Ermiyaas 50 - NABUWWA KEE MALIKWA

BAABELOONUL YEKKE COKMI

¹ YALLI Baabelon kee Baabelon marih giddinaamak, nabi Ermiyaasal ruubem tama farmo.

² «Xaagu ummatah inkih warisa: ‹Baabelon qeebit yibbixeenih› inxica. Tah elle yaaxigoonu waan asta uybulluya! Xaaguk tu macabinay ummatah warisa. ‹Baabelon-mari yallah leemiy Marduk migaq akah abaanahiyya luk sugte qande bayteh tan. Oson yallah loonum qaybit radde. Qibaadah bicsen tasaawiriy umâ-yabulih yanihiyyal qaybih tanim baahen› keenik inxica.

³ Qeebi keenit abtu waytam, kilbat le kabuk yamaatu waa mara. Too mari baaxo abuur keenik abelon. Too baaxo tohuk wadir num sinniih lac sinni baaxoh raaqele. Sahda kee alluwwa teetik aarrele» 'yaanam YALLI iyye.

ISRAAYIL MARI ISI BAAXO FAN ADUURELE

⁴ YALLI qagseh iyyemii, «Taham takku wayta saaku, Israayil kee Yuudah ummatta weeqah ximo caxak, yooy ken Dagelta kinnihiyyah goranah amaatelon.

⁵ Siyoonuh gacan gita esserak, too gita keenih yascassoonu waan waqdi, too gita fanah afkunelon. Too waqdi yi mari, ‹Nee kee YALLI fanal, way bayu waa bica heenno› sittak axcelon.

⁶ A saaku yi mari, duwah edde yan num gitak makot bee illiy maatah yani yekken. Illiy qaleela kee koomaamih amol loyna weeh meekitahiyya ceelan. Isi dabaaqak cerrite illi yekken.

⁷ Ken gennaan mari maysattaka keenit abe. Ken qidda heenih wadir, ‹Ken qidneh immay ken qidaanam dambi nel matakka. Toh akah kinnim, ken Dageltay amo keenik wagitak sugehiyyal dambi lem baaheeniih, ken abbobti imaan elle luk sugte Dageltal imaan hoonu cineenih. Tohuk gexxaamah keenit tekkeemi› 'yaanam iyyan.

⁸ «Hay tahaysa Israayil maraw, Baabelon rasuk kuda. Teetik eweqa. Kulli marak naharat isin eweqa.

⁹ Kilbat le kabul tan qande le doolatwa titta geysissa heeh, keenit ruubeyyo. Too mari ken abbixele. Too mari keenil hawiseloonuh, qeebil keenik ayselon. A mari admol yimixxige maraay gaysê-baxa qideenik wadir, irbak boohak mahoxsan.

¹⁰ Baabelon marak duyye dannabah orbiselon. Duyyek isinnih faxeenih gide dannabah keenik beelon. Tahat yabtam yoo YALLA» 'yaanam iyye.

BAABELOONUK ELLECABO

¹¹ YALLI kaadu iyyemii, «Baabelon maraw, yi mara wararteeniih; toh siinit temqeh. Ruffu edde inten. Qaysok cayya iyyeh xobbaaqa gaalih innah xobbaqten. Canak cayye mooyuh innah kaqitten.

¹² Takkay immay sin kaxxa magaalat umâ-yabulih tanim akkele. Inah siinik sugte magaala qaybit radele. Baabelon doolat, doolatak gacca 'ta doolat akkele. Baabelon num sinniih lac sinni baaxoy kaffa karacca 'te akkele.

¹³ Yi naqbi teetil oobeleeh; tohuk gexxaamah num dabaaqah teetil magaca. Abuuruh raaqele. Xaqu teetik gaceh gexu waa mari teetit tekkem yabalu waa waqdi, wariggiteleeh, ‹Woyyow! A rasut tekkem umaamak tanih tan!› axcelon.

¹⁴ «Baabelon marat qeebi abu waa maraw, qeebih bical gaca. Maro keenit haa. Gaysê-baxak elli haytaanamak tu macabinay Baabelon mara edde qida. Baabelon umam yol bahtek, gaysê-baxa teetit haa. Yoo YALLAL umam bahte.

¹⁵ Kulli kabuk qeebi teetit aba. Taway tirtira takkeh tan! Gasoosa raddaah diglot tan. Amo xer qarway gibah xiseenihiyya qeebit yaggileenih yanin. Taway Baabelon gaba taceeh! Qeebil gacteh. Tah inkih yi digaalah sabbatah keenit tekkeemi'mmay, isin kaadu cane keenik gacsita. Oson sinaamal baahak suggu 'yeenim keenil baaha.

¹⁶ Ken baaxol daro qide kala. Tooboke daro orbe kala. Allî-baaxoh maray ken addal yanihiyya keenit tekkem yabalu waa waqdi, meysih isi baaxo aduurele» iyye.

ISRAAYIL MARI ISI BAAXOL GACELE

¹⁷ YALLI kaadu qagseh iyyemii, «Israayil mari illiy lubak soole kaleeh yayraddehiyya yekken. Naharak Assuuriyah malik cado keenik yokmeeh; sarrak Baabelon malik lafoofi keenik yiggiggile.

¹⁸ Tohuk gexxaamah, yoo YALLAY Nabaamak Nabah, Israayil doore Dagelta kinnihiyya Malik Nabkadnessar digaaleyyooh, kay baaxoh mara kaadu digaaleyyo. Duma Assuuriyah malikil bahha heem kaa kee kay baaxol baaheyyo.

¹⁹ Israayil mara le baaxoh gacseyyo. Ahak sarra ken laa Karmel kee Basan rasul aloolele. Efrayim kee Gilqad rasul taabuku wayta darok isinnih faxeenih gide akmelon.

²⁰ Too saaku, Israayil kee Yuudâ-marak saaboh raaqe maray Baabelon malikih gabak rooci edde catehiyyah qafu abeyyoomuh sabbatah, dambi le mari ken baaxol masuga. Duma abeenim keenih cabeyyo. Tahat yabtam yoo YALLA» 'yaanam iyye.

BAABELOONUT TEKKE DIGAALA

²¹ YALLI Baabelon marih naqboytiitik iyyemii, «Maraatayim kee Fakod marat qeebi aba. Xakaake ken kalaay ken kee ken midir inkih bayisa. Sin amrissam yoo YALLA'mmay, anu siinik akah inxicca exce'nnah aba» keenik iyye.

²² Qagseh iyyemii, «Baaxol kaxxa carbi radah yan. Kaxxa baati takke.

²³ Baabelon mari ummat edde yaggiggilen maatakah suge'mmay, a saaku isinnih yiddigillen. Baabelon abur tekkeh tani'mmay, sinam inkih teetit tekkem table way wariggitele.

²⁴ Baabelon maraw, qeebi edde abteenim yoo'mmay, a saaku anu siinih hee ofloh addat radden. Oflo siinih haytem yoo kinnim aaxige'kal, edde radden.

²⁵ Yi silac daanat elle yan qarik afa fakeeh, abeh an bagcarrah woo silac eyyeeqeh. Akah eyyeeqem, yoo YALLAY Mulki leeh Nabaamak Nabahiyya, a saaku Baabelon rasul abam faxam liyoomih sabbata.

²⁶ Kulli gambik tet fanah ama. Tet addal tan riigitte faka. Orobte daro inki aracal elle gaaboysan innah, tet addal tanim inki aracal gaaboysak tittak bagul haay, bayisa. Tu tet bagul macabinay inkih bayisaay abuuruh caba.

²⁷ Qaskar keenik sela. Saqi innah ken usguuda. Baabelon mari bayele. Keenit digaala edde takku wayta wakti yemeeteh» iyye.

²⁸ Ankacisa! Baabeloonuk kude mari Siyon fanah yamaateh yan! Tokkel, duma Yallih Qibaadah Qaril baaheenimih caneh, YALLAY ni Dageltah yanihiyya Baabeloonul baaheemit yaabeloonuk, ken ankacisa.

²⁹ YALLI iyyemii, «Gaysê-baxi qalaamal yaaxigen marak, ‹Ugutay, Baabelon marat qeebi aba› inxica. Magaala keenik marot haay num keenik awqe kala. Oson sinaamal bahha heenim keenil baaha. Oson sahda edde abbaxuk sugen xintot ken haa. Toh keenik aba akah axcem, yoo YALLA aaxaguk masuginnoonuuy, kaxxiina xagarat hayya heenih, anu faxe waam abak sugen. Anu YALLAY *kudduusuk yaniih Israayil ummat doore Dagelta kinniyo.

³⁰ Tohuk gexxaamah, too takku wayta ayro, furrayna magaalak gitittel keenik qidelon. Qaskar kaadu keenik selelon. Tahat yabtam yoo YALLA» iyye.

³¹ YALLAY Dagelta kinnih, Nabaamak Nabahiyya kaadu qagseh iyyeemih, «Baabelon maraw, isin yol kaxxiinitteenim hinna! Wohoysa a saaku naqboytah siinik maaciseh an. Sin edde digaalu waa wakti xayyooweh.

³² Sin doolatay kaxxiinah moyya qaraanal haytahiyya andafoofelele. Tondofoofoleh annikissele. Tohuk wadir num sin muugusa. Sin magaaloolit gira ruubeyyo. Keenil sugga 'tem inkih too girah gadda akkele» iyye.

³³ YALLAY Nabaamak Nabahiyya iyyemii, «Israayil kee Yuudâ-mari kaxxa xukkoh addat yan. Ken yabbixe mari wagittoh keenit yaniih, rike ken gexi mahaan.

³⁴ Takkay immay ken cattu waytam, inki celemi. Maa celemiiy inteenik, YALLAY Nabaamak Nabahiyya. Keenit tekkeemih adda isih wagtele. Baabelon mara amaan waysiisele'mmay, gersi mara inkih amaanah xiinisele» iyye.

³⁵ YALLI kaadu qagseh iyyemii, «Baabelon-baaxoh-mara kee Baabelon-magaalah-marat qeebi aba! Ken doolatih abbobti kee oson kasloytiitih lon mara qida!

³⁶ Oson ginnili kee kalluwalleh lon marat qeebi aba! Too waqdi kaxxa duquurah sugeenim aaxigelon. Ken qaskarat qeebi aba! Ahak sarra kaxxa cunxo keenit radele.

³⁷ Oson edde gexan faaris kee faras-gaari selaanama! Marin baaxok qeebih baahen qaskar keenik baysaanama! Too qaskar qeebih gaba marubtaay, agbi innah amuggurelon. Ken gadda selaanama! Luk sugeenim keenik beelon.

³⁸ Lee luk sugte buyyitte inkih keenik kafeleeh, rob mageyta! Yalla cinna heenih umâ-yabulih-tan-duyye-qibaadat cissi cabe mara kinnoonumih sabbatah, tamah keenit takku waytaama.

³⁹ Tohuk wadir bacarih tan baaxoh alluwwa kee, yangulwa kee inin dabaq akkele. Sahdah tu gactekiiy, wadiriik adok adoh amma 'yaanam dabaaqah teetil magacta.

⁴⁰ Sodom kee Gomorra kee woo namma magaalah xaqul sugte gaandoodit dumah tikka 'tem Baabeloonut akkele. Tohuk wadir sahda Baabelon magaalal dabaaqah wadiriik magacta. Tahat yabtam yoo YALLA» iyye.

⁴¹ Yalli kaadu qagseh iyyemii, «Kilbat le kabuk doolat tamaate. Kaxxa doolat kee mango malikwa qeebih bicat tan. Too malikwa akak tamaatu waytam, baaxô maggaraqa.

⁴² Tikyah macaxu kee gaysê-baxa loonuuh; racmatta kee xuwaawah loonum malon. Faarisit gacca 'yeenih gexan way, haffo baaha badih xaw lon. Baabelon maraw, siinit qeebi abaana'gidih, roorul gacca 'yeenih yamaaten.

⁴³ Baabelon malik a xaagu geeh, tohuk gexxaamah gaba kaak meysih kafteh matangayya. Kaxxa cunxo kaat raddeh taniih, lacawat tan barrah innah araadaqisa» iyye.

⁴⁴ Yalli qagseh iyyemii, «Ordon garboh addak garciik yewqe lubak lac elle gilisa'nnal, Baabelon-mara giliseyyo. Ken magaalak ken xiiriyeyyo. Tohuk wadir too baaxol innih doore abba heeyyo. Yoo eleelu iyyi duudaa? Yol saduh gactu duddam iyyaay? Yi foocal soolu duuda amoyti mayan.

⁴⁵ Anu Baabelon marah malse mala yok oobbeya. Baabelon rasul baaham faxam siinih warisu waak, yok ankacisa. Xaylo keenik hirriigisak beyya heenih baaxot qidelon. Ken baaxo ken umaaneh sabbatah bayseyyo.

⁴⁶ Baabelon mara yabbaxoonu waan saaku, aboonu waan deerok gexxaamah, baaxo edde engeyya axcele. Ken weeqi mango baaxoh addal antaabbele» 'yaanam iyye.