Ermiyaas 7 - NABUWWA KEE MALIKWA

ERMIYAAS YALLIH-QARIL YALLI IYYEM BAXXAQISE

^1-2 YALLAK Ermiyaasal obte qangara ah teeti. YALLI, «Yi Qibaadah-Qarik afal solla inxicay, anu kol ruuba farmo waris. ‹YALLA yaqbude'gidih a gitak yamaate Yuudâ-maraw, YALLI siinik iyyam ankacisa› keenik inxic» iyye.

³ «Too waqdi farmoh keenik intaamah, YALLAY Nabaamak Nabah, Israayil doore Dagelta kinnihiyya siinik iyyaamah, ‹Edde tanin gita caba. Abtan taamak raaqa. Tonnal, elle tanin baaxol tanoonay sin axceyyo.

⁴ Makot sin beya marih yaabal maaminina. «Nanu dumaak waddiime mara kinninooh; YALLIH Qibaadah-Qari ah kaana; xaqul lino» 'yaanam kulli way maxcinaay; a qari sin wadelem makkalina› keenik inxic» yok iyye.

⁵ YALLI iyyemii, «Edde tanin gitak nummah katteeniih, abtan taamak nummah raqteeniih, gitah titta lih taamita mara nummah tekkeeniih,

⁶ sin addal yan allî-marat xukkute wayteeniih, qayxiixa kee gubun adlume wayteeniih, elle tanin baaxol masaakiinâ-qabala caxe wayteeniih, xeet kee cooxuk bicsen duyyeh-qibaaday baati siinih xaltu waytahiyyak raqteenik,

⁷ tonnal sin kaxxa abbobtih kulli waqdi ikoytah ecee baaxol elle aadettoonuuh, sin akak taysaarrem matana» iyye.

⁸ «Makot sin beya marih yaabay tu xiqe sinnihiyya numma takkalen.

⁹ Garqa abtaanaah, sahda qiddaanaah, dalwa abtaanaah; diraabay taceenihiyya numma sinaamat celsissaana'gidih, xiibittaanah. Baqal akak intan gabak bicissen ceeloh dooqa axcuk qaydarus rubtan. Duma aaxige waak sugten duyyeeya Yalla axcuk taqbuden.

¹⁰ Tonnah taniimiy anu niqibyohiyya abak sugga 'taanah; sarrak yi qariy yi qibaadah xissiimehiyyal solla 'taanaah, ‹Nanu dumaak waddiime mara kinnino› 'yaanam intan.

¹¹ Yi Qibaadah-Qari garoqti aleelitta gabla maay takkalen? Isin abtaanam inkih ableh. Tah intam yoo YALLA.

¹² Siilo deqsita aracal, duma yi qibaadah bicseenih sugen aracal baahem gexay wagita. Too aracal tonnah tanim akah baahem, Israayil maray yi marah yanihiyya baahe dambih sabbata.

¹³ Isin ta axxul le dambit assaanam uble waqdi, fiiruk geerah sin lih yaabeh immay yok tu aabbe cinteenih. Maabina siinik exceh tu yol magacisinniton.

¹⁴ Tonna leemiik duma Siilol baahem, ta saaku kaadu, ta yi migaq elle yan yi Qibaadah-Qariy sin kee sin kaxxa abbobtih eceeh, isin kaxxam amo elle meqitoonuhiyyal baaheyyom ixiga.

¹⁵ Duma Efrayimih yooboke maray sin toobokoh yanihiyyak akah abe'nnah, inni foocak sin kaleyyo. Tahat yabtam yoo YALLA kinni» 'yaanam siinik iyye.

YALLIH MARI ABE DAMBI

¹⁶ YALLI yok iyyeemih, «Ermiyaasow! Ta marah dooqa yol maabin! Keenih yol maweeqin! Ken tiyah yoo makallacin; kok maabbak.

¹⁷ A mari Yuudâ-magaalooli kee Yarusalaam magaalah gitittel abaanam keenik matabla inna?

¹⁸ Yol umam baahaana'gidih, urri keenik boco baahaah, ken abbobti woo bocot gira urussa. Agbi keenik qagina arqusa. Too qaginak too giral alaysen gaqambo, Gannat-Malikáy yallah loonuhiyyah dooqah baahan. Tohut mayaadiyaanay, yalla akak iyyan duyyeh sadgatah qinabak bicsen kamri baahan.

¹⁹ Nummah umam elle baahaanam, isinni nabsi'kkal, yoo hinna. Tahamat wacarriyelon» yok iyye.

²⁰ Tonna leemiik YALLAY Mulki lehiyya iyyaamah, «Ta Qibaadah Qariy oson kaxxam edde yakkaleenihiyyal inni naqabu oobiseyyo. Yi naqbi tohut mayaadiyay, ummatta kee alak-alaakulleytal kaadu oobele. Coox kee tooboke daroh agantah elle oobele. Yi naqbi giray sahdayti barguse waahiyya kinni» iyyah yan.

²¹ Toh too tiya. Tohuk kalah YALLAY Nabaamak Nabah, Israayil doore Dagelta kinnihiyya siinik iyyaamah, «Ama abtan sadgat, cado akak carrisan sadgatat osissa haysitay, isinnih ottokommeya.

²² Toh akah axcem, anu duma sin kaxxa abbobti Masrik addak eyyeqqa heeh baahe saaku, cado akak carrissan sadgat yoh abteeniih sadgatah saqa yoh qiddeenim siinik faxxintam amrih keenil moobisinniyo'mmay,

²³ keenik exceemih, ‹Yi yab oobbeya. Yi amri oggola. Toh abteenik, yi mara akkettoonuuh; anu sin Dagelta akkeyyo›, 'yaanam keenik exce. ‹Kullim siinil tamqe'gidih anu siinik inxicca excem aba›, 'yaanam keenik exce.

²⁴ Too yaabat baaqid mahaysitinnoonuuy yok cineenih. Anu keenik excem cabba heenih, ken misinkacay yab aabbe sinni keenil teceem abak sugen. Qamal keenik gacak gace.

²⁵ Sin kaxxa abbobti Masrik eyyeqqa hee ayro akke fanah, nabuwway inni naqoosah liyo mango adda sin fan ruubak suge.

²⁶ Takkay immay tohuh, yi yab yaabbeeh anu axcem ankacisa num siinit mayan. Mako litoonuh, yab oggola mara hinniton; sin kaxxa abbobti edde sugte dambik lafitta 'ya dambit assan», siinik iyya.

²⁷ Sarra yok iyyeemih, «Atu taway anu kok axcem keenih waris. Takkay immay kok mankacisaanaay; uduura keenik intaamah kok mayaabban.

²⁸ Ken lih yabta waqdi keenik intaamah, ‹Isin, YALLAY sin Dagelta kinni iyyam cine mara kinniton. YALLI, «Umaanek uduura», siinik iyyeh immay kay yab cine mara tekken. Sin garil numma baateh; nummat mayabtan› keenik inxic» yok iyye.

SAHDA ELLE YASGUUDEN GOLO

²⁹ «Tohuk gaba kalta waqdi intaamah, ‹Yarusalaam magaalah ummatey, rookita! Amo isinnik moolay muxcah caba. Molten amoh xagorta baaxot qida! Yoo YALLI bagcarriteeh inni mara cineemih sabbatah qaleeli amol keenih weeqay rabe marah abak yenen booge keenih aba› inxic.

³⁰ « ‹Macaay inteenik, Yuudâ-mari umâ-yabulih tanim abe. Yoo elle yaqbuden yi Qibaadah-Qaril, umâ-yabulih tan duyyey yi aftok yaqbudeenihiyya heeniih, qari nadaasa yok aben. Tah intam yoo YALLA.

³¹ Isinni xaylok say-urru kee lab-urru sadgatah amol akak carrisaana'gidih, Hinnom Golo deqsitta goloh addal, Toofet deqsita arac bicsen. Aham anu amrisem hinna; yi afqado kaadu inkinnah oggoltam hinna.

³² Tonna'mmay a arac migaaqah Toofet madeqsitaay, Hinnom Golo madeqsita. Takkay immay Masgaadâ-Golo deqsitele. Tah intam yoo YALLA. Macaay inteenik, ummatta asguuduk sugeloonuuh, raysa elle yaaguqen arac tokkel wayya haanam fanah, Toofet bagul aaguqelon.

³³ Rabe marih raysi guma kee yangula kee wakri maaqo akkeleeh; raysa keenik akme kala maray alluwwa xiiriyahiyya maraaqa.

³⁴ Baaxo hunah raaqeleeh; duma Yuudâ-magaalooli kee Yarusalaam-gitittel aabbuk yenen qilila kee farci antaabbuk maraaqa. Digibil farcatah abak yenen digir gaba kalele› 'yaanam keenik inxic» yok iyye.