Ermiyaas 51 - NABUWWA KEE MALIKWA

YALLI QAGITAK BAABELOONUL BAAHU WAAMAT YAABE

¹ YALLI iyyeemih, «Baabelon-rasu kee Baabelon marat sinam baysa caacay ruubeyyo.

² Baabelon mara, caacay caffa elle beya'nnal, duufut beyu waa mara allî-baaxok baaheh keenit ruubeyyo. Too ayro too mari kulli kabuk qeebi keenit abeleeh; suge weenih innal ken cabelon.

³ Too saaku ken qaskar gaysê-baxa qiddam keenih maqambaalina; hinnay kaadu silac haysitaanam keenih maqambaalina. Furrayna kinni-way macabinaay inkih tan qaskar selli keenik haa.

⁴ Tonnal Baabelon rasul tambaxem kee gititteh addal tambaxem akkelon.

⁵ Ah yoo YALLAAY; anu Israayil kee Yuudâ marak ahaydumah mahawweeninniyo. Yooy Israayil doore Dagelta kinniih *kudduusuk yanihiyyal dambi lem baaheenim aaxigeh immay, tohuh, niya keenik uxih makalinniyo.

⁶ «Sinaamey, Baabelon rasuk kuda. Baabelon mari baahe dambih, duufut ken lih marabina. Ta saaku cane keenik gacisu waah aniih, keenih taguude digaala keenit abu waah ani'mmay, ummatey, waalih raaqa.

⁷ Baabelon yi gabat tan dahab kobbaayah bis luk ten. Inkih tan addunyal yan mara too kobbaayal yan kamrik tefqeeh, too marat moyya gexxe.

⁸ Baabelon-rasi cube'kal uma niksoh annikisseleeh, akak bayele. Sahda teetih weqtaama. Edde tan madaluk qaffottam takkehik, dayla teetih gorrisa.

⁹ Allî-maray wokkel yanihiyya iyyu waamah, ‹Baabelon mara cate rarne'mmay, elle cattiiman innal yaniinih mayanin. Ahaysa mariiy isi baaxo fan nek gexaama. YALLI isi kaxxa qandet tet digaaleh yaniih, akak ugte wayta baatih tet bayseh yan› 'yaanam axcelon.

¹⁰ ‹YALLI neh yuckumeh yanik, ahaysa YALLAY ni Dageltah yani abem Siyoonul warisnaama› axcelon» 'yaanam YALLI iyye.

¹¹ YALLI Baabelon baysam faxaah, tohuk gexxaamah Meediya deqsitta baaxoh malikwa keenit ruubah yan. Kay Qibaadah-Qarit aben umaaneh sabbatah, keenil obtu wayta bala bical tanik, carbi amrissa qaskar, «Gaysê-baxa arbaqa (samlisa)» inta. «Goobwa haysita» inta.

¹² «Magaalâ-gasoosa yabbixeeni'gidih, astah saro fayya hayisa» inta. Dacayrih gacu waa mara haa! Qaskarak, ‹Isin qeebi keenit elle abtoonu waytan ikket sasay suga› inta». YALLI Baabelon marak abeyyo iyyem abele.

¹³ Weeqayti xaqul dabaaqah yaniih mango maalu kee duyye le Baabelon maraw, sin baati xayyowteh; edde rabtan wakti xayyooweh.

¹⁴ YALLAY Nabaamak Nabahiyya isi migaaqal xiibiteeh, iyyemii, «Baabelon rasow, mangah qanayti innah ixxima akak amixxige waa mara baaxot siinik ruubeyyo. Too mari qanayti innah inkih yan Baabelon rasu bulla heele; Baabelon ken gubat gacteemih qililiselon» 'yaanam iyye.

YALLIH-FAYLA

¹⁵ YALLI addunya isi qandet gine. Isih leh yan ixxigat inkih yan baad yukluke. Qaran kaadu fidise Dagelta kinni.

¹⁶ Usuk amrisa waqdi, qaraanal tan lee kaxxa xongoloh xongolta. Baaxô maggaraqak qamburre bahtam Yalla. Rada roobih addat cankaxa qaraanak rubtam Yalla. Caacay daanah elle yabbixe aracak ruuba waqdi silisa.

¹⁷ Tah inkih abalih sahda xangi maleelay tut rade wayta tekke. Yalla axcuk yaqbuden duyye dahabak bicsa mari wohut wacarriyele. Oson bicsan yalla akak iyyan duyye anqaasah elle rabaanam ikkal, rooci leeh ufuy lem hinna.

¹⁸ Ta duyye deedala'kkalah, tu xiqtam hinnaay tanim hinna; Yallih digaala tamaate saaku baatu wayta duyye.

¹⁹ Yaqkuub doore Dagelti woo duyyeh bis le Dagelta hinna. Kullim gintem kaa. Isi mara ummatak tiysiisem kaa. Kay migaq YALLAY Nabaamak Nabahiyya.

YALLIH SILAACA

²⁰ Yalli iyyemii, «Baabelon maraw, qeebi edde absiisa silaacah sin luk suge. Qeebi edde aba birtah luk sugem siini. Doolat sin gabat bayisak suge.

²¹ Faaris kee faaris amok qeebi aba mara sin gabat bayisak suge. Faras-gaari kee tet amot gacca 'yeh qeebi aba mara kaadu sin gabat bayisak suge.

²² Agabu kee labha edde qidsiisak sugem, sin gabaay; qunxa mara kee kaxxa mara edde qidsiisak sugem, sin gaba. Lab-urru kee say-urru kaadu edde qidsiisak sugem, sin gaba.

²³ Illi kee illi duwat yan mara edde qidsiisak sugem, sin gaba. Buqre-abe mara kee buqre edde aban faaris edde selak sugem kaadu sin gaba. Xintoh abbobti kee ken doolatak saqoltih yan mara edde bayisak sugem sin gaba.

²⁴ «Tonna'mmay Israayil maraw, isinni namma intih abalih, Baabelon-mari Siyoonul baahe umaanek gexxaamah, ken digaaleyyo. Tahat yabtam yoo YALLA» iyye.

²⁵ Qagseh iyyemii, «Baabelon maraw, qalê-gideh gacca 'teenih inkih tan ummat bayisseenih immay a saakuk wadir sin naqboyta kinniyom yok ixiga. Tahak wadir gaba siinil heeyyooh qalê-gidey akah sugteenik foyyah cabba sin heeyyo. Gomboduh gacissa sin heeyyo.

²⁶ Baaxo siinik abuuruh raqqa 'teh saabok salto cabba heele. Qari akak xisan xaahi kinni-way maraaqa. Tahat yabtam yoo YALLA» iyye.

BAABELOONUT ABAN MAYSATTAKA

²⁷ «Qaskarey, qeebi qimbissaanamih qalaamatih saro gubaak fayya haa! Baaxo inkih akah taabbe'nnah, *baanta ugura. Baabelon marih qeebih ummat bical haa! Araarat kee Minni kee Askanad doolatak, qeebi qimbisa inxica. Gaadu miraacisu waa gaadi abba haysita. Qeebih faarisik mangah qanayti gid takkem ruuba.

²⁸ Doolatwa qeebih keenit ugusa. Meediyah rasul tan amoytitteh farmo ruuba. Xintoh abbobti kee ken doolatak saqoltih yan mara kee, oson reedah amol akak yanin baaxoh mara qeebih bical haa.

²⁹ YALLI Baabelon rasuh loowe bala teetil oobisu waa saaku baaxo angayyeleeh, dillibitele. Baabelon abur akkeleeh; dabaaqah num teetil magaca.

³⁰ Baabelon qaskaray agiirah tenehiyya qeebih gaba marubta. Isi megdebil elle soolak raaqele. Niya keenik addigilleleeh, agbi innah qeebik soolak raaqelon. Cayli keenik boolaatele. Baabelon magaalah culmay birtak bicseeni addigillele. Qarwat gira ruubelon.

³¹ Baabeloonut takku wayta baati malikih warsaana'gidih, mariiy kabuk kaa fan arduk amaatele. Baabelon inkitanuuk tintixibbixem kaah warselon.

³² Dora fanah elle tabak sugen gititte ken naqboytit keenik tibbixeeh. Gade elle tan baaxot gira ruuben. Toh tuble qaskar kaxxa cunxoh cunxitte, 'yaanamih xaaguh kaah warselon.

³³ Macaay inteenik, YALLAY Nabaamak Nabah, Israayil doore Dagelta kinnihiyya iyyeemih, «Baabelon-magaala itqat daro elle yaggilen arac tekkeh tan. Away tet itqat aniyo'mmay, teetit garuq edde yakku waa wakti xayih» iyye.

³⁴ Yarusalaam mari iyyeemih, «Baabelon malik nee bayseh saabo nee cabsiise. Magaala suge wayteh innah hee. Nee bayseh, Yarusalaam lee akak fuuqen gacla abe. Gawi sinam elle yanxuqe innal, sinam nee tunxuqe. Isih faxem nek beeh, wohuk raqtem baaxot nek qide.

³⁵ Tohuk gexxaamah nek faxxintamaa: duma net tikka 'tem Baabelon marak waynam nel tan» iyyen.

³⁶ Tonnal YALLI Yarusalaam marak iyyemii, «Yarusalaam maraw, siinil baaheenimih adda anu innih wagteyyo. Sin naqboytit siinil bahtem, anu keenil gacseyyo. Baabelon leek raceyna kafseyyo. Ken weeqaytu lee cabsiiseyyo.

³⁷ Baabelon abuuruy wakarwa elle gactu waytahiyya abeyyo. Yable mari, ‹Ces wonnah, able wanninoy› akak iyyan rasu tet abeyyo. Sahdayti dabaaqah teetil magaca.

³⁸ Baabelon-mari lubak gurral garadaah; lubak xayloh anay loonuh yanin.

³⁹ Kaxxam satqitan waqdi rikeek tan afxago keenih aceeyyo. Too afxagot askireloonuuh, kaxxam asuuleloonu'mmay, tohuk lakal sarrah-akak-ugte-waan-xiinih xiinelon.

⁴⁰ Anaqti innah, ken elle yasguudoonu waan arac ken beeyyo. Wadar innah, ken elle yarciidoonu waan arac ken beeyyo. Illi innah, niyya keenit elle aboonu waan arac ken beeyyo. Tahat yabtam yoo YALLA» 'yaanam iyye.

BAABELOONUH ABEN QADARA

⁴¹ YALLI Baabelon marih qaadak iyyaamah: «Baabelon tintixibbixeh tan! Ummat inkih tet faylisak ten; kulli magaalak fula luk ten. Hay, away teetit tekkeh tanim doolatwal warigga tekkeh tan.

⁴² Bad kaxxa moyyat luk yemeeteh; haffitak amol teetik gace.

⁴³ Baabelon-rasih-mandarittet tekkem yable mari hagga iyye. Bakarroytah tan baaxo tekkeh; sahda elle deedalta baaxo tekke. Safarah num tokke magexa.»

⁴⁴ Yalli iyyemii: «Baabelon mari yallah le Beel deqsitta duyye bayseyyo. Yunxuqem alliyoh kaak gacseyyo. Tohuk wadir ummat kaa aqbuduk maraqta. Baabelon gasoosa addigillele.

⁴⁵ «Yi ummatey, too saaku Baabeloonuk eweqay, qaxak teenal kuda. Yi naqabuy cayla lehiyyak isinni rooci raaqisaay isillima.

⁴⁶ Sanatalaay qusba xaagu baahaanaah, hebeltô-makaabanti hebeltô-makaabantut qeebi abe iyyan. Qeebi radele 'yaanamih texce-texcek mameysitinaay, niya siinik rade waytay.

⁴⁷ Macaay inteenik, Baabelon mari yaqbude duyyey gabak bicseenihiyya edde digaalu waa wakti amaatele. Inkih yan Baabelon rasul tan ummattat umâ-yabulih tanim akkele. Tet addal yan maray qideenihiyyak raysi tet gititteh addal raaqele.

⁴⁸ Qaran kee baaxo kee baaxoh addal tanim inkih, kilbat le kabuuk bayisak yamaate num Baabeloonut qeebi abah yablen waqdi, kaxxa ruftoh ruffa axcelon.

⁴⁹ Baabelon mari duma mango mara qideeh; takkay immay a saaku, Israayil marat aben qidiyyah baati keenit akkele. Tahat yabtam yoo YALLA» iyye.

YALLI BAABELON RASUL TAN ISRAAYIL UMMATAH FARMO RUUBE

⁵⁰ YALLI isi maray Baabeloonul yanik iyyeemih, «Rabak raaqe maraw, gexay isillima. Akkel maadayina. Isinni baaxok taxxeereenimih niyak yoo makalina. Yarusalaam kaadu mahawweenina.

⁵¹ ‹Nee xaafeeniih qaybit radneh. Qaybih tanim net tekkeeh; wacarriyih rabna. Marin baaxok yemeete mari YALLIH Qibaadah-Qarik taahirik tan arooca culen› 'yaanam intan.

⁵² Takkay immay too tiyak anu siinik axcemii, Baabelon mari yalla akak iyya duyyey yaqbudehiyyah digaaleyyo. Too wakti kaadu xayyooweh yan. Keenik biyak edde yekke mari aba araadaqisiyyi, inkih tan baaxo duudele.

⁵³ Baabelon mari qaran yawqeemih, wokkel qande le megdeb xisaanamah, tohim keenik bayisu waa mara keenit ruubeyyo. Tahat yabtam yoo YALLA» keenik iyye.

⁵⁴ Baabeloonul yakke weeqak radda xongolo ankacisay. Mango baatiy teetit tekkehiyyak gexxaamah radda xongolo oobbeya.

⁵⁵ YALLI Baabelon baysam faxa. Abak yenen kaxxa waxxaqa ken cabsiisam faxa. Baabeloonuh yamaatu waa naqboyti aba xongolo baddi haffoh xaw le.

⁵⁶ Naqboyti Baabelon baysa'gidih yamaateh yan. Kay qaskar Baabelon-qaskar abbixeleeh; gaysê-baxa keenik aggilelon. YALLI, atu bahteemih koo digaala Dagelta. Cane keenik gacseleeh; ken digaalele.

⁵⁷ YALLI iyyemii, «Abbobtih yan mara kee kasloytitiiy, xintoh abbobti kee doolatak saqoltih yan mara kee, agiirah tan qaskaray Baabeloonul tanihiyya askiriseyyo. Woo sikratat aboonu waan xiinik way muugutan. Tahat yabtam yoo Maliki. Anu YALLAY Nabaamak Nabahiyya kinniyo» iyye.

⁵⁸ YALLAY Nabaamak Nabahiyya iyyemii, «Baabelon magaalat maroh tan kaxxa gasoosa addigillele. Baabelon magaala akak culan kaxxa afoofit gira ruubelon. Tonna leemiik ummatta edde taqabba 'tem foyya akkele. Edde cawalak bicissa heenim, girâ-gadda keenik akkele» iyye.

ERMIYAAS SERAAYAH AMRI YECEE

⁵⁹ Too dabaanal Neeriyyâ-Seraaya deqsita numuy Maqseyaahu deqsita numuk baxi-baxah yanihiyya yen. Too num Yuudâ-malikiy migaaqah Xidkiya deqsitahiyyah gasoh abbah yen. Malik Xidkiya edde reede fereyhaytô-sanat Seraaya malik lih Baabelon fanah gexak suge waqdi,

⁶⁰ Ermiyaas xambabbaqe warkatay kutbe elle tani kaal yecee. Too warkat tuktubem, Ermiyaasak teneeh; elle yuktubem, Baabeloonut takku wayta umaanek ten.

⁶¹ Kaak iyyemii, «Baabelon guffu hayta waqdi, tama warkatal tanim, anay fayya haak ikriy.

⁶² Ikriyya hayteh gaba kalla hayta waqdi, intamaa, ‹YALLAW, a arac bayeleeh, rooci leemik tu elle maraqta. Daayiman abuuruy num sinniih lac sinni akkele 'yaanam inta› inxic.

⁶³ Tohuk gaba kalta waqdi, too warkat xaat uxuyya haay Furaat weeqaytut qid.

⁶⁴ Too waqdi, ‹Baabelon, YALLI teetil baahu waa umaaneh, too warkatih innah, suteleeh, wadiriik muugutta› 'yaanam inxic» kaak iyye. (Sinam isih is taqbissa.) Ermiyaas yab tama ikket yaade.