Ermiyaas 48 - NABUWWA KEE MALIKWA

MOOYAB MARAL YALLI RUUBU WAA DIGAALA

¹ YALLAY Nabaamak Nabah, Israayil doore Dagelta kinnihiyya Mooyab marih giddinaamak iyyeemih, «Woyyow Nabo deqsitta magaalat takku waytaama! Too magaala abuuruh raaqele. Kiryatyim-magaala qaybit radeleh antixibbixele. Kaxxa gasoosay maroh teetit tenehiyya addigillele. Teetil yan mari qaybit radele.

² Mooyab mari luk yen migaq-gexxo gaba kalele. Cesbon-mari Mooyab mara edde bayisu waa malat yanin. ‹Amay a doolat bayisnay› 'yaanam tittak iyyan. Madmeen-magaala deqsitta magaalal yan marat qeebi abta qaskar ruubeloonuh, tibba ken heelon.

³ Coronyim deqsitta magaalal yan marih weeqa ankacisa! Too marat takke baati kee finqak-gexxaamah aban weeqa ankacca haay!

⁴ Mooyab marat baati tekke. Mooyab marih xayloy qunxahiyyah weeqa naabbeh nan.

⁵ Lucit deqsita arac fan gexa gita koran waqdi, kaxxam weeqak gexan. Coronyim deqsita aracah amma iyyan way, tekkeh tan baatih aban weeqih anay rada.

⁶ ‹Kuday! Isillima! Bakarroytah tan baaxol tooboke caxah innah yassamme mara tika› 'yaanam axcelon.

⁷ Mooyab maraw, isinni taama kee gaddaliinot kaxxam tekkeleeni'mmay, a saaku wohim siinih xiqtam maliiy; qeebil gacetton. Kamos akak intaanamay yallah litoonuhiyya kee, kay seeka kee kay makaabon inkih seewah orbiselon.

⁸ A naqboytit baahu waa baatik tu maraqta. Magaalooli inkih bayselon. Goloh addal tanim bayselon; gubbil tanim macabaanay bayselon. Tahat yabtam yoo YALLA» 'yaanam iyye.

⁹ «Mooyab rasi xayi saakut bayele'mmay edde haadaana'gidih galwa keenit haa. Mooyab magaalooli abuuruh raaqele; num sinniih lac sinni booxah raaqele» 'yaanam iyye.

¹⁰ YALLI aba iyyem baguuk abe waa num abbarsimay. Seef siibe waah qide waa num, Yallih abaaro guftay.

¹¹ YALLI iyyeemih, «Mooyab mari dumah yan saaku amaanah sugeeh, seewah ahaydumah ken orbiseenih masuginnon. Ken tesgeyyem masuginnaay; qibnah innah isinni buxak yewqeenih masuginnon. Tohuk gexxaamah massaamma yubleenih masuginnon.

¹² Takkay immay qinab kamrih innah, baaxot ken caxu waa mara keenit ruubu waa wakti amaatele. Tahat yabtam yoo YALLA. Luk sugen assamaqiyyi gaba keenik kalele.

¹³ Duma Israayil, elle aaminuk yen Beetalat wacarriyya akah iyyen innah, Mooyab mari kaadu ah keenit takku wayta saaku, Kamos akak 'yaanamay yallah loonuhiyyah abak sugen qibaadat wacarriyelon.

¹⁴ «Mooyab maraw, isin, ‹Agiiray qeebil timixxigehiyya kinnino› elle intaanam macaay?

¹⁵ Mooyab kee Mooyab magaalooli finqitele. Qax-meqe furrayna keenik qeebit rabele. Tahat yabtam yoo Malikiy Nabaamak Naba YALLA kinnihiyya» 'yaanam iyye.

¹⁶ YALLI kaadu qagseh iyyeemih, «Mooyab marih baati maxeeri; keenil obtu wayta bala xayih.

¹⁷ Mooyab rasu aaxaguk yeneeh teetik cuggaaneh yen maraw, teetih rookita! Mooyab duma luk sugte migaq-gexxo yaaxige maraw, teetih weeqa! ‹Mooyab rasul ten cayla le xinto a saaku matan. Tet nabna kee qande gaba kalteh› teetik inxicay teetih boogisa.

¹⁸ «Mooyab rasu bayisu waa num yemeeteh yan. Gaso maroh edde tan magaalooli bayse. Tonna kinnuk Diboonul yan maraw, ama elle tanton kaxxa aracak ugutay. Annah amay guddaafak bagul daffeya.

¹⁹ Isin kaadu Qarooqeril yan maraw, ama giti xaqul soolay elle idiyaay; kuda mara tablen waqdi, ‹Maca tekkeh? Maca sin kudussa?› keenik inxica.

²⁰ Tekkem too waqdi siinih warselon. ‹Mooyab ikke tekkeh! Qawrat tet yibbixeh; teetih weeqaay boogisa› siinik axcelon. Arnon weeqaytih xaqul gacca 'xicay Mooyab baatem sinaamah warisa.

²¹ «YALLI gubbik bagul tan magaaloolil digaala oobise. Colon kee Yahxa kee Mefaqat kee

²² Dibon kee Nabo kee Beet-Diblatayim kee

²³ Kiryatyim kee Beet-Gamul kee Beet-Maqon kee

²⁴ Karyot kee Bosra deqsitta magaaloolih marak, xer ikkel tanim kee xayi'kkel taniimil inkih, Yalli cokmi edde abu waa wakti yemeeteh yan.

²⁵ Mooyab rasi luk yen qande weele. Mooyab rasi luk yen nabna ahak wadir foyya akkele. Tahat yabtam yoo YALLA» 'yaanam iyye.

²⁶ YALLI kaadu iyyeemih, «Mooyab mari yot missoowaanam faxak suge'mmay askireloonuuh, isinnih aben alliyot amboroorokelon. Sinam keenil anqaasah rabele.

²⁷ Mooyab maraw, isin duma Israayil maral af reqeeqisak sugteenim kassa haa. Ken giddinaamat yaabinnaan waqdi, garqot yibbixen marih innah, amo keenil kax haak sugten.

²⁸ Mooyabal yan maraw, Mooyab magaaloolik eweqay. Booloh amot gaca. Boolok bagut qarwa xisitta kukkurru tika.

²⁹ Mooyab marih kaxxiina kee fillat-ufuyhayiyyaay qubbuytoh xaagu linoh. Kaxxam isinnit yakkaleenimih xaagu keenik geyneh nan.

³⁰ Yoh tu gactek, anu oson sahdat aban bura kee, isinni nabsit yakkaleenih gide keenik ableh ani'mmay, woh tu keenih maxiqta. Abeenim inkih gaba kalele. Tahat yabtam yoo YALLA» 'yaanam iyye.

³¹ «Tohuk gexxaamah Mooyab rasul enna 'ya marah inkih weeqah an. Kiir-Ceras labhah boogisah an.

³² Yaqder marak fula Sibmâ-marat takku waytam yoo biyaktah tan. Sibmâ-magaalah mari le qinab xaylo xalta cooxuk luddi, xexxaarah Yaqder garil yan bad fan gufe. A saakuh tu gactek, naqboytit ken cooxih xaylo kee qinab inkih bayisse.

³³ Mooyab rasuy niqmatak yanihiyyal, Mooyab mari abak suge farcat kee raacat gaba kaleh. A saaku anu kamri-bicsiyyak ken kaleh; qinabak kamri bicsaah, farcatah gad abak yen mari mayanaay; gad elle abak sugen ikkel, rookat yanin.

³⁴ Cesbon kee Elqaale mari weeqat yan. Oson aban weeqi Yahax magaalal yantaabbe. Doqar magaalal yan mari kaadu yaabbeh. Coronyim kee Eglat-Selisiya fan yantaabbe. Nimrim deqsita buyyi kinni-way a saaku kafeeh lee mali.

³⁵ Mooyab mari yallah le duyye elle yaqbuden aracal aban sadgat kee, too duyyeh qibaadah ruuban qaydarus ahak wadir ayseedeyyo. Tahat yabtam yoo YALLA» 'yaanam iyye.

³⁶ YALLI kaadu qagseh iyyeemih, «Afqado yok Mooyab kee Kiir-Cerasat yan marah danantah tan. Luk suggu 'yeenim weelon. Tohih sabbatah rabe marah yassallen inna keenih assalleh an.

³⁷ Yakkeenimik amo kee deben isinnik mooleenih, xagar kaadu isinnik toobiyeeniih, sartanah *qabuudut gacen.

³⁸ Mooyab marih qarwah amoy elle daffeyaanahiyya kee, sinam elle gaabowta aroocal, a saaku rookak sah yaabben xongolo matan. Anu Mooyab mara ahaysa yiddigille galqiy baaxot qideenihiyya ken abeh an.

³⁹ Mooyab mari finqiteeh, bala ken tibbixeh. Edde yaniinim, booge! Qaybi ken yibbixeh. Sahda elle anqassa mara yekken. Keenil xayi baaxoh mari ken yable way, kaxxa wariggah wariggitaanaah, anqaasah keenil raban. Tahat yabtam yoo YALLA» iyye.

⁴⁰ YALLI iyyeemih, «Qawi qawtam faxxa waqdi raarisak elle tamaate'nnal, Mooyab marat buuba abu waa mari raarisak yamaate.

⁴¹ Ken magaalooli kee megdebih lon arooca inkih antixibbixele. Too saaku Mooyab mari cunxoh, lacawat tan barrah inna assaallelon.

⁴² Mooyab mari yot missoowaanam faxak suge'mmay, ahaysa doolat mayakkan.

⁴³ Mooyab-maraw, ahak sarra cunxo siinit qidda bala siinit ruubeyyo. Edde raddoonu waytan boodo kee oflo ahak sarra siinih heeyyo.

⁴⁴ A balak kudam faxa num yenek, boodot radele. Boodok waalih gacam faxa num yenek, kaadu ofloh addat radele. Tah dumaak ken elle digaala'gidih eyyeeqe gitaay; ta digaalak way macattiiman. Tahat yabtam yoo YALLA» iyye.

⁴⁵ «Dabbô-maray taqbehiyya Cesbon magaalay duma malik Sicon malikih elle sugehiyyat reebu gorrisak yemeeten. Takkay immay ta saaku habuubugutta gira, woo magaalak qimbisak, baaxo inkih dudde. Mooyab maray qeebi kicinuk yenehiyyah cuduud kee qaleelah amot gira gexxeeh sellinteh.

⁴⁶ Mooyab maraw, sinim tekkeh! Kamos deqsittaamak yalla iyya maray too duyye aqbuduk sugehiyyah ikke tekkeh. Say-xaylo kee lab-xaylo inkih seewah siinik been.

⁴⁷ «Takkay immay sarrî-dabaanal luk sugen gaddaliino keenih gacseyyo. Tah intam yoo YALLA. Anu Mooyab maral abe cokmi tokket yeede» iyye.