Ermiyaas 43 - NABUWWA KEE MALIKWA

ERMIYAAS MASRI FAN BEYAN

¹ Ermiyaas, ken Dageltay YALLA kinnihiyya «Ummatah waris» kaak iyyem inkih keenih warse.

² Too waqdi Hosaqyâ-Qadarya kee Kareyyác-Yocanan kee, wohuk kalah tan labhay anaani luk tenehiyya kaak inteemih, «Away atu edde yabtam diraaba'kkal, YALLAY ni Dageltah yani kok inxicca iyyem hinna. YALLI, ‹Masri fan magexinaay dabaaqah wokkel magacina› 'yaanam nek m'iyya.

³ Takkay immay ta yaabat koo yaabissaah net koo rubtam, Neeriyyâ-Baaruk kinnim away neexegeh. Usuk tah akah abam, Baabelon-malikih gabal gacna'gidiiy, usuk nee qide kee, hinnay kaadu, Baabelon-rasu fan seewah nee beyaana'gidi» iyyen.

⁴ Toh axcuk, Yocanan kee qaskar-abbobtiiy, wohuk kalah tan ummat Yallih amri cineeniih, Masri gexok manaadiya 'yaanamat yemeeten.

⁵ Tonna leemiik Yocanan kee kalah tan qaskar abbobti, duma qeebi yekke saaku kulli rasul fixixih suge maray away Yuudâ-rasu yuduurehiyyak

⁶ labhaay agabuuy urru kee malikik say-xayloh agantah, gaabossa heenih Masri fan been. Baabelon-qaskarih-abbay Nabudardan deqsitahiyya, Acikám-Gedalyal cabe marak Neeriyyâ-Baaruk kee nabi Ermiyaas agantah, Masri fan been.

⁷ Tonnal YALLI keenik aba iyyem cinna heenih Masri fan gexen. Masri rasuk Tacfanhis deqsitta magaala gufen.

ERMIYAAS, BAABELON-MALIK MASRI AMAATELEM YIYSIXXIGE

⁸ Tokkel YALLIH qangara Ermiyaasal obteeh; kaak iyyeemih,

⁹ «Gexay kaxxa xeet bahha haay, malik qarih culmah afal dagga hayte aracat ubkun. Toh abta way Yuudâ-mari koo elle yable'kkel ab.

¹⁰ Too waqdi keenik intaamah, ‹YALLAY Nabaamak Nabah, Israayil doore Dagelta kinnihiyya iyyamaa: Baabelon-malikiy yi taama abahiyya tama baaxo fan baaheyyo siinik iyya› keenik inxic. ‹Baabelon-malik, anu away dageeh, xeet addat akak ubkune aracal isi korsi haysiteleeh, kay siraq tama'kkel gacele.

¹¹ Masrit qeebi abeleeh, qeebil teetik aysele. Dalkah rabu waa mari keenik dalkah rabeleeh, seewah keenik beyoonu waan mari seewah gexele. Qeebit rabu waa mari keenik qeebit rabele.

¹² Masri mari yallah le duyye elle yaqbuden qarwat gira ruubele. Yallah lon duyyey gabak bicseenihiyyak garabat gira ruubeleeh, garab kaadu dannabah keenik beele. Saqat duwah yan num xagaral le raraytok inkaaqe elle yafiile'nnal, Masril sugga 'tem inkih ifiilla heeh isi baaxo beele. Takkay immay xagar num kaak maxagaay, amaanah awqele.

¹³ Taahirik yan xaay xeerihiyyay Helyobbolis deqsitta magaalal yanihiyya bayseleeh, Masri mari yallah le duyye elle yaqbuden qarwa carriselon› keenik inxic» 'yaanam kaak iyye.