Ermiyaas 5 - NABUWWA KEE MALIKWA

CAKKI LE NUM YARUSALAAMAL MAGEYTIMA

¹ YALLI iyyeemih: «Ugutay! Yarusalaam magaalak adda wagga haay! Dariifa kaadu isinnik wagga haay! Qadaaga elle takke arooca kaadu cubbusay! Inki numuy yeemeneenih cakkih tanim abahiyya Yarusalaam addal mageytima. Geytimma 'yek, Yarusalaam marah qafu abeyyo.

² Yi migaaqal xiibitaanah immay akah xiibitaanam maaban» 'yaanam iyye.

³ YALLAW, atu faxxam, yaaminen maray atu faxxaamak amot tu hee waahiyya. Ken biyaakisseh immay tuh maballon; digaala keenil oobisseh immay kas akak magennon. Yab yaabbeeh dambik yaduure mara hinnon; afqado keenik xeet tekke.

⁴ Tah keenik ubleeh, too waqdi inni bagul ucsubeemih: «A mari masaakiinay tu aaxige waytahiyyak tanih tan» 'yaanam ucsube. «Ken Dagelti keenik faxam yaaxigeenih mayanin; duquurak tanih tan. YALLI aba keenik iyyem kinnim yaaxigeenih mayanin» 'yaanam inni bagul exce.

⁵ Tohuk lakal «Idoolal keenik gexeyyooh, ken idoola lih yaabeyyo. Too mari YALLIH gita yaaxigeeh, Yalli iyyem yaaxige maraay; keenil gexeyyo» 'yaanam inni bagul ucsube. Takkay immay oson kaadu yakkeenimik inkih, Yallih yab cine maray Yallak yexxeerehiyyak sugen.

⁶ Ta umaanek gexxaamah, garboh addak tewqe lubookah gadda akkelon. Bacaril tan suula ken kitittifele. Kabqi oson elle yanin magaaloolih dariifal ilaalisak suggu 'yeh; yawqen waqdi ken kitittifele. Toh keenit akah takku waytam, aban dambi keenik yemeggeh. Ayrok ayro uma taamat qagitak maacisan.

⁷ YALLI siinik iyyeemihii, «Isin yi mara kinniton immay yoo cabba hayteenih gabak bicsen duyyek Yalla inteeniih taqbudeenik, tohoysa qafu mannal siinih axce? Maaqok nagay sin adoobiseeh, rike siinit macabinniyo'mmay caraamuk aade cinteeniih, xiiqareh-xiinâ-buxaaxi dabaaqah haysitten.

⁸ Yessemeeqe rakuubuy alal radam faxaah muxahiyya yekken. Kulli num keenik cuggayti barrah sangeela.

⁹ Tannah yan mara digaale week, maa mara digaalah an? Ken digaaleyyo. Ta marak cane gacseyyo. Tahat yabtam yoo YALLA.

¹⁰ «Qinab cooxuy xaylo xalahiyya keenik bayisu waa maray keenik naqboytiitih yanihiyya keenit ruubeyyo. Takkay immay too coox inkitanuuk bayi keenik maha. Tonna'mmay qinab cooxuk ludwa yim akke sinniimih sabbatah, yargaqoonay axceyyo.

¹¹ Israayil kee Yuudah ummatta imaan yol mali. Tahat yabtam yoo YALLA» siinik iyye.

¹² Yallih-mari YALLA cineeh, iyyeenimih, «YALLI abaamah lem mali. Nanu kaadu ahaysa gibdaabinah linom mannu. Ahaysa carbi kee qululuh nabalu waynam mannu.

¹³ Nabuwwa ufuyuk kiben karbatik gide ikkal, xiqaanam malonuuy, Yallak baahan farmo malon. Oson iyyeenim keenit takku waytaama» iyyen.

¹⁴ Takkay immay YALLAY Nabaamak Naba Dagelta kinnihiyya yok iyyeemih, «Ermiyaasow, a mari tamah yok iyyeh yani'mmay, yi yaabay ku afak yawqehiyya gira keenil abeyyooh, atu lih yabta mara boco abeyyo. Too gira ken selele» 'yaanam yok iyye.

¹⁵ Tonna leemiik YALLI siinik iyyaamah, «Israayil maraw, qeebi siinit abaana'gidih doolat xer baaxok siinit ruubeyyo. Too doolat dumaak sugte doolataay; isin cayla akah geytan doolat hinna. Af keenik kaadu mataaxigan.

¹⁶ Qaskar keenik kaxxa qande leeh, gabat lon gaysê-baxat racmatta maleh sahda qidan.

¹⁷ Buqrek orbissen daro kee buxal liton maaqo sella siinik heelon. Xaylo siinik qidelon. Illi kee wadar kee laa siinik qidelon. Qinab xaylo xala coox kee sublâ-coox siinik argiggiqelon. Kaxxam amo elle meqiton magaalooliy gaso maroh edde tani silaacat bayselon» 'yaanam siinik iyya.

¹⁸ YALLI iyyaamah, «Too ayroora kinni way, inni ummatta inkitanuuk mabayisa.

¹⁹ ‹A axxul le umaane nel akah baaham faxam macaay?› kok iyyoonu waan waqdi, Ermiyaasow, atu keenik intu waytaamah, ‹YALLI, isin yoo cinna hayteenih mari aqbuduk suge duyye isinni baaxoh addal taqbudeeniih, tonna'mmay isin kaadu sin baaxo akke sinni marin baaxol marin naqoosa akketton, yok iyye› keenik axcetto» iyyah yan.

YUUDÂ-MARI CINAT CABE

²⁰ YALLI iyyeemih, «Isin, Yaqkuubuk rade maray Yuuda deqsitahiyyak, annah inxica:

²¹ Kee, hawri-maleelay, xangi-maleelay, oobbeya. Inti litoonuh immay matablan; ayti litoonuh immay mataabban.

²² Anu YALLA kinniyok, macah yok meysite waytan? Yok foocal macah axaxite waytan? Bad edde yaade aracah qidde abe; bad too qiddek bisoh way mataba. Bad saacilik koram takkeh immay kaah heeh aracak taturra 'yeh bisoh magexa. Bad haffitaah xongolaamah, isi arac cabeh magexa.

²³ Isin yab aabbe sinni mara tekken. Yoo cabteeniih, cakki gitak tewqeenih.

²⁴ ‹Karma kee dabaybaay sugumut rob neh ruubaah, sanataak sanatal nakme daro nee waysiise waa Dageltak meysinnu wayna. YALLAY ni Dagelta kinnihiyyak meysinnu wayna› mantan.

²⁵ Isin abtan dambi kee umaane, ta maqaane sin gee kalteh.

²⁶ Yi marih addat uma mari yan. Ta mari oflot-kimbir-yabbixem-faxa-marih innah raarisan. Oflot yabbixeenim faxaanam sinaama'kkal, kimbir hinna.

²⁷ Kimbir admot yan num, kimbir-edde-haan-qari kimbiirik elle kiba'nnal, too mari kaadu sinaamak buuben duyyek isinni buxaaxi kiben. Kaxxa qande kee gaddaliino akah loonum tohu.

²⁸ Gabul akah loonuuh akah aroodaanam tohu. Ken umaane caddo cabteh. Qayxiixah, le cakki mayacaanaay xukkot yan marah qadaalatal mayackuman.

²⁹ Tannah yan mara digaale week, maa mara digaalah an? Ken digaaleyyo. Ta marak cane gacseyyo. Tahat yabtam yoo YALLA.

³⁰ «A baaxoh addal takkem, umâ-yabulih taniimi.

³¹ Toh macaay inteenik, nabuwwa diraabak sa nummat yaabe waytam tibbixe. Seeka nabuwwa aba intem abta. Yi mari tohum yableh immay akak iyyam mali! Hay meqehik, ellecaboh ayroy kullim gaba edde kalta maca abetton?» 'yaanam siinik iyye.