Ermiyaas 52 - NABUWWA KEE MALIKWA

YARUSALAAM TINTIXIBBIXE

¹ Xidkiya malik yekke saaku, qumrik labaatanna kee inki sanatat yen. Yarusalaamal taban kee inki sanat malikih suge. Kay ina migaaqah Camutal deqsitak ten. Teetik abba, Libna deqsitta magaalal yooboke Ermiyaas deqsita numuk ten.

² Malik Xidkiya, Malik Yahoyaakimik kaxxih, YALLAL dambi lem baahak yen.

³ Tohih sabbatah Yarusalaam kee Yuudâ maral YALLI naqbi oobeeh; ellecabol YALLI Yarusalaam kee Yuudâ rasih mara isi garik xiiriye. Sarrak Xidkiya Baabelon-malik lih wiileh.

⁴ Xidkiya edde dardaare sagalhaytô-sanatat Nabkadnessar deqsita malikiy Baabelon amoytah yenehiyya qaskarak tu cabe'kal, Yarusalaam gaaduh gexe. Too sanatak tabanhaytoh alsak tabanhaytoh ayro, Yarusalaam magaalah afa gufeeniih; magaalak irol megdebih edde gacan arac haysitta heeniih, sarrak, magaalal yan mari akah awqe waa innah, dariifat maro teetik xisen.

⁵ Xidkiya edde dardaare taban kee inikhaytô-sanatah amma 'yaanam, too magaala marot abbaxuk sugen.

⁶ Tohih sabbatah magaalal kaxxa qulul radeeh; ellecabol too sanatak fereyhaytoh alsak sagalhaytoh ayro ummatak maaqo tembexeeh, magaalal xagaanam waytinteh.

⁷ Too waqdi Baabelon-qaskar magaalat maroh yan gidaar boohayseenih. Sarra inkih tan qaskar magaalak afah kudde. Baabelon mari magaala marot abbaxuk suge'mmay, tohuh, magaalah addal sugte qaskar magaala barat cabeeniih, malik bustaanih gariik namma gasok fan-fan gacca 'yeenih gexen. Tokkeek Ordon weeqaytu fan beya gita gacen.

⁸ Takkay immay Baabelon-qaskar Malik-Xidkiyak lakal gexeeniih, Yerikô-magaalah garil tan booxak bagul kaa yibbixen. Kay qaskar inkih kaa cabteh isih kudde.

⁹ Kaa yibbixeenih. Sarrak Camat rasuk Ribla deqsita aracay Baabelon malik elle yenehiyya fanah kaa been. Tokkel malik digaala kaal hee.

¹⁰ Digaalah lab-xaylo kaak foocal usguuda iyye. Too waqdi too xaylo kaak foocal yusguuden. Doolat abbobtih suge mara kaadu qida iyyeeh; too waqdi ken qideenih.

¹¹ Sarrak namma inti kaak yeyyeqsiise. Tohuk lakal, nacaasak bicsen silsilatat uxuyya kaa heeh, Baabelon fan kaa bee. Tokkel rabba 'yam fanah casbit suge.

QIBAADÂ-QARI YIGGILEENIH

¹² Malik Nabkadnessar Baabeloonul edde reede taban kee sagalhaytô-sanatak konoyhaytoh alsak tabanhaytoh ayrol, Nabudardan deqsitak yen numuy, Nabkadnessarat dacayrih tan qaskarak abbah raaqahiyya, Yarusalaam magaala yemeete.

¹³ Too waqdi YALLIH-Qibaadah-Qari kee, malik-qari kee, kaxxa-marih-qarwat inkih gira ruube. Meqe xisne le aroocat inkih gira ruube.

¹⁴ Kay gubal tan qaskar, Yarusalaamat maroh ten gidaarwa inkih bututtukku heen.

¹⁵ Tohuk gaba kale waqdi, Nabudardanay qaskar abbah yene, magaalah addal raaqeh suge mara kee gabâ-naggarinna luk yen mara kee qeebi yekke way Baabelon qaxat gaceh suge Yuudâ-mara inkih, Baabelon fan seewah bee.

¹⁶ Takkay immay Yuudâ-rasul, kaxxam masaakiinah yan maray tu sinnihiyya qinab-cooxih-taama kee baqurê-taamah cabe.

¹⁷ Baabelon-mari, YALLIH Qibaadah Qarih qamidway nacaasak abeenihiyya bututtukku heen. Addal akak ten gaariira kee nacaasak bicsen kaxxa tanakih agantah, bututtukku heen. Tohuk lakal, too nacaas inkih Baabelon fan weeren.

¹⁸ Toh lih kaadu, nacaasak bicissa heen duyyey Qibaadâ-Qarih-taama edde abak sugeenihiyyak, gombod elle caxan mingilwa kee badiilaaliiy, faanuswa edde bargusan afti-xaylooy, rifan lee addal akak haan sacnitteey, qaydarus elle haan mingilwa kee, wohuk kalah tan duyyey nacaasak bicseenihiyya inkih beenih.

¹⁹ Wohuk kalah, qaskar abbah yen num, dahab kee lakqok bicissa heen duyyey sugga 'tek, qunxa sacnitte kee, xikcin elle haan kabaaba kee, rifan lee addal akak haan sacnitte kee buutitteey, faanuswa elle daffeysan cooxuuy, qaydarus elle baahan qunxa sacnitte kee, faaroh kamri elle xayyoysan mingilwa inkih bee.

²⁰ Malik Suleeman, YALLIH Qibaadah-Qarih taamah nacaasak tumammi bicseh suge. Tohumuu, namma qamidduuy gaariiraay kaxxa tanak kee woo kaxxa tanak rakuh elle yen taban kee nammay takke awurwah ceelok ten. Too tumammi inkih akak bicseenim, qilsah yakkeh gide akak amixxige waa nacaasak ten.

²¹ Woo namma qamiddi titta ceelak yen. Kulli ti akak xexxaarah taban kee bacra cusul akkuk yen. Baguh a exxaay woo exxa taban kee namma cusulih gide akkuk yen. Adda akak gorra le caxxi innah gorrah ten. Tattab akak masuh gennaqtâ-gide akkuk yen.

²² Kulli qamidduk amot tan nacaasak bicsen duyye, fayyah koona cusul akkuk ten. Too waqdi too amot bilqah teetik heenim, tittat-yoxeen-silsilatih-taswiir kee rummaan-taswiirik ten. Akak bicseenim, nacaasak ten.

²³ Tattoobat akak rummaan-taswiirik sagla taban kee lecey luk ten. Sudaaducuh-yan-silsilatih-tasaawirik amol raaqa rummaan-tasaawir bool akkuk yen.

²⁴ Qaskar abbah yen Nabudardan, wohuk kalah, Seraaya deqsita kaxxa sek kee, Seraayal kataata nammeyhaytô-seekiy migaaqah Xafanya deqsitahiyya kee, Yallih Qibaadah-Qarih afal dacayrih tan qaskarih sidoc kee,

²⁵ qaskar abbay qaskarak foocat yanihiyya kee, malikih fayu acayuk yen malcina numuy saqoltih tenehiyya kee, qaskar abbah cato abak yen numuy qaskar migaaqih kutbet yenehiyya kee, wohuk kalah yan makaabonuk lactam num magaalak bee.

²⁶ Nabudardan ta mara xabba heeh, Malik Nabkadnessaray Riblâ-magaalal yanihiyyah gabal ken hee.

²⁷ Ribla deqsita arac elle geytimam, Camat rasu. Tokke ken baahen saaku, malik ken qidsiiseh. Yuudâ mara seewah elle beenim tonnak ten.

²⁸ Malik Nabkadnessar isih malik yekkeemih malcinhaytô-sanatat yan saaku, sidiica alfi kee labaatanna kee sidiica num Yuudâ-rasuk seewah bee.

²⁹ Reedeemih taban kee bacarhaytô sanat yekke saaku, bacra bool kee soddom kee namma num Yarusalaam magaalak seewah bee.

³⁰ Labaatanna kee sidochaytô-sanatat, malciina bool kee morootom kee koona num Yuudâ-marak seewah bee. Ta mara beytem, Nabudardanak ten. Seewah been mari tittat affara alfi kee lica boolih num akkuk yen.

YAHOYAASIN CASBIK YEWQE

³¹ Awil-Maroodak, Baabelon malik edde yekke sanatat, Malik Yahoyaasinih xuwaawak sugeeh, casbiy edde sugehiyyak kaa yeyyeeqeh. Taham edde tekkem, Yahoyaasin seewah edde been soddom kee malcinhaytô-sanatak taban kee nammayhaytoh alsak labaatanna kee konoyhaytoh ayrok ten.

³² Awil-Maroodak meqem kaah abak yeneeh, Baabelon fan seewah been malikwak inkih, tayse kunnabna kaah abak suge.

³³ Tonna leemiik casbi sartanay edde sugehiyyak kaa kaleeh, meqe sartanat kaa hee. Sarra, isih elle adoobita ikkel, maaqo kaa'lih yakmeemih idni kaah yecee.

³⁴ Tohuk kalah, faxxa haam edde xaamituh, kulli ayro lakqo kaah acayuk sugen. Rabba 'yam fan tonnal suge.