Ermiyaas 49 - NABUWWA KEE MALIKWA

QAMMON MARAL YALLI RUUBE DIGAALA

¹ Qammon giddinaamak YALLI iyyem ah teeti. «Milkom deqsittam yaqbude maray Qammonuh yooboke, Israayilik Gaadah yooboke marih baaxo beyya heenih, ken magaaloolil isinnih akah gacaanam macaay? Israayil mari, is nagartu wayta xaylo maay waa?

² Qammon rasuk inaytâ-magaalay Rabba deqsittal yakku waa qeebik xongolo edde oobba haan wakti amaatele. Too magaala abuuruh raaqele. Tet dariifal tan gaandoodi carriselon. Israayil mari isinni baaxoy keenik beeni gacsitelon.

³ Qaay baateh tanik, Cesbon maraw, boogisa! Rabba deqsitta magaalah agabow, rookita! *Qabuudut gacaay rookita. Meekitay *emreereya. Macaay inteenik, isin yallah liton Milkom kee kay seeka kee kay makaabon inkih seewah siinik beelon.

⁴ Imaan maleelay, ‹Ni baaxo niqmat le baaxooy; linom kaxxa midiri› intan. Isinni caylat kaxxam takkalen; ‹Net qeebi abu num mayalliila› axcuk hidah rabtan.

⁵ Yoo YALLAY Dagelta kinnih, Nabaamak Nabahiyya siinik iyyaamah: Kulli kabuk umaane siinit ruubeyyo. Too waqdi kulli num siinik kudmah hayya heeleeh; baaxo cabetton. Kulli num siinik isi roocih megloh kudele. Sarrak luk sugten qaskar gaabossa heeh titta fanah baaha num mageytan.

⁶ Takkay immay sarrî-dabaanal Qammon mara akah sugen gaddaleelah gacseyyo. Tahat yabtam yoo YALLA» iyye.

EDOMUT YEKKE COKMI

⁷ Edom giddinaamak YALLAY Nabaamak Nabahiyya iyyem ah teeti. «Edom mari luk yen kas cabeh innaa? Ken fayisak yen marih kas manke gexeeh? Oson luk yenen kas keenik kuuleh maay maacise?

⁸ Dadan magaalal yan maraw, wadir gacay kuda! Gablah addat ombooqoray suga. Qiisok rade mara baysam faxa. Ken edde digaalu waa wakti yemeeteh.

⁹ Qinab xaylo yafiile mari, caxah amot xaylok tu caba'kkal inkih mayafiila. Tonnah kaadu, garqi bar garqa aba waqdi, buxal sugga 'tem guurra heeh mabeyaay, duudeh gide luk gexa.

¹⁰ Yoh tu gactek, Qiisok rade marak tu macabaay, luk sugeenimik foyyal ken cabba heeyyo. Edde yambooqoren arac keenih macabaay, gubbik bagul akah qellite waan innah, keenik abeyyo. Edom mari inkih bayeleeh, num keenik maraaqa.

¹¹ Siinik raqtu wayta qayxiixa yol caba. Anu amo keenik wagteyyo. Sin gubuunuh amo kaadu anu wagteyyo.

¹² Digaala akah aguude wayta mari diggalsimelek, siiniy umaanet asehiyya cattiimelem mannal takkaleenih? Digaala siinit akkelem taaxigeenimi.

¹³ Bosrâ-magaalat baati akkeleemih inni migaaqal xiibita. Umâ-yabulih tanim teetit akkeleeh, num sinniih lac sinni abuuruh raaqele. Sahda teetil anqaasele. ‹Bosrat tekkem siinit takkay› axcuk abaaroh tet haysitelon. Tet dariifal tan gaandoodi abur akkele. Kulli waqdi abuuruh raaqele. Tahat yabtam yoo YALLA» 'yaanam iyye.

¹⁴ Ermiyaas qagseh iyyeemih, «Edom maraw, YALLAK farmo yol obte. YALLI qeebi siinit abu waa marah farmo ruubeeh, ‹Gaaboowaay Edom marat qeebi abtoonuh bical gaca› 'yaanam iyye.

¹⁵ Macaay inteenik, Yalli siinik iyyaamah, ‹Edom maraw, sin boolayseyyooh; bursuten mara sin abeyyo.

¹⁶ Sahda nek meysitta axcuk kaxxiinittaanah immay, sin kaxxiina sin aylahisseh. Dabaaqah elle tantoonum, xixxaqak kibuk tan boolok bagu. Dabaaqah qawiitak kaxxih fayya le aracal tantoonu'mmay, anu addah sin oobiseyyo. Tahat yabtam yoo YALLA› » keenik iyye.

¹⁷ Sarrak YALLI kaadu iyyemii, «Edom bayele. Teetit tekke baati yabalu waa mari wariggiteleeh, ‹A mari bayeh yan› axcelon.

¹⁸ Duma Sodom kee Gomorra kee ken dariifal sugte gaandoodit tekke umaane Edomut akkele. Sahdayti teetil wadiriik magaca. Tahat yabtam yoo YALLA» iyye.

¹⁹ «Ordon garboh addak garciik yewqe lubak lac elle gilisa'nnal, ken giliseyyo. Ken baaxok ken xiiriyeyyo. Tohuk wadir too baaxol innih doore abba heeyyo. Yoo eleelu iyyi duudaa? Yol saduh gactu duddam iyyaay? Yi foocal soolu duuda amoyti mayan.

²⁰ Tonna'mmay ta saaku Edom marah malse mala yok oobbeya. Teman-magaala kee teetil yan maral baaham faxam siinih warisu waak, yok ankacisa. Xaylo keenik hirriigisak beyya heenih baaxot qidelon. Ken baaxo ken umaaneh sabbatah bayseyyo.

²¹ Edom mari bayu waa saaku radda xongoloh, Yallih baaxo inkih angayyele. Oson aban weeqih anay Qasa Badal antaabbele.

²² Bosrâ-magaalal yan marat ken naqboytit, qawi galwa fakka hayteh tamaate way sahdak gital duyye elle qawta'nnal, ken qawelon. Too saaku Edom qaskar meysih lacawat tan barrah innah gacelon» 'yaanam Yalli iyye.

DAMASKOL YEKKE COKMI

²³ Damaskoh magaalah giddinaamak YALLI iyyem ah teeti. «Camat kee Arfad magaalal yan mari kaxxam cisabbootiyyat yaniih; too cisabbootiyyat akah yaniinim, uma xaagu yoobbeenimih sabbata. Edde yaniinim ankakkaqe kee cisabbootiyyak, mayaffoofan.

²⁴ Damaskoh mari boolaateeh; abeh yan meysih kudam faxa. Lacawat tan barrah innah, edde yaniinim, uma biyaaka.

²⁵ Damasko duma kaxxa migaq luk ten magaalay sinam farcik elle sugtehiyya immay, a saaku teetik kudaanama.

²⁶ Ahak sarra, tet furrayna kaxxa magaalah gititteh addal qideloonuuh; tet qaskar ambaxele.

²⁷ Damaskoh gasot gira ruubeyyo. Malik Banihadad buxa carriseyyo. Tahat yabtam yoo Nabaamak Naba YALLA» iyye.

KEEDAR KEE CAXORUL YEKKE COKMI

²⁸ YALLI kaadu Keedar deqsitta kedo kee, Caxor deqsita numih milkih ten baaxooxay Malik Nabkadnessar qeebit yibbixehiyyah giddinaamak iyyeemih, «Keedarah yooboke marat qeebi abaay, ayrô-mawqa le kabut raaqa mara sela.

²⁹ Siraqwa kee illi keenik dannabah orbisa. Siraq addal lon reebuh haan sara keenik beya. Siraq addal elle haanamak tu macabinay dannabah keenik beya. Gaala kaadu keenik buuba. Too waqdi ‹Kulli ikkel cunxo net qidan!› 'yaanam axcelon.

³⁰ Caxor maraw, yooy YALLAH yani siinih warsaamah, Malik Nabkadnessar siinih malseh yanik, xer baaxo fan kudaay; gablah addat ombooqoray suga. Garci siinih kalah an.

³¹ Yoo YALLI kaadu Nabkadnessarak iyyaamah, ‹Caxor-maray isi baaxo kaxxa amaanah xiinahiyyat qeebi aba. Ken mandarwa akak culan afay alfintahiyya maliiy; sinam lih kaadu hebeltô-qalla mahaysitinnoonuk, qeebi keenit aba.

³² Gaala keenik dannabah beya. Laa keenik dannabah orbisa› kaak exce. Keeniy amô-xagor namma seltak isik yargiqehiyya kulli baaxol fixixih ruubeyyo. Kulli kabuk bala keenil oobiseyyo.

³³ Caxor bacarih tan baaxoy num sinniih lac sinnihiyyah raaqele. Tohuk wadir sahdayti dabaaqah teetil magaca'mmay, alluwwâ-dabaq akkele. Tahat yabtam yoo YALLA» 'yaanam iyye.

QEELAMAL YEKKE COKMI

³⁴ Xidkiya Yuudâ-malik edde yekkeemit xayi saaku, YALLAY Nabaamak Nabahiyya Qeelam giddinaamak Ermiyaasal oobise qangara ah teeti.

³⁵ Kaak iyyemii, «Qeelam-rasul cayla-leelah yan maray gaysê-xayloh qidimil yimixxigehiyya seleyyo.

³⁶ Qeelam rasul affara kaalibik naqboytit caacoh innal ruubeyyo. Teetil yan mari baaxo cabeleeh, marin baaxooxat ken fixixiseyyo.

³⁷ Ken naqboytiitiy ken qidam faxahiyyak cunxita mara ken abeyyo. Bala keenil ruubeyyo. Yi bagcarra keenil oobele. Saabo cabba haanam fanah carbit ken selu waa mara keenit ruubeyyo.

³⁸ Qeelamal yan ken malik kee makaabon qidda heeh, inni dardaarinnih korsi elle daabiseyyo.

³⁹ Takkay immay ken baysek sarra ken gacseyyooh, akah sugen gaddaleela ken abeyyo. Tahat yabtam yoo YALLA» 'yaanam iyye.