Ermiyaas 44 - NABUWWA KEE MALIKWA

YALLI MASRI GEXE MARIH TIYAT YAABE

¹ Yuudah yooboke maray Masril Migdol kee Tacfanhis kee Moof deqsitta magaaloolil yani kee, Masrik gabbi-qaxat raaqa maray Yuudah aabakuk yenehiyyah giddinaamak, Ermiyaasal YALLIH qangara obte. YALLI kaak iyyeemih,

² «Keenik intaamah, ‹Yoo YALLAY Nabaamak Nabah, Israayil doore Dagelta kinnihiyya, Yarusalaam-magaalal oobise bala kee, raqqa 'te Yuudâ-magaaloolil ruube bala isinnih tubleenih. A saaku woo arac num kee lac sinni abuuruh yan.

³ Toh akah tekkem, tokkel suge mari abak suge uma-taamah sabbata. Yot naqabu culuseeniih, xeet kee cooxuk bicsen duyyeh qibaadah sadgat abittot gacen. Too duyyey oson aqbuduk sugeenihiyya, sin kee sin kaxxa abbobtik num yubleeh yaaxige duyye hinna.

⁴ Fiiruk geerah inni nabuwway yoo takdumehiyya ken fanah ruubeeh; too nabuwwa, Taham Yalli niqba taama'mmay maabina, 'yaanam axcuk keenih warisak sugte.

⁵ Takkay immay too farmoh ayti acayuk masuginnoonuy, baaqid yok edde mahannon. Isinni uma taamak akah maadayinnoonuuy; coox kee xeetik bicsen duyyeh sadgat abaanamak maadayinnon.

⁶ Tonna leemiik kaxxa naqbi yot heeh; too naqbi Yuudâ-magaalooli kee Yarusalaam bayseeh; ta saaku akah tablen innah, num sinniih lac sinni abuuruh raqte› keenik inxic.

⁷ «Qagissah keenik intaamah, ‹Tonna'mmay a saaku kaadu yoo YALLAAY, Nabaamak Naba Dageltay Israayil doore kinnuk, siinik axceemih: Isin bala isinnil oobissaanam akah faxxaanam macaay? Labhaay agabuuy urru kee qunxa-urruy away yoobokehiyyak tu akah raaqe wayta'nnah, ummat finqah gexxam akah faxxaanam macaay?

⁸ Ama Masri rasuy elle taniinihiyyal, gabak bicissen duyye akah taqbudeeniih, sadgat too duyyeh migaaqal akah abtaanam macaay?› keenik inxicey. ‹Ta duyyeh abtan sadgatat, isinni nabsi akah bayissaanaah, ilaaqaanaah ces akak iyyan mara akah takkeenim macaay?› keenik inxicey.

⁹ ‹Sin kaxxa abbobtiiy Yuudâ-malikwa kee ken agabuuy; sin kee sin agabu Yuudâ-rasitte kee Yarusalaam-magaalal abak tenen dambi hawwenteenii?

¹⁰ A saaku fan yoh rammitten saaku manton. Yoo teyneben saaku kaadu manton. Anu siinih oobise xinto kataya mara makkinniton.

¹¹ « ‹Too umaaney abak sugteenik gexxaamah, yoo YALLAY Nabaamak Nabah, Israayil doore Dagelta kinnihiyya tahak wadir bala siinil oobiseyyom yok ixiga. Inkih tan Yuudah-ummat bayseyyo.

¹² Yuudâ-marak isi rasul raaqeeh, sarrak Masri fan gexe maraw, too gexo baatih siinik orbelem ixiga. Nabam kee qunxam siinik Masril rabele. Qulul kee carbit ambaxetton. Yuble mari akak wariggitu waa embexih ambaxetton. Ummat ilaqtaah ces akak inta mara akketton.

¹³ Yarusalaamal suge mara carbi kee qulul kee dalkat akah sele'nnah, a saaku Masril yan Yuudâ-mara too digaalah digaaleyyo.

¹⁴ Yuudâ-maray Masri fan gexehiyyak num raaqe'kal inkih ambaxelon. Yuudâ-rasuy madaarah akah maxhaxak sugeenihiyya ahaysa num keenik mayaduura. Dago maray meysih kudek sah, isi baaxo num siinik mayaduura› 'yaanam keenik inxic» iyye.

¹⁵ Nabi Ermiyaas ta yaabih warsiyyak gaba kalla hee waqdi, gennaaqoh agbi akak yaqbuden duyyeh qaydarus ruubam taaxigeh tan labha kee, wokkel gaabooweh suge agabuy manguk yenehiyya kee, Masrik gabbi-qaxat raqta exxal dabaaqah yen Israayil marih agantah kaak iyyeenimih,

¹⁶ «YALLI yoh warse akak inta yaabay taway neh warisak sugtehiyya kok cinneh!

¹⁷ Ninnih abnam faxak sugnem abenno. Duma nee kee ni kaxxa abbobtiiy ni malikwa kee nek saqoltih yan mari, Yuudâ-magaalooli kee Yarusalaam gitittel, gannat-malikáh faaroh qinabak bicsen kamri baahak sugeeniih, teetih sadgat elle abak sugen innal, nanu ta saaku uxih tonnal abenno. Toh abak nen saaku gaddaloolah sugneeh, buxa nek niqmatah sugte. Waynaah akak ceyinnam luk masuginnino.

¹⁸ Gannat-malikáh abak nen sadgat neyseedeeh, qinabak bicsen kamriy faaroh baahak sugnehiyya neyseedeek lakal, barkat nek yeerreeh; carbi kee qululut nembexe» iyyen.

¹⁹ Agbi kaadu is le kabuk iyyeemih, «Nanu gannat-malikáh-ceelol gaqambo bicissa hayneh sadgatah baahak sugneeh, qinabak bicsen kamri faaroh teetih baahak sugne. Too waqdi ni baqolti toh nek assakootuk sugte» iyyen.

²⁰ Too waqdi tokkel sugga 'te labha kee agabuy tah kaak iyyel, Ermiyaas gacsemii,

²¹ «Sin kee sin kaxxa abbobtiiy, sin malikwa kee siinik saqoltih yan mara kee, wohuk kalah tan ummata, Yuudâ-magaalooli kee Yarusalaam-gititteh addal abak sugen sadgat YALLI mahawweeninna'mmay, hawweenem makkalina. YALLI isin woh abak sugteenim aaxige waak yenem makkalina.

²² A saaku sin baaxo abuuruh raqteeh num teetil mayanam matablaanaa? A saaku tet yable mari akak nadaamitah inna le. Titta abaara mari, ‹Woo magaaloolit tekkem siinit takkay› iyyaanaah, abaaroh tet haysiten. Toh akah tekkem maca siinit celtaah? Isin abak sugten makri kee uma-taamay YALLI xiqe waahiyya, tohuh, siinit tekkem ixiga.

²³ Away qusbih siinil obte bala siinil akah obtem, taqbuden duyyeh sadgat abteeniih, YALLAL dambi bahten. Usuk iyyem moggolinnitoonuuy, kay xinto kee kay amri cinteenih. Tohuh, siinil obte bala kinnim kaadu ixiga» 'yaanam keenik iyye.

²⁴ Tohuk gaba kale waqdi, Ermiyaas agabu kee wokkel suggu 'ye marak inkih iyyeemih, «Masril yan Yuudâ-maraw, YALLI siinik iyyem siinih warisu waak ankacisay.

²⁵ YALLAY Nabaamak Nabah, Israayil doore Dagelta kinnihiyya siinik iyyaamah, ‹Nanu gannat-malikáh sadgat abennooh; qinabak bicsen kamri faaroh teetih baahenno 'yaanam inten. Meqehiiy akah inten innah aba. Abenno inteenimik maraaqina. Culten nadri duudusa.

²⁶ Duudusa'mmay, Masril yan Yuudâ-maraw, toh abteenik, anu siinik abeyyom siinih warisu waa. Masri addal enna 'ya Yuudâ-marak tahak wadir, Waara YALLAY Mulki lehiyya, axcuk yol xiibita num cabe waamah, inni migaaqay nabahiyyal siinih xiibita.

²⁷ Masril yan Yuudâ-maraw, tahak wadir sin mawaday, sin baatih ugteyyo. Carbi kee qululut embexxa 'taanam fanah sin macaba.

²⁸ A carbik tasillimu waytaah Yuudâ-baaxo aleelittu waytam, dago mara. Tohuk wadir Yuudâ-marak saaboh raaqe mari, yi yab numma kinnim kee sin yab numma kinnim ablelon.

^29-30 Yoo YALLI a baaxol siinit cabe wayu waam, elle taaxigoonu waytaama: malik Xidkiyay Yuudak malikih yenehiyya kaa niqibuk yen Baabelon malikih gabal elle hayya hee'nnal, a saaku kaadu, Masri malikiy migaaqah Malik Cofraq deqsitahiyya kaak naqboytiitih yan marih gabal heeyyo. Too maray kaa qidam faxahiyyah gabal kaa heeyyo. Sin digaalu waam, too waqdi yok aaxigetton. Toh sarra siinit takku waytaamak garci kaloot siinih akkele›, siinik iyyah yan, YALLI, hay» keenik iyye.