Ermiyaas 46 - NABUWWA KEE MALIKWA

¹ YALLI doolatwah giddinaamak nabi Ermiyaasal oobise yab ah kaana.

MASRI MARI QEEBIL NASRI WEE

² Yoosiyaahû-Yahoyaakim Yuudâ-malik edde yekke fereyhaytô sanat, Furaat weeqaytih xaqul Karkamis deqsita aracal, Baabelon-malikiy Nabkadnessar deqsitahiyya, Masri-malikiy migaaqah Nako deqsitahiyya le qaskarat qeebi abeeh, qeebil keenik yeyse. Too saaku YALLI, Masri giddinaamak Ermiyaasak iyyeh sugem ah teeti:

³ «Masri-qaskarih-abbobti tirtirisah aabbe. ‹Gob bical haay; ugutay qeebih foora. Gob haysitaay bical gaca.

⁴ Faariisit cakkam haay koori elle haa. Rooruh gacaay amot birti kalabta haa. Macaxu arbaqa (samlisa), labhay! Macaxuk xagar waasa birtat aliilit haa› 'yaanam axcih ken aabbe.

⁵ Takkay immay afak toh iyyaanamah, cunxoh wadir-wadir aduurih ken able. Qeebil gacah ken able; cunxoh kaxxam aawwih ken able. Quuruuk foocah yardeenimik sah, wadirih mawagtan.

⁶ Kaxxam yarde mari gufa'kke mali. Qaskar tasillime'kke mageyta. Fuurat weeqaytih xaqul qeebi keenil radah able'mmay nasri waanah», 'yaanam YALLI iyya.

⁷ «Kaxxa weeqay kullim duuful beya ceelak tamaatem iyya?

^8-9 Masri marak tanih tan! Masri mari iyyaamah: ‹Inkih tan baaxo kaxxa weeqih innah duuful beyak amaatenno. Baadal enna 'ta magaalooli kee baaxo baysenno. Kulli magaalal enna 'ya mara selennok, faaris gexay inxica; faras-gaariira tarday inxica. Kuus kee Liibiyah qaskarak gob haysitay qeebih foora. Liidiyah maray gaysê-baxi mudumul yimixxigehiyyak, isin kaadu foora. Qaskarak inkih qeebih foora› 'yaanam iyyan.

¹⁰ Immay ta ayro, YALLAY Dagelta kinnih Nabaamak Nabahiyyah ayro kinni. Ta ayro YALLI cane edde gacisa ayro. Ta ayro YALLI isi naqboyta edde digaala ayro. Kay seef saabo cabba haanam fanah ken selele. Ken qabalak cayya 'yam fanah ken selele. Macaay inteenik, YALLAY Dagelta kinnih Nabaamak Nabahiyya, kilbatak Fuurat weeqaytih xaqul tan baaxol sadgatah ken qidele.

¹¹ «Boolaateh yan Masri maraw, Gilqad fanah gexay dayla goransita. Mango dayla gabbattaanamah tu siinih maxiqta.

¹² Sin qaybi rasi inkih yoobbeh. Isin abten weeqa aabbe wee mari mayana. Qeebil agiirak yan mari titta cabeh kudelon. Too waqdi titta ankiseloonuuh, asillimi titta mahaan», 'yaanam YALLI iyye.

NABKADNESSAR MAMAATA

¹³ Baabelon-malik Masrit qeebi aba'gidih yemeete saaku, YALLIH qangara Ermiyaasal obteeh; kaak iyyemii,

¹⁴ «Malik Nabkadnessar yamaatem Masri marah warisa. Migdol kee Moof kee Tacfanhis magaaloolil yan mara iysixxiga. Keenik intaanamah: ‹Sin xaqul yan mara edde selan seef sin kaadu macaba'mmay edde koysittoonu duddeenik, bical gaca› keenik inxica.

¹⁵ Kaxxa yallah luk sugten Afis migaq le awur akah kudem macaay? Afah akah radem macaay? YALLI kaa yootoke.

¹⁶ Sin qaskar abte kudmah salafak titta tuydofoofoleeh tittin bagul raden. ‹Ahaysa ninni baaxo naduuray ninni mara fan gacnay. Naqboytit le seefwak kudnay› 'yaanam qaskar tittak inte.

¹⁷ Masri malik kaxxa yabliiy hida luk suge'mmay, migaq isik yoysommeh, kaak axcelon.

¹⁸ «Malik akak 'yaanam, yoo YALLAY Nabaamak Nabahiyya. Waara Yalli yoo immay siinik axcemii: Taabor qale qaleelak xeeruk elle raqtaah, Karmel qale kaadu badak fayya luk elle raqta'nnah, siinit carbi aba numih qande kulsah too bis luk siinik raaqele.

¹⁹ Masri maraw, seewah sin beeloonu'mmay gexoh bical gaca. Moof magaala abuuruh raaqele; num kee lac elle deedala abur akkele.

²⁰ Masri xagar meqe sagah bis luk yene'mmay, kilbat le kabuk yemeete gadqanti tet yokme.

²¹ Oson maalut xaamen qaskar arooduh awur innah gacteh tani'mmay, qeebil masoolaanaay, awyah hayya heeloonu'kkal, qeebi maaban. Edde digaalimoonu waan ayroy YALLI bala keenil oobisu waahiyya xayyowteh.

^22-23 Qeebi keenit abu waa marih qaskar tamaatu wayta waqdi, Masri-mari abeesah innah fuf axceloonuuh kudelon. Ken naqboytit salafak ken ayraddele. Garbol yan coox godmat elle yargiqen innal ken argiqelon. Qeebi keenit abtu waytam mangah loowo akak duudan mara hinna. Qanaytuk manguk amaatelon.

²⁴ Masri mari qaybit radele. Kilbat le kabuk yemeete mari qeebil keenik aysele. Tahat yabtam yoo YALLA kinni» 'yaanam iyye.

²⁵ YALLI kaadu iyyeemih, «Yoo YALLAY Nabaamak Nabah, Israayil doore Dagelta kinnihiyya axcemii: Amon deqsittaamay yalla akak iyyaanaah Teebes deqsita aracal yaqbudeenihiyya digaaleyyo. Masri mara kee Masri mari yallah le duyye digaaleyyo. Masri malik kee kaal yaamine mara beyya heeh,

²⁶ ken qidam faxa marih gabal ken heeyyo. Malik Nabkadnessar kee kay qaskaray ken qiddam faxxahiyyah gabal ken heeyyo. Takkay immay sarrî-dabaanal ummat dumak kaxxih dabaaqah Masril gacele. Tahat yabtam yoo YALLA» iyye.

²⁷ «Yaqkuub xayloy, yi naqoosay, mameysitina. Israayil ummatey, niya siinik addigille waytay. Ama xer baaxoy elle taniinik sin ayyaaqeyyo. Casbi gurral elle tanin baaxok siinik radu waa mara ayyaaqeyyo. Isinni baaxo aduurettoonuuh, amaanah sin xiiniseyyo. Num sin maxagaay sin mameysiisa.

²⁸ Anu sin lih ani'mmay mameysitina. Ama fixixih sin elle abbixe baaxooxah mara inkih bayseyyo'mmay, sin inkitanuuk mabaysa. Adabi akak geytan digaalah sin digaaleyyo. Celta digaala siinit abeyyooh; annaak gexxoonay sin maxca. Tahat yabtam yoo YALLA» iyye.