Ermiyaas 47 - NABUWWA KEE MALIKWA*FILISTIIN MARAL YALLI RUUBE DIGAALA 1 Masri-malik, Gaada deqsitta magaala yabbixeemik duma, YALLI *Filistiin marih giddinaamak nabi Ermiyaasal qangara oobise. 2 Kaak iyyeemih, «Wagit! Weeqi kilbat le kabuk yamaatem. Tama weeqi sarra kaxxa weeqaytu akkele. Too weeqi yamaatu waa wakti, daqaaral tu macabaay gubbil tu macaba. Magaala kee magaalah addal yan marak tu macaba. Ta weeqi edde yamaatu waa wakti, sugu waa mari boogiseleeh, catoh gaba deerih heelon. 3 Faarisiy yardehiyyak ibi xongolo antaabbele. Faaris-gaariiray xoxobak tamaatek radda xongolo aabbelon. Gaariirah ibih xongolo sinaamal radele. Abbobti xaylo makassaay, baxi abbak, ‹Yi abbaw yoo cat› iyyaamah, abba abeh yan wariggah gurmuddi'nnah soolak raaqele. 4 Macaay inteenik, Filistiin baaxo edde baatu wayta wakti xayih; Suur kee Sayda magaalal yan marih catoh amaate raare mara edde baysoonu waan wakti xayih. YALLI Filistiin mara edde baysam faxa wakti xayih. Too maray duma baddi afak Kireet deqsita aracak yemeetehiyya baysam faxa. 5 Gaadâ-mari kaxxa rookah amo isinnik moolah able. Askalon mari kaxxa tibba abah able. Filistiin marak rabak raaqe mari rookah xagar isik qanxisah able. 6 ‹YALLIH seefow, sahdâ-qidimik taadayu waytam maa saakuu? Ahaysa isi sibah uduuray sahdâ-qidim koo xiqay inxic› 'yaanam axcelon. 7 Takkay immay YALLI tet akah amriseemih sabbatah, a seef qidimik mataadiya. Ama seef Askalon marat qeebi abeleeh; baddi afal yan marat kaadu qeebi abe'kal mataadiya» 'yaanam YALLI iyye. |