk iyyaamah; ‹Hebeltoh im xiqe sinni duyyeeyay sinam aqbudih tubleenihiyya taqbudeenim bahten. Tohuk gexxaamah yot naqabu culussen› 'yaanam axcih kaa aabbe.

²⁰ Ummatta weeqat tan. ‹Daro edde orbisan wakti gaba kaleeh karma gexxeh immay nanu luk nen biyaakak uxih mawaddiiminnino› 'yaanam iyyan.

²¹ Yi ummatta massaammat taniih, tohuk gexxaamah niya yok tiddigilleeh; nugbi yok rade. Keenih xarraqa yoo tibbixe.

²² Gilqad deqsita rasul dayli mayana innaa? Daylaaba wokkel ane maay wayta? Dayla aba mari yenek, yi mari dayla akah gee waam macak tan teetiiy?