Ermiyaas 6 - NABUWWA KEE MALIKWA

NAQBOYTIT YARUSALAAM MAGAALA MAROT HAYTE

¹ Benyam maraw, isillimaay amaan elle yan ikke gexa! Yarusalaam magaala cabay gexa. Kilbat le kabuk umaane temeeteeh; baati xayyowtek! Takooqâ-magaalal yan maraw, *baanta ugura. Asta siinih takke'gidih, Beet-Hakkarem deqsita aracal gira urusa.

² Siyon-magaala qaxa-meqeh immay tet bayseyyo.

³ Amoytit qaskar haysitta hayteh wokkel anfiddigelon. Magaalak dariifal siraq heelon. Kulli num keenik isih elle faxe'kkel keenik anfiddigele.

^4-5 Too waqdi, «Yarusalaam tabbaxoonuh bical gaca! Wallaqenti yakke waqdi qeebi teetit abennok bical gaca» axcelon. Carri yakke waqdi, «Ahaysa bari yekkeh yaniih udurrunneh nanik, bar keenit abnay; inkih yan bar nee xiqelek. Magaalat koositih bicsen arooca baysenno» axcelon.

⁶ YALLAY Nabaamak Nabahiyya a malikwa amriseeh; Malikwak, «Coox irgiqay Yarusalaam-magaalat maroh tan gaso taggileeni'gidih, too gasot xakabuh coox kee xeet tittin bagul haa. A magaalah addal sinaamat mango xukko tekkeeh, tohuk gexxaamah tet digaaleyyo» iyye.

⁷ «Dori leek yamagge waqdi afak akah caxa'nnah, Israayil mari aba umaane emegga 'teh caddo cabteh caddok taturteh. Aban umaane kee baatiy sinaamat abaanahiyyah anay yol rada. Lakmisa mara kee mudduume mari yoh yambulle.

⁸ Yarusalaam maraw, a saaku siinik excem, kas siinih takkay! Cinteenik, darre siinit cabeyyooh, magaala siinik abuuruy num elle ane waa abeyyo».

ISRAAYIL QASUNUK RAQTE

⁹ Ermiyaas iyyeemih, «YALLAY Nabaamak Nabahiyyah qangara yol obteh; yok iyyeemih, ‹Israayil mari, xaylo akak yifiilen qinab caxah innah, qasunuk raaqelon. Takkay immay uxih wakti yanihik, isih duddah gide keenik wad› 'yaanam yok iyye» iyye.

¹⁰ Too waqdi anu excem, «Yi yab mayaabbaanak, iyyaw axco? Iyya luk yaabah an? Ayti keenik alifit tani'kkal, yab oggola mara hinnon. Atu yok keenih warisa inte farmo keenih warsa waqdi, mafaxan. Woo farmol anqaasah lon.

¹¹ YALLAW, atu keenit akah bagcarritta'nnal, anu kaadu keenit bagcarritah an. Inni abbaxu maduuda» exce. Toh exce waqdi YALLI yok iyyeemih, «Yi naqabu beyay giti-addal yan urru kee furrayna elle gaabowte aracal cax. Baqala kee barra too bagcarrah duufut gexeleeh, idoolay bar nabahiyya kinni way akak macattinta.

¹² Oson dabaaqah edde sugen qarwa marah raaqele; ken buqre kee ginnaaqot luk sugen agbih agantah marin mari nagrele. Ken digaaleyyooh; yi gaba ablelon. Tah intam yoo YALLA.

¹³ Ken umaane ah teeti. Qunxa num kee kaxxa num keenik inkih dulmih lakqo sinaamak beyan. Nabuwwa kee seeka kinni way dirab kee deedalat sinam ayrisan.

¹⁴ Yi marat tekkeh tan diglok, ‹Ah tu hinna sahalih taniimi› iyyan. Ane sinni nagaynak, ‹Baaxo nagaya! Umaanek tanim mali› iyyan.

¹⁵ A umam-yabuliy edde yaniinihiyyak xagar keenik dagoh gide kinni way mawacarriya. Wacarriy kinnim mayaaxigan. Tonna leemik oson kaadu gersi marak kaxxih bayelon. Ahak wadir keenit abu waa digaalah finqitelon. Tahat yabtam yoo YALLA» 'yaanam yok iyye.

YALLIH GITAK YEWQEN

¹⁶ YALLI isi marak iyyeemih, «Giti elle yangale maglallal solla inxicay baaxo wagitay! Dumî dabaanal sugte gititte cubbusa. Yayse gitay siinih yascassoonu waanahiyyat gexa. Too gitat gexxeenik, amaan geetton» iyye. Takkay immay toh keenih warse waqdi kaal gacseenimih, «Aleeyyah yayse gitat magenna» iyyen.

¹⁷ YALLI iyyemii, «Dacayrih sinam siinit hee. Too mari, ‹*Baanta yaagaru waa mara ankacisa› siinik iyyen. Takkay immay yaaguren baantah anay aabbih maqal edde mahannitoonuuy, ‹Aleeyyah mankacisna› inten.

¹⁸ Wohoysa baadal tan ummatey, ankacisa! Yi marat takku waytam cubbusay raaqa!

¹⁹ Addunyal tan ummatey, yoh oobbeya! Oson abba heenimih digaalah, a maral bala ruubeyyo. Oson baaheenimih ken digaalah an. Anu keenih ruube xinto cineeniih yi qangarah ayti yacoonu cineenih.

²⁰ Saba deqsita rasuk yoh bahtan qaydarusut anu maca waah? Hinnay kaadu, xer baaxok bahtan qibaadah-haan-sukutit faxam mayyu. Yoh bahtan sadgoota yi garil oggol siinih mali. Cado akak carrisan sadgatay yoh abtaanahiyya siinik mafaxa» 'yaanam siinik iyye.

²¹ YALLI tohuk gexxaamah iyyaamah: «Ama mara aydafoofoleyyo; xaylooy, xaleenaay, kataysis kee cuggaane keenik bayseyyo» 'yaanam iyya.

KILBAT LE KABUK YAMAATU WAA MARA

²² YALLIH qangara yol obteeh yok iyyemii: «Kilbat le kabuk xer baaxok qeebih tamaatu wayta agirwa gitat tan.

²³ Too mari gayse kee gaysê-xaylooy macaxwa gabat lon. Racmatta kee xuwaawak tu le mara hinnon. Faariisat gexan waqdi, baddi haffoh xongolo lon. Yarusalaamey, kot qeebi abaana'gidih roorut gacca 'yeenih yamaaten» 'yaanam iyye.

²⁴ Too waqdi Yarusalaam mari iyyemii, «Woo xaagu noobbeh cisabbootiyyah namma xabanal gaba lino. Edde nanim, cunxooy; lacawat tan barrah innah, biyaakat nan.

²⁵ Barri genxu manalliila; gitittel ibah genxam kaadu manalliila. Macaay inteenik, ni naqboytit silac leeh, kulli ikkel nee meysiisaanaah marot nee yabbixen» iyyen.

²⁶ YALLI isi marak iyyeemihii: «*Qabuudut gacaay gombod bagul ubruka. Sin bayisu waa num garciik siinit yemeeteh immay, inki baxay luk sugeenihiyya akak rabe xaleena elle weqta'nnal, weeqaay rookita» iyye.

²⁷ «Ermiyaasow, birta elle yagirriben innal, yi mara igirrib. Kinnon mara keenik ubul.

²⁸ Birti gide ikkal, yab moyyat akak cula mara hinnon. Taama akak toome mara kinnon. Elle meekitaanamal, sinam-migaq baysan.

²⁹ Yi mari girat laqlaqan birtay diyaaye cineeh, wasak akak kate cinehiyyah bis lon.

³⁰ Yoo YALLI a mara cineemih sabbatah, ‹Tu xiqe wayta lakqo› deqsitelon» iyye.